சென்னை வானகரம் அருகே முன் விரோதம் காரணமாக 12ம் வகுப்பு மாணவர் அரிவாளால் வெட்டப்பட்ட சம்பவம் பெரும் பதற்றத்தை ஏற்படுத்தி உள்ளது.
சென்னை வானகரம் பகுதியைச் சேர்ந்தவர் அபிஷேக். இவர் போரூர் அருகே உள்ள தனியார் பள்ளி ஒன்றில் பன்னிரண்டாம் வகுப்பு படித்து வருகிறார். இவருக்கும், இவரது நண்பரான 21 வயதுடைய ஷியாம் என்பவருக்கும் இடையே நேற்று இரவு இருசக்கர வாகனத்தின் சாவியைப் பிடுங்குவது தொடர்பாக வாக்குவாதம் ஏற்பட்டுள்ளது.
வாக்குவாதம் முற்றியதில் இருவருக்கும் இடையே கைகலப்பு ஏற்பட்டுள்ளது. இதனால் ஆத்திரமடைந்த ஷியாம், முன்விரோதம் காரணமாக இன்று மாணவர் அபிஷேக்கை அரிவாளால் வெட்டியுள்ளார்.
இந்தத் தாக்குதலில் பலத்த காயமடைந்த அபிஷேக், உடனடியாக வானகரம் காவல் நிலையத்திற்குச் சென்று நடந்த சம்பவம் குறித்துப் தகவல் அளித்தார். ரத்தக் காயங்களுடன் இருந்த மாணவரை மீட்ட காவல்துறையினர், சிகிச்சைக்காக மருத்துவமனைக்கு அனுப்பி வைத்தனர்.
மேலும், இச்சம்பவம் குறித்து வழக்குப் பதிவு செய்துள்ள வானகரம் காவல்துறையினர், தலைமறைவாக உள்ள ஷியாமைத் தீவிரமாகத் தேடி வருகின்றனர்.
