தமிழகத்தில் கோடை விடுமுறை முடிந்து வரும் ஜூன் 1ம் தேதி திட்டமிட்டபடி பள்ளிகள் திறக்கப்படும். திட்டமிட்டபடி நாளை மறுநாள் 10ம் வகுப்பு தேர்வு முடிவுகள் வெளியாகும் என அமைச்சர் ராஜ்மோகன் அறிவித்துள்ளார்.
சென்னை தலைமைச் செயலகத்தில் அதிகாரிகளுடனான சந்திப்புக்குப் பின்னர் அமைச்சர் ராஜ்மோகன் செய்தியாளர்களிடம் பேசினார்.
கோடை விடுமுறை முடிந்து, 1 முதல் 3-ம் வகுப்பு வரை பயிலும் மாணவர்களுக்கு ஜூன் 4-ம் தேதி பள்ளிகள் திறக்கப்படும். 4 முதல் 12-ம் வகுப்பு வரை பயிலும் மாணவர்களுக்கு ஜூன் 1-ம் தேதி பள்ளிகள் திறக்கப்படும்.
ஏற்கெனவே திட்டமிட்டபடி வரும் மே 20-ம் தேதி பத்தாம் வகுப்பு பொதுத்தேர்வு முடிவுகள் வெளியாகும். வரும் கல்வியாண்டில் 1 முதல் 3-ம் வகுப்பு வரை புதிய பாடத்திட்டம் அறிமுகப்படுத்தப்பட உள்ளது.
ஜூன் 1 முதல் புதிய பாடத்திட்டம் தொடர்பாக தொடக்கப்பள்ளி ஆசிரியர்களுக்கு பயிற்சி அளிக்கப்படும் என்று தெரிவித்தார்.
மேலும், புதிய பாடத்திட்டத்தின்படி வடிவமைக்கப்பட்ட புத்தகங்களை அமைச்சர் ராஜ்மோகன் வெளியிட்டார்.









