நிறுவனங்களே சம்பளத்தை ஏத்துங்க! அப்பதான் மக்கள் செலவழிப்பா இருப்பாங்க : மத்தியப் பொருளாதாரச் செயலாளர் அனுராதா தாக்கூர்

By Minnambalam Desk

|

Published on 21 Nov 2026, 8:01 AM

தனியார் நிறுவனங்கள் தங்கள் ஊழியர்களுக்குச் சம்பளத்தை உயர்த்த வேண்டும் என்று மத்தியப் பொருளாதார விவகாரங்கள் துறைச் செயலாளர் அனுராதா தாக்கூர் கேட்டுக்கொண்டுள்ளார். ஊழியர்களின் கையில் பணம் புழங்கினால்தான் மக்களின் வாங்கும் சக்தி கூடி, பொருளாதார வளர்ச்சியும் வேகமெடுக்கும் என்பது அவரது கருத்து.

சம்பளம் உயர்ந்தால் சந்தை வளருமா?

ADVERTISEMENT

டெல்லியில் நடந்த இந்தியத் தொழில் வர்த்தகக் கூட்டமைப்பின் (FICCI) ஆண்டுப் பொதுக்குழுக் கூட்டத்திலும் மாநாட்டிலும் பேசிய அவர், இந்திய நிறுவனங்களில் சம்பளம் நீண்ட காலமாகப் பெரிதாக ஏறாமல் தேங்கியிருப்பது குறித்துக் கவலை தெரிவித்தார். இது பொருளாதாரத்தையும் பாதிக்கும் என்பதால் நிறுவனங்கள் இதைக் கவனத்தில் கொள்ள வேண்டும் என்றார்.

ஊழியர்களுக்கு அதிகச் சம்பளம் கிடைத்தால் செலவு செய்யும் திறனும் கூடும். அதனால் பொருட்களுக்கும் சேவைகளுக்குமான தேவை உயரும். சந்தையில் தேவை கூடினால் அது மறுபடி நிறுவனங்களுக்கே வளர்ச்சியாகத் திரும்பிவரும் என்றும் அவர் சுட்டிக்காட்டினார்.

ADVERTISEMENT

ஏப்ரல் முதல் தனியார் முதலீடு மறுபடி ஏறுமுகம்

கடந்த ஏப்ரல் மாதம் முதல் இந்தியாவில் தனியார் முதலீடுகள் மீண்டும் வளர்ச்சிப் பாதைக்குத் திரும்பியுள்ளதாக அனுராதா தாக்கூர் சொன்னார். தொடக்கத்தில் சில துறைகளில் மட்டுமே முதலீடு கூடியது. இப்போது பல துறைகளிலும் அந்த முன்னேற்றம் தெரிவதாகவும் குறிப்பிட்டார்.

ADVERTISEMENT

நீண்டகாலக் கடனுக்குப் புதிய நிதி நிறுவனம்?

உற்பத்தித் துறை, செமிகண்டக்டர், முக்கியக் கனிமத் தொழில்கள் ஆகியவற்றுக்கு நீண்டகாலக் கடன் வசதி தேவை என்று தொழில் நிறுவனங்கள் கேட்டுள்ளன. இதற்காகப் புதிய வளர்ச்சி நிதி நிறுவனம் ஒன்றை உருவாக்கும் கோரிக்கையை அரசு பரிசீலிக்கும் என்று அவர் கூறினார்.

சாலை உள்ளிட்ட உள்கட்டமைப்புத் திட்டங்களில் தனியாரின் பங்களிப்பைக் கூட்ட, பொதுத்துறை – தனியார் கூட்டுறவு (PPP) முறையை மறுபடி வலுப்படுத்த வேண்டும் என்றும் அவர் வலியுறுத்தினார்.

கச்சா எண்ணெய் விலை இறக்கம் ஆறுதல்

மேற்கு ஆசியப் பதற்றம், உலகப் பொருளாதார நெருக்கடிகள் இருந்தாலும், கச்சா எண்ணெய் விலை குறைந்திருப்பது இந்திய நிறுவனங்களுக்கு நிம்மதி தருவதாக அவர் சொன்னார். நாட்டின் பொருளாதார வளர்ச்சியைத் தக்கவைக்க அரசும் தொழில் நிறுவனங்களும் சேர்ந்து செயல்பட வேண்டும் என்றும் அவர் கேட்டுக்கொண்டார்.

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Minnambalam Desk

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel