சர்க்கரை நோய் இப்போது இளம் வயதினரையும் விட்டுவைப்பதில்லை. அதனால் பலரும் அவ்வப்போது ரத்தச் சர்க்கரையைப் பரிசோதித்துக்கொள்கிறார்கள். பொதுவாக மருத்துவர்கள் எழுதித் தரும் இரண்டு முக்கியப் பரிசோதனைகள் HbA1c, Fasting Blood Sugar (வெறும் வயிற்றில் ரத்தச் சர்க்கரை). இரண்டும் ஒரே விஷயத்தை அளக்கவில்லை. ஒன்று குறிப்பிட்ட நேரத்தில் உங்கள் சர்க்கரை எவ்வளவு என்று காட்டும். இன்னொன்று கடந்த சில மாதங்களின் சராசரியைக் காட்டும்.
Fasting Blood Sugar (FBS) என்றால்?
குறைந்தது 8 மணி நேரம் எதுவும் சாப்பிடாமல் இருந்த பிறகு எடுக்கப்படும் ரத்தப் பரிசோதனை இது. பெரும்பாலும் காலையில் செய்வார்கள்.
அந்தக் குறிப்பிட்ட நேரத்தில் ரத்தத்தில் குளுக்கோஸ் எவ்வளவு இருக்கிறது என்று இதில் தெரியும். இரவு முழுக்கச் சாப்பிடாமல் இருந்த பிறகு, உடல் சர்க்கரையை எப்படிக் கட்டுப்படுத்துகிறது என்பதையும் இதன் மூலம் மதிப்பிடலாம்.
HbA1c எதற்கு?
கடந்த 2 முதல் 3 மாதங்களில் ரத்தச் சர்க்கரையின் சராசரி எப்படி இருந்தது என்பதை HbA1c சொல்கிறது. ரத்தச் சிவப்பணுக்களில் உள்ள ஹீமோகுளோபினோடு சர்க்கரை இணைவதை வைத்துத்தான் இது அளக்கப்படுகிறது.
இதற்கு வெறும் வயிற்றில் வர வேண்டிய அவசியமில்லை. நேற்று இனிப்பு சாப்பிட்டதால் மட்டும் இதன் முடிவு பெரிதாக மாறிவிடாது.
எந்த அளவு இருந்தால் சர்க்கரை நோய்?
| பரிசோதனை | இயல்பான அளவு | முன் சர்க்கரை நோய் | சர்க்கரை நோய் |
| Fasting Sugar (mg/dL) | 100-க்குக் கீழ் | 100–125 | 126 அல்லது அதற்கு மேல் |
| HbA1c | 5.7%-க்குக் கீழ் | 5.7–6.4% | 6.5% அல்லது அதற்கு மேல் |
இந்த அளவுகள் கர்ப்பிணி அல்லாதவர்களுக்கான பொதுவான நோயறிதல் வழிகாட்டுதல்கள். கர்ப்பிணிகளுக்கு வேறு அளவுகோல் பொருந்தும்.
எதைச் செய்துகொள்வது?
இரண்டும் வெவ்வேறு தகவல்களைத் தருவதால், ஒன்றைமட்டும் ‘சிறந்தது’ என்று சொல்ல முடியாது. இப்போதைய சர்க்கரை அளவை அறிய Fasting Sugar உதவும். நீண்ட காலக் கட்டுப்பாடு எப்படி இருக்கிறது என்று பார்க்க HbA1c உதவும்.
சிலருக்கு இரண்டு பரிசோதனை முடிவுகளும் வேறுபடலாம். ரத்தசோகை போன்ற சில உடல்நலப் பிரச்சினைகள் HbA1c முடிவைப் பாதிக்கக்கூடும். அதனால் முடிவுகளை மருத்துவரிடம் காட்டி, தேவைப்பட்டால் மறுபடி பரிசோதனை செய்து உறுதிசெய்துகொள்ளுங்கள்.
