நடிகர் விஜய்யின் 66வது படத்தின் முதல் பார்வை மற்றும் படத்தலைப்பு வெளியிடப்பட்டுள்ளது.
‘மாஸ்டர்’, ‘பீஸ்ட்’ படங்களுக்குப் பிறகு நடிகர் விஜய் தன்னுடைய 66ஆவது படத்தில் தற்போது நடித்து வருகிறார். ‘தோழா’ படத்தை இயக்கிய வம்சி இந்த படத்தை இயக்குகிறார். தில் ராஜூ படத்தைத் தயாரிக்கிறார்.
முதல் முறையாக நடிகை ராஷ்மிகா மந்தானா விஜய்யுடன் இணைந்து கதாநாயகியாக நடிக்கிறார். இவர்கள் தவிர நடிகர்கள் பிரகாஷ்ராஜ், ஷாம், யோகி பாபு என பெரிய நட்சத்திர பட்டாளமே இந்த படத்தில் நடிக்கிறது. தமிழ் – தெலுங்கு என இரண்டு மொழிகளிலும் இந்த படம் உருவாகிறது.
சென்னையில் ஒரு பாடல் எடுத்து முடித்த பின்பு இரண்டாவது கட்ட படப்பிடிப்பு ஹைதராபாத்தில் முடிந்து தற்பொழுது மீண்டும் சென்னையில் நடந்து வருகிறது.
நடிகர் விஜய்யின் புகைப்படங்கள் சென்னை படப்பிடிப்பு தளத்திலிருந்து வெளியானதால், சென்னையிலேயே வேறு இடத்தில் செட் அமைத்துப் படப்பிடிப்பு நடத்த திட்டமிட்டு அதற்கான பணியில் ஈடுபட்டு வருகின்றனர்.
நாளை (ஜூன் 22) நடிகர் விஜய்யின் 48ஆவது பிறந்தநாள். இதனையொட்டி இந்த படத்தின் முதல் பார்வை இன்று வெளியிடப்படுவதாகப் படக்குழு அறிவித்தது. இது மட்டுமல்லாமல், இன்று இரவு 12 மணிக்கு இரண்டாவது பார்வையும் வரும் என எதிர்பார்க்கப்படுகிறது. அதன்படி விஜய்யின் 66வது படம் ‘வாரிசு’ என தலைப்பிடப்பட்டுள்ளது. முதல் பார்வையில் நடிகர் விஜய் கோட்-சூட் அணிந்து இருக்கிறார். படத் தலைப்பின் கீழ் ‘The Boss Returns’ என டேக் லைனும் கொடுக்கப்பட்டுள்ளது.
முன்பு ஒரு பேட்டியில், தயாரிப்பாளர் தில் ராஜூ தனது பேட்டியில் இது குடும்ப கதை என சொல்லி இருந்தார்.அதற்கேற்றாற் போலவே, படத்தலைப்பும் உள்ளது. இந்த படம் முடிந்த பிறகு நடிகர் விஜய் தன்னுடைய 67 ஆவது படமாக இயக்குநர் லோகேஷ் கனகராஜ் உடன் இணைகிறார்.
பிறந்த நாளுக்காக வெளியிடப்படும் 66வது படத்தின் முதல் பார்வை என்பதால் ரசிகர்கள் கவனம் இந்த படம் மீது மட்டுமே இருக்க வேண்டும் என்பதே படக்குழுவின் எதிர்பார்ப்பு. ‘தளபதி67’ படத்தின் தயாரிப்பாளர் ‘மாஸ்டர்’ பட தயாரிப்பாளரான லலித்தாக இருக்க அதிக வாய்ப்புகள் இருக்கிறது எனவும் சொல்லப்படுகிறது.
**ஆதிரா**
