ஹோர்முஸ் வழியாக இந்தியக் கப்பல்கள் போக ஈரான் அனுமதி! எண்ணெய், கேஸ் நெருக்கடிக்கு நிம்மதி கிடைக்குமா?

மேற்கு ஆசியாவில் போர்ப் பதற்றம் தணியாத நேரத்தில், இந்தியாவுக்கு ஒரு ஆறுதல் செய்தி வந்துள்ளது.

தன் கட்டுப்பாட்டில் இருக்கும் ஹோர்முஸ் ஜலசந்தி வழியாக இந்தியா உட்பட நான்கு நாடுகளின் கப்பல்கள் தடையில்லாமல் போகலாம் என்று ஈரான் அனுமதி கொடுத்துள்ளது.

இந்தியாவுக்குக் கச்சா எண்ணெயும் எரிவாயுவும் வந்து சேர்வதில் இருந்த அழுத்தம் இதனால் கொஞ்சம் குறையும் என்று எதிர்பார்க்கப்படுகிறது.

எந்த நாடுகளுக்கு விலக்கு?

இந்தியா, சீனா, ஈராக், கத்தார் ஆகிய நான்கு நாடுகளின் கப்பல்களுக்கு, ஹோர்முஸ் வழியாகப் போக விதிக்கப்பட்டிருந்த போக்குவரத்துக் கட்டுப்பாடுகளிலிருந்து விலக்கு அளிக்கப்பட்டிருப்பதாக ஈரான் நாடாளுமன்றத்தின் தேசிய பாதுகாப்பு, வெளியுறவுக் கொள்கைக் குழுவின் துணைத் தலைவர் அமீர் ஹயாத் மொகத்தம் தெரிவித்துள்ளார்.

ஈரான் மாணவர் செய்தி நிறுவனத்திடம் பேசிய அவர், இந்த நாடுகளின் கப்பல்கள் இப்போது சுதந்திரமாகப் போய்வருவதாகவும், அமெரிக்கப் படைகளும் அவற்றைத் தடுப்பதில்லை என்றும் சொன்னார்.

இந்தியாவுக்கு இது ஏன் இவ்வளவு முக்கியம்?

இந்தியக் கப்பல்களுக்கு அனுமதி கிடைத்ததன் பின்னணியில் இரு நாடுகளுக்கும் இடையிலான வர்த்தக உறவும் ஒரு காரணம். குறிப்பாக, இந்தியாவிலிருந்து மருந்துப் பொருட்களை ஈரான் இறக்குமதி செய்ய இந்த அனுமதி உதவும் என்று அந்நாட்டு நாடாளுமன்ற உறுப்பினர் கூறியுள்ளார்.

இந்தியா தன் கச்சா எண்ணெய்த் தேவையில் சுமார் 90 சதவீதத்தை இறக்குமதி மூலமே பூர்த்தி செய்கிறது. எல்பிஜி இறக்குமதியின் பெரும்பகுதியும் இந்தக் கடல் பாதையை நம்பித்தான் இருக்கிறது.

கேஸ் விநியோகத்துக்கு நிம்மதியா?

இந்த வழியாகக் கச்சா எண்ணெய் மட்டுமல்ல, திரவமாக்கப்பட்ட இயற்கை எரிவாயுவான எல்என்ஜியும் போகிறது. கத்தார், ஐக்கிய அரபு அமீரகத்திலிருந்து இந்தியாவுக்கு வரும் எரிவாயுவுக்கு இந்தப் பாதை இன்றியமையாதது.

கட்டணம் கட்ட வேண்டுமா?

இந்திய, சீனக் கப்பல்களிடம் ஈரான் போக்குவரத்துக் கட்டணம் வசூலிக்கிறது என்றும், கத்தார் கப்பல்களுக்குக் கட்டணம் இல்லாமல் அனுமதி தரப்படுகிறது என்றும் மொகத்தம் சொல்லியுள்ளார். ஆனால், தூதரகப் பேச்சுவார்த்தைகள் மூலம் அனுமதி பெற்ற இந்தியக் கப்பல்கள் எந்தக் கட்டணமும் செலுத்தவில்லை என்று இந்திய அரசு வட்டாரங்கள் தெரிவிக்கின்றன.

இனி என்ன? இந்த அனுமதி உடனடியாக எரிபொருள் விநியோகத்தில் நிம்மதியைக் கொண்டுவருமா என்பது, அந்தப் பகுதியில் போர்ச்சூழல் எப்படிப் போகிறது, கடல் வழிப் பயணம் எவ்வளவு பாதுகாப்பாக இருக்கிறது என்பதைப் பொறுத்தே அமையும்.