வெங்கட் பிரபு கதையில் யுவன் இசை: ‘ராஜாஸ் ப்ளேலிஸ்ட்’ மூலம் இயக்குநராக அறிமுகமாகும் சுஜித்!

By Santhosh Raj Saravanan

|

Published on 6 Jul 2026, 10:21 AM

rajas playlist movie announcement yuvan shankar raja

தமிழ் திரையுலகில் ஒரு திரைப்படத்தின் தொழில்நுட்பக் கலைஞர்கள் இயக்குநராகக் களம் இறங்குவது புதிய விஷயமல்ல. அந்த வரிசையில், மலையாளத்தில் வெளியான ‘குடும்பஸ்தன்’ (Kudumbasthan) திரைப்படத்தின் மூலம் ஒளிப்பதிவாளராகக் கவனம் ஈர்த்த சுஜித் என். சுப்ரமணியம் (Sujith N Subramaniam), தற்போது தமிழ் சினிமாவில் இயக்குநராகத் தனது புதிய இன்னிங்ஸைத் தொடங்கியுள்ளார். இசைஞானி இளையராஜாவின் 50-வது ஆண்டு இசை விழாக் கொண்டாட்ட மேடையில், இத்திரைப்படத்தின் அதிகாரப்பூர்வ தலைப்பு மற்றும் ஃபர்ஸ்ட் லுக் போஸ்டர் ‘ராஜாஸ் ப்ளேலிஸ்ட்’ (Rajas Playlist) என்ற பெயரில் பிரம்மாண்டமாக அறிவிக்கப்பட்டுள்ளது.

இளையராஜா குடும்ப வாரிசுகளின் மாஸ் கூட்டணி

‘ராஜாஸ் ப்ளேலிஸ்ட்’ திரைப்படத்தின் மிக முக்கிய சிறப்பம்சமே இதன் கதையைத் திரைக்கதை மன்னன் மற்றும் முன்னணி இயக்குநர் வெங்கட் பிரபு எழுதியுள்ளார் என்பதுதான். மேலும், படத்திற்கு இசை அசுரன் யுவன் சங்கர் ராஜா இசையமைக்கிறார். இத்திரைப்படத்தின் மூலம் இளையராஜாவின் தம்பியான பாஸ்கரின் மகனும், வெங்கட் பிரபு – யுவனின் தம்பியுமான ஜெயன் (Jaiyan) கதாநாயகனாக தமிழ் சினிமாவில் அறிமுகமாகிறார். இளையராஜா குடும்பத்தின் மூன்று தலைமுறை வாரிசுகளின் பங்களிப்போடு, இசைஞானிக்கு ஒரு அழகான சமர்ப்பணமாக இப்படம் உருவாகி வருவதால் கோலிவுட்டில் பெரும் எதிர்பார்ப்பு ஏற்பட்டுள்ளது.

ADVERTISEMENT
இளையராஜா ரசிகர்களின் ஒரு அழகான பயணம்

படம் குறித்து இயக்குநர் சுஜித் பகிர்ந்துள்ளதாவது: “இசைஞானி இளையராஜா அவர்களின் இசை ஒரு மனிதனின் வாழ்க்கையை எப்படி மாற்றுகிறது என்பதை மையமாகக் கொண்ட ஒரு ‘ரோம்-காம்’ (Rom-Com) மற்றும் குடும்ப சென்டிமென்ட் கலந்த படமாக இது இருக்கும். ஐடி ஊழியர் முதல் உசிலம்பட்டி விவசாயி வரை அனைவரின் வாழ்விலும் கலந்திருக்கும் இளையராஜாவின் பாடல்களின் தொகுப்பே இந்த ‘ராஜாஸ் ப்ளேலிஸ்ட்’. யுவன் சாரின் இசையமைப்பில் உருவான முதல் பாடலின் போதே நான் நெகிழ்ந்து அழுதுவிட்டேன்,” என்று கூறியுள்ளார். படத்தில் ஜெயனுக்கு ஜோடியாக நடிகை சோனா ஒலிக்கல் (Sona Olickal) நடிக்கிறார்.

சுதா கொங்கரா மற்றும் டாப் கிளாஸ் தொழில்நுட்பக் குழு

இத்திரைப்படத்தை ‘எலிஃபேண்டைன் எக்ஸ்’ (Elephantine X) நிறுவனத்தின் சார்பில் ரமணன் பாலகங்காதரன் மிக பிரமாண்டமாகத் தயாரிக்கிறார். மேலும், ‘சூரரைப் போற்று’ படத்தின் இயக்குநர் சுதா கொங்கரா இப்படத்தின் ‘கிரியேட்டிவ் புரொடியூசராக’ (Creative Producer) களம் இறங்கியிருப்பது படத்திற்குப் பெரும் பலமாக அமைந்துள்ளது. இப்படத்தின் பாடல்களை இயக்குநர் சுஜித், விக்னேஷ் ஸ்ரீகாந்த் மற்றும் நவயுகன் ஆகியோர் எழுதியுள்ளனர். சாய் முனிஷ் ஒளிப்பதிவு பணிகளையும், ஸ்ரீ வாட்சன் படத்தொகுப்பையும் கவனிக்கின்றனர். இசைஞானியின் தீவிர ரசிகர்களைக் குறிவைத்துத் தயாராகி வரும் இப்படத்தின் பாடல்கள் விரைவில் வெளியாகும் எனப் படக்குழுவினர் அறிவித்துள்ளனர்.

ADVERTISEMENT

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Santhosh Raj Saravanan

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel