ஆந்திராவில் ஏற்கெனவே அர்னாப் புயலால் ஏற்பட்ட பாதிப்புகளைச் சீரமைக்கும் பணிகள் நடைபெற்று வரும் நிலையில், தற்போது நெருங்கி வரும் முரசு புயலால் மின்சாரக் கட்டமைப்புகள் மேலும் சேதமடையக்கூடும் என்பதால், தமிழக முதல்வர் விஜய்யை ஆந்திர முதல்வர் சந்திரபாபு நாயுடு இன்று (நவம்பர் 1) தொலைபேசியில் தொடர்புகொண்டு உதவி கோரியுள்ளார்.
வங்கக்கடலில் உருவான அர்னாப் புயல் அக்டோபர் 28-ந் தேதி ஆந்திர கடற்கரையைக் கடந்தது. அப்போது பலத்த காற்றுடன் கனமழை பெய்ததால் கடலோர மாவட்டங்கள் கடுமையாகப் பாதிக்கப்பட்டன.
இந்தப் புயலால் ஆயிரக்கணக்கான மின்கம்பங்கள் சேதமடைந்தன. பல்வேறு கிராமங்களில் மின்விநியோகம் துண்டிக்கப்பட்டது. மரங்கள் வேரோடு சாய்ந்ததுடன், வீடுகள் மற்றும் விவசாயப் பயிர்களும் சேதமடைந்தன. ஆந்திராவில் புயல் பாதிப்புகளால் 7 பேர் உயிரிழந்ததாகவும், சுமார் ரூ.4,600 கோடி அளவுக்குச் சேதம் ஏற்பட்டதாகவும் முதல்வர் சந்திரபாபு நாயுடு தெரிவித்திருந்தார்.
இதனிடையே, வங்கக்கடலில் தற்போது உருவாகியுள்ள முரசு புயல் ஆந்திர கடற்கரையை நோக்கி நகர்ந்து வருகிறது. இந்தப் புயல் நவம்பர் 2-ந் தேதி நள்ளிரவு முதல் 3-ந் தேதி அதிகாலைக்குள் தெற்கு ஆந்திர கடற்கரையைக் கடக்கக்கூடும் என இந்திய வானிலை ஆய்வு மையம் எச்சரித்துள்ளது. இதன் காரணமாக ஆந்திர கடலோர மாவட்டங்கள் மற்றும் வடதமிழகத்தில் பலத்த காற்றுடன் கனமழை முதல் மிகக் கனமழை பெய்யக்கூடும் எனவும் தெரிவிக்கப்பட்டுள்ளது. வடதமிழக கடலோரப் பகுதிகளுக்கு ரெட் அலர்ட் எச்சரிக்கையும் விடுக்கப்பட்டுள்ளது.
விஜய்யிடம் உதவி கேட்ட சந்திரபாபு நாயுடு
இந்த நிலையில், தமிழக முதல்வர் விஜய்யை ஆந்திர முதல்வர் சந்திரபாபு நாயுடு இன்று தொலைபேசியில் தொடர்புகொண்டு பேசினார். இதுகுறித்து ஆந்திர முதல்வர் சந்திரபாபு நாயுடுவின் அலுவலக எக்ஸ் பக்கத்தில் வெளியிடப்பட்டுள்ள பதிவில், ”புயல் பாதிப்புகளுக்குப் பிறகு மின் கட்டமைப்பு சீரமைப்புப் பணிகளுக்குத் தமிழக அரசின் உதவியைக் கோரி, தமிழக முதல்வர் விஜய்யை ஆந்திர முதல்வர் சந்திரபாபு நாயுடு இன்று தொலைபேசியில் தொடர்பு கொண்டு பேசினார். முரசு புயல் காரணமாக அதிகளவில் மின்கம்பங்கள் சேதமடையக்கூடும் என்பதால், சீரமைப்புப் பணிகளுக்காகக் களப் பணியாளர்களையும் இயந்திரங்களையும் அனுப்பி வைக்குமாறு அவர் கேட்டுக்கொண்டார். இதற்குத் தமிழக முதல்வர் சாதகமாகப் பதிலளித்துள்ளார்” என தெரிவிக்கப்பட்டுள்ளது.
