டாடா குழுமத்தின் நிர்வாகம், எதிர்காலம் தொடர்பான கருத்து வேறுபாடுகள் இப்போது வெளிப்படையான மோதலாக மாறிவிட்டன. டாடா டிரஸ்ட்ஸின் துணைத் தலைவர்களான விஜய் சிங், வேணு சீனிவாசன் ஆகிய இருவரும், அறங்காவலர் பொறுப்பிலிருந்து விலகிய டேரியஸ் கம்பாட்டா முன்வைத்த குற்றச்சாட்டுகளுக்கு விரிவான பதில் அளித்துள்ளனர். நவம்பர் 11 அன்று அனுப்பப்பட்ட ஐந்து பக்கக் கடிதத்தில், கம்பாட்டாவின் விமர்சனங்கள் பல முக்கிய உண்மைகளை முழுமையாகச் சொல்லவில்லை என்று அவர்கள் குறிப்பிட்டுள்ளனர்.
குறிப்பு: இவை அனைத்தும் இரு தரப்பும் கடிதங்களில் சொன்னதாகச் சொல்லப்படுபவை. எந்தத் தரப்பின் வாதமும் இறுதி முடிவாகிவிடவில்லை.
கம்பாட்டா என்ன கேட்டார்?
டாடா டிரஸ்ட்ஸ் தலைவர் நோயல் டாடாவுக்கு நவம்பர் 2 அன்று எழுதிய கடிதத்தில், டேரியஸ் கம்பாட்டா பல நிர்வாகக் குறைபாடுகளைச் சுட்டிக்காட்டியிருந்தார். குறிப்பாக, ரிசர்வ் வங்கியோடு டாடா சன்ஸ் நடத்திய பேச்சுவார்த்தைகள், நிறுவனத்தைப் பங்குச்சந்தையில் பட்டியலிடும் திட்டம், அறங்காவலர்களின் சுதந்திரம் ஆகியவை பற்றி அவர் கேள்விகள் எழுப்பினார்.
அதற்குப் பதில் சொன்ன விஜய் சிங், கம்பாட்டாவின் உண்மையான கவலை டாடா நிறுவனத்தின் பாரம்பரியத்தைக் காப்பதா, இல்லை டிரஸ்ட்ஸின் இப்போதைய தலைமையின் அதிகாரத்தைத் தக்கவைப்பதா என்று கேள்வி எழுப்பியுள்ளார்.
ரிசர்வ் வங்கி விவகாரத்தில் நடந்தது என்ன?
டாடா சன்ஸின் ஒழுங்குமுறை நிலை தொடர்பாக 2023 முதலே ரிசர்வ் வங்கியோடு பேச்சுவார்த்தை நடந்ததாக விஜய் சிங் சொல்கிறார். அதன் தொடர்ச்சியாகக் கடன்கள் திருப்பிச் செலுத்தப்பட்டு, 2024 மார்ச்சில் பதிவு நீக்கக் கோரிக்கையும் சமர்ப்பிக்கப்பட்டது.
ஆனால், இரண்டு ஆண்டுகள் ஆய்வு செய்த பிறகு, டாடா சன்ஸ் தொடர்ந்து முக்கிய வங்கி சாரா நிதி நிறுவனமாக (NBFC) இருப்பதாகவும், பங்குச்சந்தைப் பட்டியலிடல் விதிகளுக்கு உட்பட்டது என்றும் ரிசர்வ் வங்கி தெரிவித்ததாகக் கடிதம் கூறுகிறது.
பட்டியலிட்டால் அடையாளம் போய்விடுமா?
டாடா சன்ஸைப் பங்குச்சந்தையில் பட்டியலிட்டால் அதன் அடிப்படை அடையாளமே பாதிக்கப்படும் என்ற கம்பாட்டாவின் கருத்தை இருவரும் ஏற்கவில்லை.
- டிசிஎஸ், டாடா ஸ்டீல், டாடா பவர், டாடா மோட்டார்ஸ் போன்றவை பங்குச்சந்தையில் இருந்தும் நீண்டகால முதலீடுகளையும் முக்கியத் திட்டங்களையும் வெற்றிகரமாகச் செய்துள்ளன என்பது அவர்களின் வாதம்.
- டாடா டிரஸ்ட்ஸ் தொடர்ந்து பங்குதாரர்களாகவே இருக்கும் என்பதால், அதன் ஈவுத்தொகை வருவாயும் சமூக நலப் பணிகளும் பாதிக்கப்படாது என்றும் அவர்கள் சொல்கின்றனர்.
அறங்காவலர்களின் பொறுப்பு பற்றி
டாடா – மிஸ்திரி வழக்கில் உச்ச நீதிமன்றம் கொடுத்த தீர்ப்பை கம்பாட்டா தவறாகப் புரிந்துகொண்டுள்ளார் என்று விஜய் சிங் கூறுகிறார். டிரஸ்ட்ஸ் சார்பில் நியமிக்கப்படும் இயக்குநர்கள், நிறுவனத்தின் நலனைக் கருத்தில் கொள்ளாமல் டிரஸ்ட்ஸின் முடிவுகளுக்கு மட்டுமே கட்டுப்பட்டு வாக்களிக்க வேண்டிய அவசியம் இல்லை என்பதுதான் அவர்களின் வாதம்.
இதனால் டாடா குழுமத்தில் அதிகாரப் பகிர்வு, நிர்வாகச் சுதந்திரம், எதிர்காலத் தலைமை குறித்த விவாதம் மேலும் சூடுபிடித்துள்ளது.










