வங்கக்கடலில் புதிய காற்றழுத்த தாழ்வு பகுதி உருவாகியுள்ளது என இந்திய வானிலை ஆய்வு மையம் தெரிவித்துள்ளது.
தென்கிழக்கு வங்கக்கடலில் இன்று அதிகாலை 5:30 மணியளவில் இந்தப் புதிய காற்றழுத்த தாழ்வு பகுதி உருவாகியுள்ளது. இது வடமேற்கு திசையில் நகர்ந்து, நாளை ஆழ்ந்த காற்றழுத்த தாழ்வு பகுதியாக வலுப்பெறும். நாளை மறுநாள் காற்றழுத்த தாழ்வு மண்டலமாக மாறவும் வாய்ப்புள்ளது.
இதன் காரணமாக, 13 மற்றும் 14 ஆகிய தேதிகளில் தென்கிழக்கு மற்றும் தென்மேற்கு வங்கக்கடல் பகுதிகளில் மணிக்கு 60 கிலோமீட்டர் வேகத்தில் சூறைக்காற்று வீசக்கூடும் என எச்சரிக்கை விடுக்கப்பட்டுள்ளது.
இந்தக் காற்றழுத்த தாழ்வு மண்டலம் வலுவடையும் பட்சத்தில், நவம்பர் 15 முதல் 17 வரை தென்மேற்கு வங்கக்கடல் பகுதிகளிலும், நவம்பர் 16, 17 ஆகிய தேதிகளில் மத்திய வங்கக்கடல் பகுதிகளிலும் காற்றின் வேகம் மேலும் அதிகரித்து மணிக்கு 45 முதல் 55 கிலோமீட்டர் வேகத்திலும், இடையிடையே 65 கிலோமீட்டர் வேகம் வரையிலும் பலத்த சூறைக்காற்று வீசக்கூடும் எனத் தெரிவிக்கப்பட்டுள்ளது.
இதனால், குறிப்பிட்ட நாட்களில் மீனவர்கள் ஆழ்கடல் பகுதிகளுக்கு மீன் பிடிக்கச் செல்ல வேண்டாம் என்று அறிவுறுத்தப்பட்டுள்ளது.
தென்கிழக்கு வங்கக்கடலில் இன்று காலை உருவாகியுள்ள இந்தப் புதிய காற்றழுத்த தாழ்வு பகுதி புயலாக மாறும் பட்சத்தில், ஈரான் பரிந்துரைத்த ‘அக்வான்’ எனப் பெயரிடப்படும். ‘அக்வான்’ என்பது பாரசீக மொழியில் ‘தீய எண்ணம்’ என்று பொருள்படும். இது பாரசீக மொழியிலிருந்து வந்த ஒரு புராணப் பெயராகும்; ஈரானிய இதிகாசமான ‘ஷாநாமா’-வில் (Shahnameh) இடம்பெற்ற ஒரு மாயாஜால அரக்கனின் பெயரே அக்வான்.
