வங்கக் கடலில் உருவான தீவிரப் புயலான முரசு, இன்று (நவம்பர் 3) அதிகாலை ஆந்திர மாநிலம் ஓங்கோல் அருகே கரையைக் கடந்தது. அப்போது மணிக்கு 100 முதல் 110 கிலோ மீட்டர் வேகத்தில் பலத்த காற்று வீசியது. இடையிடையே காற்றின் வேகம் 120 கிலோ மீட்டர் வரை அதிகரித்ததாக இந்திய வானிலை ஆய்வு மையம் தெரிவித்துள்ளது.

மத்திய மேற்கு வங்கக் கடலில், தெற்கு ஆந்திரக் கடற்கரைக்கு அருகே நிலைகொண்டிருந்த முரசு புயல், கடந்த 6 மணி நேரத்தில் மணிக்கு 8 கிலோ மீட்டர் வேகத்தில் வடக்கு – வடமேற்கு திசையில் நகர்ந்தது.

இதையடுத்து இன்று அதிகாலை 3.30 மணி முதல் 5.30 மணிக்குள், ஆந்திராவின் நெல்லூர் – நரசாபுரம் இடையே ஓங்கோல் அருகே புயல் கரையைக் கடந்தது. கரையைக் கடந்தபோது மணிக்கு 100 முதல் 110 கிலோ மீட்டர் வேகத்தில் சூறைக்காற்று வீசியது. அதிகபட்சமாக மணிக்கு 120 கிலோ மீட்டர் வேகத்தில் காற்று வீசியது. காலை 5.30 மணி நிலவரப்படி, முரசு புயல் தெற்கு ஆந்திரக் கடலோரப் பகுதியில் ஓங்கோல் அருகே மையம் கொண்டிருந்தது.

அப்போது புயலின் மையப்பகுதி பாபட்லாவிலிருந்து தென்மேற்கே 40 கிலோ மீட்டர் தொலைவிலும், காவலியிலிருந்து வடக்கு – வடகிழக்கே 80 கிலோ மீட்டர் தொலைவிலும் இருந்தது. மேலும், மச்சிலிப்பட்டினத்திலிருந்து மேற்கு – தென்மேற்கே 120 கிலோ மீட்டர் தொலைவிலும், நெல்லூரிலிருந்து வடக்கே 130 கிலோ மீட்டர் தொலைவிலும் நிலைகொண்டிருந்தது.

இன்று நண்பகலுக்குள் புயல் வலுவிழக்கும்

கரையைக் கடந்த முரசு புயல் தொடர்ந்து வடக்கு – வடமேற்கு திசையில் நகர்ந்து படிப்படியாக வலுவிழக்கும் என்று இந்திய வானிலை ஆய்வு மையம் தெரிவித்துள்ளது. அதன்படி, இன்று நண்பகலுக்குள் தீவிரப் புயலிலிருந்து புயலாக வலுவிழக்கும். அப்போது மணிக்கு 80 முதல் 90 கிலோ மீட்டர் வேகத்தில் காற்று வீசக்கூடும். அதிகபட்சமாக 100 கிலோ மீட்டர் வேகத்தை எட்டக்கூடும்.

இன்று நள்ளிரவுக்குள் மேலும் வலுவிழந்து ஆழ்ந்த காற்றழுத்தத் தாழ்வு மண்டலமாக மாறும் என்று கணிக்கப்பட்டுள்ளது. அப்போது காற்றின் வேகம் மணிக்கு 55 முதல் 65 கிலோ மீட்டராகவும், அதிகபட்சமாக 75 கிலோ மீட்டராகவும் இருக்கும். முரசு புயலின் நகர்வை மச்சிலிப்பட்டினம் மற்றும் விசாகப்பட்டினத்தில் உள்ள டாப்ளர் வானிலை ரேடார்கள் மூலம் இந்திய வானிலை ஆய்வு மையம் தொடர்ந்து கண்காணித்து வருகிறது.