ஜம்மு காஷ்மீர் முதல்வர் உமர் அப்துல்லாவுக்கு எதிராக அவரது தேசிய மாநாட்டுக் கட்சியைச் சேர்ந்த 25 எம்.எல்.ஏ.க்கள் போர்க்கொடி தூக்கி இருப்பதால் அம்மாநில அரசியலில் பரபரப்பு ஏற்பட்டுள்ளது.

ஜம்மு காஷ்மீரில் உமர் அப்துல்லா தலைமையில் தேசிய மாநாட்டுக் கட்சி ஆட்சி நடைபெற்று வருகிறது. 90 உறுப்பினர்களைக் கொண்ட சட்டசபையில் இந்தக் கட்சிக்கு 41 எம்.எல்.ஏ.க்கள் உள்ளனர். காங்கிரஸ், சுயேட்சைகள் உள்ளிட்டோரின் ஆதரவுடன் உமர் அப்துல்லா ஆட்சி நடத்தி வருகிறார். இந்த நிலையில் அக்டோபர் 27-ந் தேதி உமர் அப்துல்லா தனது அமைச்சரவையை விரிவாக்கம் செய்தார். அலி முகமது சாகர், மிர் சைபுல்லா, ஷமீமா பிர்தவுஸ், அல்தாப் அகமது வானி ஆகிய 4 பேர் புதிய அமைச்சர்களாகப் பதவியேற்றனர்.

ஆனால் அமைச்சரவையில் இடம் கிடைக்கும் என்று எதிர்பார்த்திருந்த மூத்த எம்.எல்.ஏ.க்கள் பலருக்கு வாய்ப்பு வழங்கப்படவில்லை. இதனால் கட்சிக்குள் அதிருப்தி ஏற்பட்டது.

25 எம்.எல்.ஏ.க்கள் போர்க்கொடி

இந்த அதிருப்தியைத் தொடர்ந்து அக்டோபர் 30-ந் தேதி ஸ்ரீநகரில் உள்ள எம்.எல்.ஏ. கெய்சர் ஜம்ஷீத் லோன் வீட்டில் தேசிய மாநாட்டுக் கட்சி எம்.எல்.ஏ.க்கள் ஆலோசனை நடத்தினர். இந்தக் கூட்டத்தில் 17 தேசிய மாநாட்டுக் கட்சி எம்.எல்.ஏ.க்களும் ஒரு சுயேட்சை எம்.எல்.ஏ.வும் பங்கேற்றனர். தற்போதைய நிலையில் இந்த அதிருப்தி அணியில் மொத்தம் 25 எம்.எல்.ஏ.க்கள் இருக்கின்றனர்.

ஆலோசகரை நீக்குக

உமர் அப்துல்லாவுக்கு எதிரான அதிருப்தி அணியைப் பொறுத்தவரையில் முதன்மையான கோரிக்கைகளில் ஒன்று முதல்வரின் அரசியல் ஆலோசகர் நசீர் அஸ்லம் வானியை உடனடியாக நீக்க வேண்டும் என்பதுதான். அத்துடன் தற்போதைய அமைச்சர்கள் அனைவரையும் மாற்றிவிட்டு புதிய அமைச்சரவையை அமைக்க வேண்டும்; அமைச்சர்களைத் தேர்வு செய்யும்போது கட்சியின் அனைத்து எம்.எல்.ஏ.க்களிடமும் ஆலோசனை நடத்த வேண்டும். ஒரு சிலரே அனைத்து முடிவுகளையும் எடுக்கும் நிலையை மாற்ற வேண்டும் என்பதும் அதிருப்தி அணியின் கோரிக்கை.

யார் இந்த நசீர் அஸ்லம் வானி?

உமர் அப்துல்லாவின் அரசியல் ஆலோசகராக இருப்பவர் நசீர் அஸ்லம் வானி. தேசிய மாநாட்டுக் கட்சியில் நீண்டகாலமாகச் செயல்பட்டு வரும் இவர், உமர் அப்துல்லாவின் நம்பிக்கைக்குரியவர்களில் ஒருவர். தேசிய மாநாட்டு கட்சி விவகாரங்களிலும் ஆட்சி நிர்வாகத்திலும் நசீர் அஸ்லம் வானியின் தலையீடு அதிகமாக இருப்பதாக அதிருப்தி எம்.எல்.ஏ.க்கள் குற்றம்சாட்டுகின்றனர். இதனால்தான் அமைச்சரவையை மாற்ற வேண்டும் என்ற கோரிக்கையோடு, நசீர் அஸ்லம் வானியையும் நீக்க வேண்டும் என்ற கோரிக்கையை அதிருப்தி எம்.எல்.ஏ.க்கள் முன்வைத்துள்ளனர்.

14 நாட்கள் கெடு

இந்தக் கோரிக்கைகளை நிறைவேற்ற உமர் அப்துல்லாவுக்கும் தேசிய மாநாட்டுக் கட்சித் தலைமைக்கும் 14 நாட்கள் கெடு விதிக்கப்பட்டுள்ளது. இந்த 14 நாட்களுக்குள் ஆலோசகரை நீக்குவது, அமைச்சரவையை மாற்றுவது உள்ளிட்ட கோரிக்கைகள் நிறைவேற்றப்படாவிட்டால், ஆளுநர் மாளிகைக்குச் சென்று அரசுக்கான ஆதரவைத் திரும்பப் பெறுவோம் என்று அதிருப்தி எம்.எல்.ஏ.க்கள் எச்சரித்துள்ளனர்.

அதே நேரத்தில், ஜம்மு காஷ்மீருக்கு மீண்டும் மாநில அந்தஸ்து வழங்க வேண்டும், சிறப்பு அந்தஸ்தை வழங்கிய அரசியல் சாசனத்தின் 370-வது பிரிவு, 35A ஆகியவற்றை மீண்டும் கொண்டுவருவோம் என்ற வாக்குறுதியில் உமர் அப்துல்லா தீவிரம் காட்டவில்லை என்பதும் எம்.எல்.ஏ.க்களின் அதிருப்தியின் பின்னணியில் உள்ள மற்றொரு காரணமாக சொல்லப்படுகிறது.

நவம்பர் 3-ல் எம்.பி. ராஜினாமா

இதனிடையே தேசிய மாநாட்டுக் கட்சியின் ஸ்ரீநகர் மக்களவை உறுப்பினர் ஆகா சையத் ருஹுல்லா மெஹ்தி, ”370-வது சட்டப்பிரிவை மீண்டும் கொண்டுவருவது, ஜம்மு காஷ்மீர் மக்களின் உரிமைகளைப் பாதுகாப்பது உள்ளிட்ட வாக்குறுதிகளை தேசிய மாநாட்டுக் கட்சி கைவிட்டுவிட்டது; இதனால் நவம்பர் 3-ந் தேதி தேசிய மாநாட்டுக் கட்சியிலிருந்தும் தனது மக்களவை உறுப்பினர் பதவியிலிருந்தும் விலகப் போகிறேன்” என அறிவித்துள்ளார். ஏற்கெனவே கட்சிக்குள் எம்.எல்.ஏ.க்கள் அதிருப்தியில் இருக்கும் நிலையில், மக்களவை உறுப்பினரின் ராஜினாமா அறிவிப்பும் உமர் அப்துல்லாவுக்கு புதிய நெருக்கடியை ஏற்படுத்தியுள்ளது.

உமர் அப்துல்லா ஆட்சிக்கு ஆபத்தா?

ஜம்மு காஷ்மீர் சட்டசபையில் மொத்தம் 90 இடங்கள் உள்ளன. பெரும்பான்மைக்கு 46 எம்.எல்.ஏ.க்களின் ஆதரவு தேவை. தேசிய மாநாட்டுக் கட்சிக்கு 41 எம்.எல்.ஏ.க்கள் உள்ளனர். காங்கிரஸ் மற்றும் பிற கட்சிகள், சுயேட்சைகளின் ஆதரவுடன் உமர் அப்துல்லா அரசு செயல்பட்டு வருகிறது. இந்த நிலையில் 25 எம்.எல்.ஏ.க்கள் அரசுக்கான ஆதரவைத் திரும்பப் பெற்றால், அது உமர் அப்துல்லாவுக்கு மிகப்பெரிய நெருக்கடியாக அமையும்.

முன்னதாக பிரபல தொலைக்காட்சி பத்திரிகையாளர் நிதி ரஸ்தானை அக்டோபர் 30-ந் தேதி இரண்டாவது திருமணம் செய்து கொண்டார் உமர் அப்துல்லா. டெல்லியில் சிறப்புத் திருமணச் சட்டத்தின் கீழ் நடைபெற்ற இந்தத் திருமணத்தில் இரு குடும்பத்தினரும் பங்கேற்றனர். உமர் அப்துல்லா தனது முதல் மனைவி பாயல் நாத்தை 1994-ல் திருமணம் செய்திருந்தார். இருவருக்கும் 2 மகன்கள் உள்ளனர். நீண்டகாலமாகப் பிரிந்து வாழ்ந்த இருவருக்கும் கடந்த ஜூலை 31-ந் தேதி உச்சநீதிமன்றம் பரஸ்பர சம்மதத்தின் அடிப்படையில் விவாகரத்து வழங்கியது. இதையடுத்து நிதி ரஸ்தானை திருமணம் செய்த உமர் அப்துல்லா, திருமணப் புகைப்படங்களை சமூக வலைதளத்தில் பகிர்ந்து, “நேற்று ஒரு புதிய பயணம் தொடங்கியது” எனப் பதிவிட்டிருந்த நிலையில் அவரது ஆட்சிக்கு நெருக்கடி உருவாகி உள்ளது குறிப்பிடத்தக்கது.