ஈரான் மீது உடனடியாக ராணுவத் தாக்குதல் நடத்தும் திட்டம் எதுவும் இப்போது இல்லை என்று அமெரிக்க அதிபர் டொனால்ட் ட்ரம்ப் தெரிவித்துள்ளார். மத்திய கிழக்கில் அமெரிக்கா – ஈரான் இடையே பதற்றம் தணியாமல் இருக்கும் நேரத்தில், அவரது இந்தப் பேச்சு உலக அரசியல் வட்டாரத்தில் கவனிக்கப்பட்டுள்ளது.
ஆறே நிமிடப் போன் பேட்டி
பிரிட்டனின் ஃபைனான்சியல் டைம்ஸ் (Financial Times) நாளிதழுக்கு ட்ரம்ப் ஆறு நிமிடம் தொலைபேசியில் பேட்டி கொடுத்தார். அதில் ஈரான் விவகாரம் பற்றிக் கேட்கப்பட்டபோது, ஈரான் மீது இப்போதைக்குத் தாக்குதல் நடத்தும் திட்டம் அமெரிக்காவிடம் இல்லை என்று அவர் குறிப்பிட்டார்.
அதோடு, தற்போதைய சூழலில் அமெரிக்கா எதிர்பார்த்த பல விஷயங்கள் நடந்து வருவதாகவும், இப்போதைய நிலைமையில் தனக்குத் திருப்தி என்றும் அவர் கூறினார்.
பேச்சுவார்த்தை நடக்கிறதா?
ஈரானுடனான மோதல் பற்றிய கேள்விக்கு, இரு தரப்புக்கும் இடையே பேச்சுவார்த்தை நடந்துகொண்டிருக்கிறது என்று ட்ரம்ப் பதில் சொன்னார். அவை எந்த முடிவுக்கு வரும் என்பதைப் பொறுத்திருந்துதான் பார்க்க வேண்டும் என்றும் சொன்னார்.
தாக்குதலுக்கும் தயார்
அதே நேரத்தில், தாக்குதல் நடத்த வேண்டிய சூழ்நிலை வந்தால் அமெரிக்கா அதற்குத் தயாராகவே இருக்கிறது என்றும் அவர் எச்சரித்தார். ஆனால், தாக்குதலுக்கான தேவையே இல்லாமல் போகவும் வாய்ப்பு இருக்கிறது என்று அவர் குறிப்பிட்டார்.
இதன் அர்த்தம் என்ன?
ஒருபக்கம் பேச்சுவார்த்தை நடக்கிறது என்கிறார், இன்னொரு பக்கம் ராணுவ நடவடிக்கைக்கும் தயார் என்கிறார். அதனால், இது அமெரிக்காவின் ராணுவக் கொள்கையில் நிரந்தர மாற்றமா, அல்லது தற்காலிகமாக எடுத்த நிலைப்பாடா என்ற கேள்வி எழுந்துள்ளது. வரும் நாட்களில் நடக்கப்போகும் பேச்சுவார்த்தைகள்தான் இரு நாடுகளுக்கு இடையிலான உறவு எந்தத் திசையில் போகும் என்பதைத் தீர்மானிக்கும்.
