‘கே.ஜி.எஃப்’ திரைப்படங்களின் பிரம்மாண்ட வெற்றிக்குப் பிறகு, பான்-இந்தியா ஸ்டாராக உலகளவில் புகழ்பெற்ற கன்னட நடிகர் யாஷ் (Yash) நடிப்பில் அடுத்ததாக உருவாகி வரும் திரைப்படம் ‘டாக்ஸிக்’ (Toxic). பிரபல இயக்குநர் கீது மோகன்தாஸ் இயக்கத்தில், கேவிஎன் புரோடக்ஷன்ஸ் (KVN Productions) நிறுவனம் தயாரிக்கும் இத்திரைப்படம் மிகப்பெரிய கேங்ஸ்டர் டிராமாவாக உருவாகி வருகிறது. ரசிகர்களிடையே பலத்த எதிர்பார்ப்பை ஏற்படுத்தியுள்ள இத்திரைப்படத்தின் புதிய ரிலீஸ் தேதியை படக்குழு தற்போது அதிகாரப்பூர்வமாக அறிவித்துள்ளது.
Toxic மாபியா பின்னணியில் பிரம்மாண்ட ஆக்ஷன்
‘டாக்ஸிக்’ திரைப்படம் 1940 முதல் 1970 வரையிலான காலகட்டத்தில், கோவாவில் நிலவிய மிகப்பெரிய போதைப்பொருள் கடத்தல் மற்றும் மாபியா கும்பல்களின் மோதலை மையமாகக் கொண்ட ஆக்ஷன் த்ரில்லர் கதையாக வடிவமைக்கப்பட்டுள்ளது. யாஷின் மிரட்டலான தோற்றத்தில் உருவாகும் இப்படத்தில் நயன்தாரா, கியாரா அத்வானி, ருக்மணி வசந்த், ஹுமா குரேஷி மற்றும் தாரா சுதாரியா உள்ளிட்ட இந்திய திரையுலகின் முன்னணி நட்சத்திரங்கள் முக்கிய கதாபாத்திரங்களில் நடித்துள்ளனர். விஷால் மிஷ்ரா இப்படத்திற்கு இசையமைக்கிறார்.
ரிலீஸ் தேதி மாற்றத்திற்கான காரணங்கள்
இப்படம் முன்னதாக மார்ச் 19-ஆம் தேதியும், பின்னர் சர்வதேச அளவில் நிலவி வரும் போர் பதற்றங்கள் காரணமாக உலகளாவிய பார்வையாளர்களைச் சரியாகச் சென்றடைய வேண்டும் என்ற உத்தியோகப்பூர்வ காரணத்தினால் ஜூன் 4-ஆம் தேதியும் வெளியாகும் என்று அறிவிக்கப்பட்டிருந்தது. தொழில்நுட்பக் காரணங்களால் ஜூன் ரிலீஸும் தள்ளிப்போன நிலையில், அண்மையில் வெளியான இப்படத்தின் அதிரடி டீசர் ரசிகர்கள் மத்தியில் வைரலானதோடு, சில ஆபாசக் காட்சிகள் இடம்பெற்றதாகக் கூறி கடும் விவாதங்களையும் விமர்சனங்களையும் சந்தித்தது குறிப்பிடத்தக்கது.
ஆகஸ்ட் 26-ல் உலகளாவிய ரிலீஸ்
அனைத்து சர்ச்சைகளுக்கும் முற்றுப்புள்ளி வைக்கும் விதமாக, ‘டாக்ஸிக்’ திரைப்படம் வருகிற ஆகஸ்ட் 26, 2026 அன்று உலகம் முழுவதும் உள்ள திரையரங்குகளில் ஆங்கிலம் மற்றும் அனைத்து முக்கிய இந்திய மொழிகளிலும் பிரம்மாண்டமாக வெளியாகும் என தயாரிப்பு நிறுவனமான கேவிஎன் புரோடக்ஷன்ஸ் அதிகாரப்பூர்வமாக அறிவித்துள்ளது. யாஷின் மாஸ் ஆக்ஷன் அவதாரத்தைக் காண இப்போதே ஒட்டுமொத்த இந்திய சினிமா ரசிகர்களும் மிகுந்த ஆவலுடன் காத்துக்கொண்டிருக்கின்றனர்.










