நீங்கள் யார் என்பதை உங்கள் நண்பர்களே தீர்மானிக்கிறார்கள்! இதுதான் ‘Friendfluence’ ரகசியம்!

By Santhosh Raj Saravanan

|

Published on 8 Jan 2026, 1:39 PM

what is friendfluence how friends change your life habits psychology tamil article

“உன் நண்பன் யார் என்று சொல்… நீ யார் என்று சொல்கிறேன்” என்ற பழமொழி நாம் அனைவரும் கேட்டதுதான். ஆனால், இது வெறும் பழமொழி மட்டுமல்ல; அறிவியல் பூர்வமான உண்மையும் கூட. உளவியலில் இதை ‘Friendfluence‘ (Friendship + Influence) என்று அழைக்கிறார்கள். அதாவது, நம்மை அறியாமலே நம் நண்பர்கள் நம் வாழ்க்கை, பழக்கவழக்கங்கள் மற்றும் சிந்தனைகள் மீது செலுத்தும் ஆதிக்கமே இது.

என்ன இது ‘Friendfluence’? நம் பெற்றோரை விட, நம் வாழ்க்கைத் துணையை விட, நாம் அதிக நேரம் செலவிடுவது நம் நண்பர்களுடன்தான். நாம் என்ன உடை அணிகிறோம், என்ன சாப்பிடுகிறோம், எந்தப் படம் பார்க்கிறோம், அவ்வளவு ஏன்… நம் லட்சியம் என்ன என்பதை முடிவு செய்வதில் கூட நண்பர்களின் பங்கு 60 சதவீதத்திற்கும் மேல் இருப்பதாக ஆய்வுகள் கூறுகின்றன. இதைத்தான் ‘சமூகத் தொற்று’ (Social Contagion) என்றும் குறிப்பிடுகிறார்கள்.

ADVERTISEMENT

நட்பின் தாக்கம் எப்படி வேலை செய்கிறது?

  1. பழக்கவழக்கங்கள் (Habits): உங்கள் நெருங்கிய நண்பர்கள் உடற்பயிற்சி செய்பவர்களாக இருந்தால், நீங்களும் உடற்பயிற்சி செய்யத் தொடங்கும் வாய்ப்பு அதிகம். மாறாக, அவர்கள் ஆரோக்கியமற்ற உணவுகளை விரும்புபவர்களாக இருந்தால், நீங்களும் டயட்டை மறந்துவிட்டு அவர்களுடன் சேர்ந்து பீட்சா சாப்பிட ஆரம்பித்துவிடுவீர்கள்.
  2. மனநிலை (Mental Health): நேர்மறையான எண்ணங்கள் கொண்ட நண்பர்கள் கூட்டத்தில் இருந்தால், நீங்களும் உற்சாகமாக இருப்பீர்கள். எப்போதும் குறை சொல்லிக்கொண்டே இருக்கும் நண்பர்களுடன் இருந்தால், உங்கள் மனதிலும் சோர்வும் எதிர்மறை எண்ணங்களும் குடியேறிவிடும்.
  3. தொழில் வளர்ச்சி (Career Growth): “உங்களைச் சுற்றியுள்ள 5 பேரின் சராசரிதான் நீங்கள்” (You are the average of the 5 people you spend the most time with) என்று ஒரு பிரபலமான வாசகம் உண்டு. லட்சிய தாகம் கொண்ட நண்பர்கள், உங்களையும் அடுத்த கட்டத்திற்குத் தள்ளுவார்கள்.

நல்ல தாக்கமா? கெட்ட தாக்கமா? ‘Friendfluence’ என்பது ஒரு இருபக்கக் கத்தி போன்றது.

ADVERTISEMENT
  • பாசிட்டிவ் பக்கம்: நீங்கள் சோர்வாக இருக்கும்போது தோள் கொடுப்பது, தவறான பாதையில் செல்லும்போது தடுத்து நிறுத்துவது, புது விஷயங்களைக் கற்றுக்கொள்ளத் தூண்டுவது – இவையெல்லாம் நல்ல நண்பர்களின் தாக்கம்.
  • நெகட்டிவ் பக்கம்: குடிப்பழக்கம், புகைப்பிடித்தல், தேவையற்ற ஆடம்பரம், படிப்பில் நாட்டம் குறைவது போன்றவை தவறான நட்பின் தாக்கத்தால் ஏற்படும் விளைவுகள். பல நேரங்களில், “எல்லோரும் செய்கிறார்கள், நாமும் செய்வோம்” என்ற மனநிலையே இதற்கு முக்கியக் காரணமாகிறது.

நாம் செய்ய வேண்டியது என்ன? நம் நண்பர்களை நாம் தேர்ந்தெடுக்க முடியும் என்பதுதான் இதில் உள்ள மிகப்பெரிய சுதந்திரம்.

  • உங்கள் நண்பர்கள் உங்களை ஊக்கப்படுத்துகிறார்களா அல்லது மட்டம் தட்டுகிறார்களா என்று கவனியுங்கள்.
  • உங்கள் இலக்குகளுக்குத் தடையாக இருக்கும் நட்பு வட்டத்தை விட்டு வெளியேறத் தயங்காதீர்கள்.
  • உங்களை விட அறினர்களுடனும், சாதித்தவர்களுடனும் பழகுங்கள்; அது உங்கள் தரத்தை உயர்த்தும்.

நட்பு என்பது வெறும் பொழுதுபோக்கு மட்டுமல்ல; அது நம் ஆளுமையைச் செதுக்கும் உளி. நல்ல நண்பர்கள் கிடைப்பது வரம். அப்படிப்பட்ட நண்பர்களைத் தேர்ந்தெடுப்பதும், அவர்களின் நல்ல குணங்களை மட்டும் எடுத்துக்கொள்வதும் நம் கையில்தான் உள்ளது. உங்கள் எதிர்காலம் உங்கள் நண்பர்களின் கையில்… ஜாக்கிரதை, அதே சமயம் கொண்டாடுங்கள்!

ADVERTISEMENT

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Santhosh Raj Saravanan

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel