தேனி சிறையில் இருந்து தப்பிச் சென்று சரணடைந்த கைதி மீனாட்சி சுந்தரம், சிறையில் கைதிகள் நடத்தப்பட்ட விதம், தப்பிச் செல்லத் திட்டமிட்டது ஏன் என்பது குறித்து பேசிய பரபரப்பு வீடியோ வெளியாகியுள்ளது.

தேனி மாவட்ட சிறையில் இருந்து கடந்த அக். 26-ந் தேதி இரவு 17 கைதிகள் தப்பிச் சென்றனர். இதையடுத்து காவல்துறையினர் தீவிர தேடுதல் நடவடிக்கையில் ஈடுபட்டு, தப்பிய கைதிகளைப் பிடித்தனர். மீனாட்சி சுந்தரமும் அவரது சகோதரரும் காவல் நிலையத்தில் சரணடைந்தனர்.

இந்த நிலையில், சிறையில் இருந்து தப்பி ஓடிய நிலையில், சரணடைவதற்கு முன்னதாக மீனாட்சி சுந்தரம் பதிவு செய்த வீடியோ தற்போது வெளியாகி சமூக வலைதளங்களில் வைரலாகி வருகிறது.

அந்த வீடியோவில் கைதி மீனாட்சி சுந்தரம் கூறியிருப்பதாவது: நான்தான் தேனி மாவட்டச் சிறையில் இருந்து தப்பிச் சென்ற மீனாட்சி சுந்தரம். நீதிபதி ஐயாவுக்கும் முதலமைச்சர் ஐயாவுக்கும் ஒரு வேண்டுகோள் வைக்கிறேன்.

நாங்கள் சிறையில் இருந்து தப்பிச் சென்றது உண்மைதான். ஆனால், எதற்காகத் தப்பிச் சென்றோம் என்பதை முதலில் தெரிந்துகொள்ள வேண்டும்.

சிறையில் எங்களை மிகவும் மோசமாக நடத்தினார்கள். சாப்பாடு சரியாகக் கொடுக்கவில்லை. எங்களுடைய குறைகளைச் சொன்னாலும் யாரும் கண்டுகொள்ளவில்லை. சிறைக் கண்காணிப்பாளரிடமும் மற்ற அதிகாரிகளிடமும் பலமுறை சொல்லிப் பார்த்தோம். எந்த நடவடிக்கையும் எடுக்கவில்லை.

எங்களைப் பார்க்க வரும் உறவினர்களைக்கூடச் சந்திக்க விடவில்லை. எங்களுடைய பிரச்சினைகளை வெளியே சொல்ல முடியாத நிலை இருந்தது. ஏதாவது கேட்டால் தண்டிப்பதும் மிரட்டுவதுமாக இருந்தார்கள்.

சிறைக்குள்ளேயே இருந்தால் எங்களுடைய உயிருக்கு ஆபத்து ஏற்படும் என்ற பயம் இருந்தது. அதனால்தான் வெளியே வந்து நீதிபதியிடம் எல்லாவற்றையும் சொல்ல வேண்டும் என்று முடிவு செய்தோம்.

நாங்கள் 21 பேரும் சேர்ந்துதான் சிறையில் இருந்து தப்பிச் செல்லத் திட்டமிட்டோம். யாரோ ஒருவர் மட்டும் திட்டமிட்டது கிடையாது. எல்லோரும் சேர்ந்துதான் இந்த முடிவை எடுத்தோம்.

வெளியே வந்து யாருக்கும் தொந்தரவு கொடுக்க வேண்டும் என்ற எண்ணம் எங்களுக்கு இல்லை. காவல்துறையினரையோ பொதுமக்களையோ தாக்க வேண்டும் என்றும் நினைக்கவில்லை. நீதிமன்றத்தில் சரணடைந்து, சிறையில் நடந்தவற்றை நீதிபதியிடம் சொல்ல வேண்டும் என்பதுதான் எங்களுடைய நோக்கம்.

ஆனால், இப்போது என்னைச் சுட்டுப் பிடிக்கப் போவதாகச் சொல்கிறார்கள். எனக்கு உயிர் பயம் இருக்கிறது. நான் சமீபத்தில்தான் திருமணம் செய்திருக்கிறேன். என்னுடைய மனைவி கர்ப்பமாக இருக்கிறார். எனக்கு ஏதாவது நடந்துவிட்டால் என்னுடைய குடும்பம் என்ன ஆகும்?

நான் நீதிபதி முன்னிலையில் சரணடையத் தயாராக இருக்கிறேன். என்னுடைய உயிருக்கு எந்த ஆபத்தும் ஏற்படாமல் பாதுகாப்பு அளிக்க வேண்டும்.

இந்தச் சம்பவத்தில் என்னுடைய தம்பிக்கு எந்தத் தொடர்பும் இல்லை. சிறையில் இருந்து தப்பிச் செல்வதற்கான திட்டத்தில் அவன் சம்பந்தப்படவில்லை. நான் வெளியே வந்த பிறகுதான் அவனுக்குப் போன் செய்தேன்.

அதிகாரிகள் அவனைத் தொடர்புகொண்டபோது, என்னையும் திரும்பி வரச் சொல்லித்தான் அவன் பேசினான். இதைச் சிறையில் உள்ள சிசிடிவி காட்சிகளைப் பார்த்தாலே தெரிந்துகொள்ளலாம். சிறைக் கண்காணிப்பாளருக்கும் உண்மை தெரியும்.

ஆனால், இப்போது எல்லாப் பழியையும் என் மீதும் என் தம்பி மீதும் போட முயற்சி செய்கிறார்கள். மற்ற கைதிகள் எல்லோரும் சேர்ந்து எடுத்த முடிவுக்கு நாங்கள் இருவர் மட்டுமே காரணம் என்பதுபோல சொல்கிறார்கள்.

சிறையில் உள்ள சிசிடிவி காட்சிகளை முழுமையாக ஆய்வு செய்ய வேண்டும். அப்போதுதான் உண்மையில் என்ன நடந்தது என்பது தெரியவரும்.

நாங்கள் செய்தது தவறு என்றால் சட்டப்படி நடவடிக்கை எடுங்கள். அதற்காக எங்களைச் சுட்டுக் கொல்ல வேண்டும் என்று நினைக்காதீர்கள். எங்களுக்கும் குடும்பம் இருக்கிறது. எங்களுக்கும் வாழ வேண்டும் என்ற ஆசை இருக்கிறது. இவ்வாறு கைதி மீனாட்சி சுந்தரம் அந்த வீடியோவில் பேசியிருக்கிறார்.