சிவகாசி என்றாலே பட்டாசு நினைவுக்கு வரும். ஆனால் சாப்பாட்டுப் பிரியர்களுக்கு இந்த ஊர் இன்னொரு விஷயத்துக்கும் பிரபலம். அதுதான் மண்பானை பரோட்டா.
வாழை இலையைப் பானைக்குள் விரித்து, பரோட்டாவையும் காரசாரமான சால்னாவையும் அடுக்கி, அப்படியே பானையிலேயே வேகவைக்கும் இந்தச் சுவை ஹோட்டலுக்குப் போனால்தான் கிடைக்கும் என்று நினைக்க வேண்டாம். வீட்டிலும் செய்யலாம்.
என்னென்ன வேண்டும்?
பெரிதாகப் பொருட்கள் எதுவும் தேவையில்லை:
- பரோட்டா – 3
- சால்னா – 2 கப்
- வேகவைத்த முட்டை – 1
- சிறிய மண்பானை – 1
- வாழை இலை – 1
- பொடியாக நறுக்கிய வெங்காயம் – 1 ஸ்பூன்
- கறிவேப்பிலை, கொத்தமல்லி – சிறிதளவு
- மிளகுத்தூள் – அரை தேக்கரண்டி
பானையைத் தயார் செய்யுங்கள்
முதலில் மண்பானையை நன்றாகக் கழுவிக்கொள்ளுங்கள். அடுப்பில் வைத்து, மிதமான தீயில் மெதுவாகச் சூடாக்குங்கள். தீ அதிகமாக இருந்தால் மண்பானை வெடித்துவிடக் கூடும் என்பதால் அவசரப்படாதீர்கள். வாழை இலையைப் பானையின் அளவுக்கு வெட்டி, நெருப்பில் லேசாக வாட்டிப் பானைக்குள் விரித்துவிடுங்கள். வாட்டினால் இலை வளைந்து கொடுக்கும், மணமும் கூடும்.
அடுக்குவது எப்படி?
பரோட்டாவைச் சின்னச் சின்னத் துண்டுகளாகப் பிய்த்து இலையின் மேல் அடுக்குங்கள். அதன் மேல் சால்னாவை ஊற்றுங்கள். வேகவைத்த முட்டை, வெங்காயம், கொத்தமல்லி, மிளகுத்தூள் எல்லாவற்றையும் சேருங்கள்.
பிறகு மீதமுள்ள பரோட்டாத் துண்டுகளை மறுபடி அடுக்கி, இன்னொரு முறை சால்னாவை ஊற்றுங்கள். வாழை இலையின் ஓரங்களை மடித்து மூடி, பானையை மூடியால் இறுக்க மூடிவிடுங்கள்.
5 முதல் 8 நிமிடம் போதும்
மிதமான தீயில் 5 முதல் 8 நிமிடம் வேகவையுங்கள். பானைக்குள் சால்னா கொதித்து, அதன் காரமும் மணமும் பரோட்டாவுக்குள் இறங்கும்.
சுடச்சுடப் பரிமாறுங்கள்
அடுப்பை அணைத்துவிட்டு சில நிமிடம் அப்படியே விடுங்கள். பிறகு பானையைத் திறந்தால் வாழை இலை மணமும் சால்னா காரமும் சேர்ந்து வீடே மணக்கும். சுடச்சுடப் பரிமாறி, இது தனியாகவே சாப்பிடலாம்.
சாதாரண பரோட்டாவை ஸ்பெஷலாக மாற்றும் இந்த சிவகாசி ஸ்டைலை ஒருமுறை வீட்டில் முயற்சி செய்து பாருங்கள்.
