அமெரிக்க அதிபர் டொனால்ட் டிரம்ப், உலகின் முக்கியமான கடல்வழிப் பாதைகளில் ஒன்றான ஹோர்முஸ் நீரிணையின் பெயரை ‘டிரம்ப் ஸ்ட்ரெய்ட்’ என மாற்றலாம் என்று தெரிவித்துள்ளார்.
ஈரான்-அமெரிக்கா இடையேயான மோதல் தீவிரமடைந்து வரும் சூழலில் டிரம்பின் இந்த கருத்து சர்வதேச அளவில் கவனம் பெற்றுள்ளது.
‘அமெரிக்காவின் கட்டுப்பாட்டில் உள்ளது’
டிரம்ப் தனது Truth Social பதிவில், ஹோர்முஸ் நீரிணை தற்போது அமெரிக்காவின் கட்டுப்பாட்டில் இருப்பதாகக் கூறி, அதன் பெயரை ‘TRUMP STRAIT’ என மாற்றலாமா என்று கேள்வி எழுப்பியுள்ளார்.
“அமெரிக்காவைப் போலவே இது இன்னும் ‘ஹாட்டாக’ இருக்கும்” என்ற வகையில் அவர் தனது பதிவில் குறிப்பிட்டுள்ளார்.
இது உண்மையான பெயர் மாற்ற நடவடிக்கையா அல்லது டிரம்பின் வழக்கமான அரசியல் பாணியிலான கருத்தா என்பது உடனடியாகத் தெளிவாகவில்லை.
ஈரானுடன் மோதல் தீவிரம்
ஹோர்முஸ் நீரிணை தொடர்பான சர்ச்சை, தற்போது நடைபெற்று வரும் அமெரிக்கா-ஈரான் மோதலின் முக்கியப் பகுதியாக மாறியுள்ளது. கடந்த சில நாட்களாக இரு தரப்பும் தாக்குதல்களை தீவிரப்படுத்தியுள்ளன.
அமெரிக்கா ஈரான் மீது புதிய தாக்குதல்களை நடத்திய நிலையில், ஈரானும் அமெரிக்கப் படைகள் மற்றும் அதன் பிராந்திய கூட்டாளிகளைக் குறிவைத்து ஏவுகணைத் தாக்குதல்களை நடத்தியதாக தகவல்கள் வெளியாகியுள்ளன.
உலக எண்ணெய் வர்த்தகத்தின் முக்கியப் பாதை
ஈரானுக்கும் ஓமனுக்கும் இடையே அமைந்துள்ள ஹோர்முஸ் நீரிணை, உலக எரிசக்தி சந்தைக்கு மிகவும் முக்கியமான கடல்வழிப் பாதையாகும். போர் தொடங்குவதற்கு முன்பு உலகின் எண்ணெய் வர்த்தகத்தில் சுமார் ஐந்தில் ஒரு பங்கு இந்தப் பாதை வழியாக சென்றது.
இதனால் நீரிணையில் ஏற்படும் எந்தவொரு பதற்றமும் கச்சா எண்ணெய் விலை மற்றும் உலகளாவிய எரிசக்தி சந்தையில் உடனடி தாக்கத்தை ஏற்படுத்தக்கூடியது.
பெயர் மாற்றம் டிரம்புக்கு புதிதல்ல
புவியியல் பெயர்களை மாற்றுவது தொடர்பான டிரம்பின் சர்ச்சை இது முதல் முறை அல்ல. மெக்சிகோ வளைகுடாவை ‘Gulf of America’ என்றும், ஒன்டாரியோ ஏரியை ‘Lake America’ என்றும் மாற்றும் முயற்சிகளை அவர் ஏற்கெனவே மேற்கொண்டுள்ளார்.
அந்த வரிசையில் தற்போது ஹோர்முஸ் நீரிணைக்கும் தனது பெயரை சூட்டும் யோசனையை முன்வைத்திருப்பது சர்வதேச அரசியல் வட்டாரத்தில் புதிய விவாதத்தை ஏற்படுத்தியுள்ளது.
