3ஆம் வகுப்பு குழந்தைகளுக்கே ‘AI’ பாடமா? 2026 முதல் அமலாகிறது மத்திய அரசின் ‘டெக்’ புரட்சி!

By Santhosh Raj Saravanan

|

Published on 4 Dec 2025, 9:47 AM

AI subjects for 3rd standard students in India

புதுடெல்லி:

“அ ஆ இ ஈ படித்த காலம் போய், அல்காரிதம் படிக்கும் காலம் வந்துவிட்டது…” என்று சொல்லும் அளவுக்குத் தொழில்நுட்பம் வளர்ந்துவிட்டது. இனி வரும் காலங்களில் கணினியும், செயற்கை நுண்ணறிவும் (Artificial Intelligence – AI) இல்லாமல் எதுவும் இல்லை என்ற சூழலில், இந்தியக் கல்வித்துறையில் ஒரு மிகப்பெரிய மாற்றம் வரப்போகிறது.

ADVERTISEMENT

ஆம், நாடு முழுவதும் உள்ள பள்ளிகளில் 3ஆம் வகுப்பு மாணவர்களுக்கே செயற்கை நுண்ணறிவு (AI) மற்றும் கணக்கீட்டுச் சிந்தனை (Computational Thinking) பாடங்களை அறிமுகப்படுத்த மத்திய கல்வி அமைச்சகம் முடிவு செய்துள்ளது.

எதற்காக இந்த மாற்றம்?

ADVERTISEMENT

இது தொடர்பாகச் சமீபத்தில் மத்தியக் கல்வி அமைச்சகச் செயலாளர் சஞ்சய் குமார் தலைமையில் நடைபெற்ற ஆலோசனைக் கூட்டத்தில், சிபிஎஸ்இ (CBSE), என்சிஇஆர்டி (NCERT) மற்றும் கேந்திரிய வித்யாலயா சங்கதன் (KVS) ஆகிய அமைப்புகளின் பிரதிநிதிகள் கலந்துகொண்டனர்.

அப்போது பேசிய சஞ்சய் குமார், “நம்மைச் சுற்றி இயங்கும் உலகத்தில், AI என்பது இனி ஒரு கூடுதல் திறன் அல்ல; அது ஒரு அடிப்படைக் கல்வித் திறன் (Basic Skill). எனவே, தேசியக் கல்விக் கொள்கையின்படி, மாணவர்கள் எதிர்காலத் தொழில்நுட்பங்களுக்கு ஈடுகொடுக்கும் வகையில் அவர்களைத் தயார்படுத்த வேண்டியது அவசியம்,” என்று குறிப்பிட்டார்.

ADVERTISEMENT

என்ன சொல்லிக்கொடுப்பார்கள்?

“ஐயோ! 3ஆம் வகுப்பு குழந்தைக்குப் போய் கடினமான கோடிங் சொல்லிக்கொடுப்பதா?” என்று பெற்றோர்கள் பதறத் தேவையில்லை.

சென்னை ஐஐடி (IIT Madras) பேராசிரியர் கார்த்திக் ராமன் தலைமையிலான நிபுணர்கள் குழு இதற்கான பாடத்திட்டத்தை வடிவமைக்கும் பணியில் ஈடுபட்டுள்ளது.

மாணவர்களுக்குத் தீவிர சிந்தனை (Critical Thinking), படைப்பாற்றல் (Creativity) மற்றும் AI தொழில்நுட்பத்தைச் சரியான நெறிமுறைகளுடன் (Ethics) எப்படிப் பயன்படுத்துவது என்பது குறித்தே கற்றுக் கொடுக்கப்படும்.

சிக்கல்களுக்குத் தீர்வு காண்பது (Problem Solving) மற்றும் ஆராய்ச்சிக் கண்ணோட்டம் ஆகியவற்றை இளம் வயதிலேயே வளர்ப்பதே இதன் நோக்கம்.

எப்போது அமலுக்கு வருகிறது?

இந்தப் புதிய நடைமுறை வரும் 2026-27ஆம் கல்வியாண்டு முதல் நாடு முழுவதும் அறிமுகப்படுத்தப்படும் என்று கல்வி அமைச்சக அதிகாரிகள் தெரிவித்துள்ளனர். இதற்காகப் பிரத்யேகப் பாடப்புத்தகங்கள், வீடியோக்கள் மற்றும் செயல்முறை விளக்கங்கள் ஆகியவற்றை என்சிஇஆர்டி மற்றும் சிபிஎஸ்இ இணைந்து தயாரிக்கும்.

ஆசிரியர்களுக்குப் பயிற்சி:

மாணவர்களுக்குப் பாடம் எடுப்பதற்கு முன்பாக, ஆசிரியர்களுக்கு இது தொடர்பான சிறப்புப் பயிற்சிகள் வழங்கப்பட உள்ளன.

21ஆம் நூற்றாண்டின் சவால்களை எதிர்கொள்ளும் வகையில், இந்திய மாணவர்களை வருங்காலத்தின் ‘டெக்’ ஜாம்பவான்களாக மாற்றும் இந்த முயற்சி, கல்வியாளர்கள் மத்தியில் பெரும் வரவேற்பைப் பெற்றுள்ளது. இந்தத் திட்டம் முதற்கட்டமாக மத்திய பாடத்திட்டப் (CBSE) பள்ளிகளில் அமல்படுத்தப்படும் என எதிர்பார்க்கப்படுகிறது.

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Santhosh Raj Saravanan

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel