இலங்கையில் தமிழீழ விடுதலைப் புலிகள் இயக்கத்தின் தலைவர் வேலுப்பிள்ளை பிரபாகரனின் வீட்டை விடுதலைச் சிறுத்தைகள் கட்சித் தலைவர் தொல்.திருமாவளவன் எம்.பி. இன்று (நவம்பர் 17) நேரில் பார்வையிட்டார்.
இலங்கையின் மூத்த தமிழ் அரசியல் தலைவரும், முன்னாள் நாடாளுமன்ற உறுப்பினருமான எம்.கே.சிவாஜிலிங்கம் (வயது 69) உடல்நலக் குறைவால் நவம்பர் 14-ந் தேதி காலமானார். சிவாஜிலிங்கத்தின் இறுதிச் சடங்குகள் யாழ்ப்பாணம் மாவட்டம் வல்வெட்டித்துறையில் நேற்று (நவம்பர் 16) நடைபெற்றன. இதில் பங்கேற்பதற்காக விடுதலைச் சிறுத்தைகள் கட்சித் தலைவர் திருமாவளவன் இலங்கை சென்றார்.
வல்வெட்டித்துறையில் பொதுமக்களின் அஞ்சலிக்காக வைக்கப்பட்டிருந்த சிவாஜிலிங்கத்தின் உடலுக்கு திருமாவளவன் இறுதி அஞ்சலி செலுத்தினார். அவரது குடும்பத்தினருக்கும் திருமாவளவன் ஆறுதல் தெரிவித்தார்.
பின்னர் நடைபெற்ற நினைவஞ்சலிக் கூட்டத்திலும் திருமாவளவன் பங்கேற்றார். இந்த நிகழ்வில் இலங்கையின் பல்வேறு தமிழ் அரசியல் கட்சிகளின் தலைவர்களும் கலந்துகொண்டனர்.
இதனைத் தொடர்ந்து வல்வெட்டித்துறையில் விடுதலைப் புலிகள் இயக்கத்தின் தலைவர் வேலுப்பிள்ளை பிரபாகரனின் வீடு இருந்த இடத்தையும் திருமாவளவன் நேரில் சென்று பார்வையிட்டார். இந்த இடம் தற்போது கட்டிடங்கள் இல்லாமல் கைவிடப்பட்ட நிலையில் உள்ளது. இலங்கைக்கு செல்லும் வெளிநாட்டு பயணிகள் பிரபாகரன் பிறந்து, வளர்ந்து பின்னர் கைவிடப்பட்ட இந்த இடத்தை பார்வையிட்டு வருகின்றனர்.
படங்கள்




















