புத்தாண்டு என்றாலே ஹோட்டல்களில் ஆயிரக்கணக்கில் பணம் செலவழித்து, டிராஃபிக்கில் சிக்கி, கூட்ட நெரிசலில் அவதிப்பட வேண்டுமா என்ன? “ஊரோட சேர்ந்து கொண்டாடுனாதான் கெத்து” என்று நினைத்து, ஒரே இரவில் ஒரு மாதச் சம்பளத்தை காலி செய்பவரா நீங்கள்?
இந்த வருடம் கொஞ்சம் ஸ்மார்ட்டாக யோசிப்போம். பொருளாதார மந்தநிலை, விலைவாசி உயர்வு எனப் பல பிரச்சனைகள் இருக்கும்போது, பணத்தைக் கரியாக்குவதை விட, குறைந்த செலவில் நிறைந்த மகிழ்ச்சியுடன் கொண்டாடுவதுதான் புத்திசாலித்தனம்.
இதோ, பட்ஜெட் ஃப்ரெண்ட்லி ‘ஹவுஸ் பார்ட்டி’ (House Party) டிப்ஸ்:
1. அலங்காரம் நம்ம கையில்: பார்ட்டி ஃபீல் வர வேண்டும் என்றால், முதலில் லைட்டிங் முக்கியம். இதற்காகக் கடையில் சென்று காஸ்ட்லியான விளக்குகளை வாங்க வேண்டாம். தீபாவளி அல்லது கார்த்திகை தீபத்திற்குப் பயன்படுத்திய ‘சீரியல் லைட்டுகள்’ (Serial Lights) நிச்சயம் வீட்டில் இருக்கும். அதைத் தூசு தட்டி எடுங்கள். ஹால் அறையின் பிரதான டியூப் லைட்டை அணைத்துவிட்டு, இந்த சீரியல் லைட்டுகளைச் சுற்றிவிட்டால் போதும்; ஒரு மாயாஜால உலகம் உருவாகிவிடும். பழைய வண்ணப் புடவைகள் அல்லது துப்பட்டாக்களைத் திரைச்சீலைகளாக மாற்றினால் கூடுதல் அழகு!
2. இசை மழை: டிஜே (DJ) எதற்கு? உங்களிடம் இருக்கும் ஒரு நல்ல ப்ளூடூத் ஸ்பீக்கரே போதும். யூடியூப் அல்லது ஸ்பாட்டிஃபை-ல் “New Year Party Hits 2026″ என்று தேடினால் நூற்றுக்கணக்கான பிளேலிஸ்ட்கள் வரும். இளையராஜா மெலடி முதல் அனிருத் குத்துப்பாட்டு வரை கலந்து கட்டி ஒரு பிளேலிஸ்ட் ரெடி பண்ணுங்கள். பாஸ் (Bass) அதிரும் இசையில் வீடே கலகலக்கும்.
3. சாப்பாடு – ஒரு ஸ்மார்ட் ஐடியா: ஹோட்டலில் ஆர்டர் செய்தால் டெலிவரி சார்ஜ், சர்வீஸ் சார்ஜ் என்று பில் எகிறிவிடும். அதற்குப் பதில், ‘பாட்லக்’ (Potluck) முறையைக் கையில் எடுங்கள். பார்ட்டிக்கு வரும் நண்பர்கள் ஆளுக்கொரு டிஷ் செய்து கொண்டு வரச் சொல்லலாம். அல்லது, மொத்தமாகச் சேர்ந்து ஒரு பிரியாணியை வீட்டிலேயே தம் போடலாம். ஸ்டார்ட்டர்ஸுக்கு சிப்ஸ், வேர்க்கடலை, மிக்சர் போன்ற பாக்கெட் ஐட்டங்களே போதுமானது.
4. போட்டோ பூத் (DIY Photo Booth): இன்ஸ்டாகிராமில் ஸ்டோரி போட போட்டோ முக்கியம். வீட்டின் ஒரு மூலையில் கருப்புத் துணியைக் கட்டி, அதில் “Happy New Year 2026” என்று சார்ட் பேப்பரில் எழுதி ஒட்டுங்கள். பலூன்கள், கூலிங் கிளாஸ் போன்றவற்றை வைத்துக்கொண்டு விதவிதமாகப் போட்டோ எடுங்கள். இது செலவில்லாத சந்தோஷம்.
5. டிரஸ் கோட்: வீட்டு பார்ட்டிதானே என்று நைட்டியில் இருக்க வேண்டாம். எல்லோரும் “பிளாக் அண்ட் ஒயிட்” அல்லது “ரெட்ரோ தீம்” (Retro Theme) என ஏதாவது ஒரு தீம் வைத்து உடையணிந்தால் கொண்டாட்டம் களைகட்டும்.
மகிழ்ச்சி என்பது நாம் செலவு செய்யும் பணத்தில் இல்லை; நாம் யாருடன் இருக்கிறோம் என்பதில்தான் இருக்கிறது. பாதுகாப்பான, சிக்கனமான இந்த ஹவுஸ் பார்ட்டி, உங்கள் புத்தாண்டைச் சிறப்பாக்கும்!