26 ஆண்டுகளுக்குப் பின் தமிழ் சினிமாவுக்கு ரீ-என்ட்ரி! தனுஷின் ‘ஓம்’ படத்தில் இணைந்த இந்தி சூப்பர் ஸ்டார்!

By Santhosh Raj Saravanan

|

Published on 9 Jul 2026, 4:14 PM

Naseeruddin Shah

பிரமாண்டமாகும் ‘ஓம்’ படத்தின் நட்சத்திரப் பட்டாளம்

‘அமரன்’ படத்தின் பிரம்மாண்ட வெற்றிக்குப் பிறகு இயக்குநர் ராஜ்குமார் பெரியசாமி இயக்கத்தில், தனுஷ் நடிப்பில் உருவாகி வரும் திரைப்படம் ‘ஓம்’ (Om: Chapter 1 – Udhiram). தனுஷின் 55-வது படமான (D55) இத்திரைப்படத்தை வுண்டர்பார் ஃபிலிம்ஸ் மற்றும் ஆர் டேக் ஸ்டூடியோஸ் இணைந்து தயாரிக்கின்றன. மலையாள மெகாஸ்டார் மம்மூட்டி, நடிகைகள் சாய் பல்லவி மற்றும் ஸ்ரீலீலா ஆகியோர் ஏற்கனவே முக்கியக் கதாபாத்திரங்களில் நடித்து வரும் நிலையில், தற்போது இந்தியத் திரையுலகின் மூத்த நடிகரான நஸ்ருதீன் ஷா (Naseeruddin Shah) இத்திரைப்படத்தில் இணைந்துள்ளதாகத் தயாரிப்பு நிறுவனம் அதிகாரப்பூர்வமாக அறிவித்துள்ளது.

ADVERTISEMENT
‘ஹே ராம்’ படத்திற்குப் பிறகு மீண்டும் தமிழ் சினிமா

இந்திய சினிமாவின் மிகச்சிறந்த நடிகர்களில் ஒருவரான நஸ்ருதீன் ஷா, தமிழில் கடைசியாக கடந்த 2000-ஆம் ஆண்டு வெளியான கமல்ஹாசனின் வரலாற்றுச் சிறப்புமிக்க ‘ஹே ராம்’ திரைப்படத்தில் மகாத்மா காந்தியாக நடித்திருந்தார். அதன்பின்னர் சுமார் 26 ஆண்டுகள் கழித்து அவர் மீண்டும் தமிழ் திரைப்படத்தில் நடிக்க ஒப்பந்தமாகியுள்ளது ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. மேலும், 1994-ல் வெளியான ‘பொந்தன் மாடா’ மலையாளப் படத்திற்குப் பிறகு 32 ஆண்டுகள் கழித்து மம்மூட்டியும் நஸ்ருதீன் ஷாவும் மீண்டும் ஒரே திரையில் இணையவுள்ளனர் என்பது குறிப்பிடத்தக்கது.

செம்மரக் கடத்தலும் மாஸ் தனுஷும்

சமீபத்தில் வெளியான ‘ஓம்’ படத்தின் டீஸர் சமூக வலைதளங்களில் வைரலானது. செம்மரக் கட்டைகளை வெட்டும் தொழிலாளர்கள் மற்றும் அவர்களைத் துப்பாக்கி முனையில் சுற்றி வளைக்கும் காவல்துறையினருக்கு இடையே நடக்கும் மோதலின் பின்னணியில் படம் உருவாகியுள்ளது. இதில் மரக்கட்டை வெட்டுபவராக, ரஃப்பான மாஸ் தோற்றத்தில் வரும் தனுஷ், அதிகாரிகளுக்கு எதிராகக் களமிறங்கும் அதிரடி ஆக்‌ஷன் காட்சிகள் இடம்பெற்றுள்ளன. தனுஷின் திரையுலகப் பயணத்திலேயே மிக அதிக பட்ஜெட்டில் உருவாகும் படங்களில் ஒன்றாக இது இருக்கும் எனத் தெரிவிக்கப்பட்டுள்ளது.

ADVERTISEMENT
அக்டோபர் 16ல் ரிலீஸ்: பாக்ஸ் ஆபீஸ் மோதல்

சாய் அபயங்கர் இசையமைக்கும் இத்திரைப்படம் வரும் அக்டோபர் 16 அன்று நவராத்திரி/பூஜை விடுமுறை பண்டிகையை முன்னிட்டு உலகம் முழுவதும் திரையரங்குகளில் வெளியாகவுள்ளது. அதே வாரத்தில் (அக்டோபர் 15) சூப்பர் ஸ்டார் ரஜினிகாந்தின் ‘ஜெயிலர் 2’ திரைப்படமும் வெளியாக திட்டமிடப்பட்டுள்ளதால், இந்த ஆண்டு ஆயுத பூஜை பாக்ஸ் ஆபீஸில் ‘ஓம்’ மற்றும் ‘ஜெயிலர் 2’ ஆகிய இரண்டு பிரம்மாண்ட திரைப்படங்களுக்கு இடையே பலப்பரீட்சை இருக்கும் என எதிர்பார்க்கப்படுகிறது.

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Santhosh Raj Saravanan

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel