பண்டிகை நாட்களில் இனிப்பில்லாமல் எப்படி? அதிலும், சின்னப் பிள்ளைகள் முதல் தாத்தா, பாட்டி வரை எல்லோரும் விரும்பிச் சாப்பிடுவது காஜு கட்லி. முந்திரியின் இயற்கையான சுவையும், வாயில் போட்டதும் கரையும் மென்மையும்தான் இதன் ஸ்பெஷல். இதற்காகக் கடைக்கு ஓட வேண்டாம். வீட்டில் இருக்கும் ஐந்து பொருட்களே போதும்.
என்னென்ன வேண்டும்?
பொருட்கள் குறைவு, ஆனால் அளவு சரியாக இருக்க வேண்டும். அப்போதுதான் கடை சுவை கிடைக்கும்.
- முந்திரிப் பருப்பு – 1½ கப்
- சர்க்கரை – ¾ கப்
- தண்ணீர் – ½ கப்
- ஏலக்காய்த் தூள் – ¼ தேக்கரண்டி
- நெய் – 2 தேக்கரண்டி
முந்திரியைப் பொடிக்கும்போது கவனம்
முந்திரியை மிக்ஸியில் போட்டு நைசாகப் பொடித்துக்கொள்ளுங்கள். ஆனால் நீண்ட நேரம் தொடர்ந்து ஓடவிடாதீர்கள். அப்படிச் செய்தால் முந்திரியிலிருந்து எண்ணெய் வெளியேறி, மாவு போல ஒட்டிக்கொள்ளும்.
அதனால் மிக்ஸியை நிறுத்தி நிறுத்தி, கொஞ்சம் கொஞ்சமாக அரையுங்கள். தேவைப்பட்டால் சல்லடையில் சலித்துக்கொள்ளுங்கள்.
சர்க்கரைப் பாகு, முந்திரிக் கலவை
கடாயில் சர்க்கரையையும் தண்ணீரையும் போட்டு மிதமான தீயில் காய்ச்சுங்கள். சர்க்கரை கரைந்து கம்பிப் பதத்துக்கு வந்ததும் ஏலக்காய்த் தூளைச் சேருங்கள்.
அதில் பொடித்த முந்திரியைக் கொஞ்சம் கொஞ்சமாகத் தூவி, கட்டி விழாமல் கிளறுங்கள். தீயை மிதமாகவே வைத்து, நிறுத்தாமல் கிளறிக்கொண்டிருக்க வேண்டும். கலவை கெட்டியாகி, கடாயின் ஓரத்தில் ஒட்டாமல் வரும்போது நெய் சேர்த்து இறக்கிவிடுங்கள்.
தேய்த்து வெட்டுங்கள்
கலவை இன்னும் சூடாக இருக்கும்போதே, நெய் தடவிய பட்டர் பேப்பரில் கொட்டுங்கள். கையில் கொஞ்சம் நெய் தடவிக்கொண்டு மெதுவாகப் பிசையுங்கள். அதன் மேல் இன்னொரு பட்டர் பேப்பரை வைத்து, சப்பாத்திக் கட்டையால் சமமாகத் தேயுங்கள்.
10 முதல் 15 நிமிடம் ஆறியதும் வைரம் போலத் துண்டுகளாக வெட்டிக்கொள்ளலாம். கடையில் வாங்கியது போலவே மென்மையான, சுவையான காஜு கட்லி இப்போது உங்கள் வீட்டிலேயே தயார்.
