வீட்டில் இருப்பது முதல் அலுவலகம், பயணம், விளையாட்டு என இன்று எல்லா இடங்களிலும் இயல்பாக அணியும் ஆடையாகிவிட்டது டி-ஷர்ட் (T-Shirt). குழந்தைகள் முதல் பெரியவர்கள் வரை பயன்படுத்தும் இந்த எளிமையான ஆடைக்கு ‘T-Shirt’ என்ற பெயர் எப்படி வந்தது தெரியுமா? அதற்குப் பின்னால் நூறு ஆண்டுகளைக் கடந்த சுவாரஸ்யமான வரலாறு இருக்கிறது.
முதலில் உள்ளாடையாகத்தான் இருந்தது!
19ஆம் நூற்றாண்டில் பயன்படுத்தப்பட்ட முழு உடல் உள்ளாடைகளை மேல், கீழ் என இரண்டாகப் பிரித்து அணியும் பழக்கம் உருவானது. அதன் மேல்பகுதியில் காலர், பட்டன் போன்றவை இல்லாமல் தலை வழியாக எளிதாக அணியும் வகையில் அது வடிவமைக்கப்பட்டிருந்தது. காலப்போக்கில் தொழிலாளர்களும் இதுபோன்ற ஆடைகளைப் பயன்படுத்தத் தொடங்கினர்.
1913ஆம் ஆண்டில் அமெரிக்க கடற்படை, வெள்ளை நிறப் பருத்தியால் தயாரிக்கப்பட்ட குட்டைக் கைச் சட்டைகளைச் சீருடைக்கு அடியில் அணியும் உள்ளாடையாக வழங்கத் தொடங்கியது. வெப்பமான சூழலில் பணிபுரியும்போது அணிவதற்கு வசதியாக இருந்ததால் மாலுமிகள் மத்தியிலும் இது பயன்பாட்டுக்கு வந்தது.
‘T’ என்ற எழுத்து வந்தது எப்படி?
ஒரு டி-ஷர்ட்டைத் தட்டையாக விரித்து வைத்துப் பார்த்தால் அதன் உடல் பகுதியும், இருபுறக் கைகளும் சேர்ந்து ஆங்கில எழுத்தான ‘T’ வடிவத்தை உருவாக்கும். இந்த வடிவமே அதன் பெயருக்கான எளிய விளக்கமாகக் கூறப்படுகிறது. ‘T-shirt’ என்ற சொல் 1920களில் அமெரிக்க ஆங்கிலப் பயன்பாட்டில் இடம்பெறத் தொடங்கியது.
உள்ளாடை எப்படி ஃபேஷனானது?
இரண்டாம் உலகப் போருக்குப் பிறகு டி-ஷர்ட் உள்ளாடை என்ற அடையாளத்திலிருந்து மெதுவாக வெளியே வந்தது. ராணுவ வீரர்கள் சாதாரண உடையாக அணியத் தொடங்கியதும் அதன் பயன்பாடு விரிவடைந்தது.
1950களில் மார்லன் பிராண்டோ போன்ற ஹாலிவுட் நடிகர்கள் திரையில் டி-ஷர்ட் அணிந்து தோன்றியது அதன் பிரபலத்தை மேலும் உயர்த்தியது. பின்னர் வண்ணங்கள், அச்சிடப்பட்ட வாசகங்கள், பல்வேறு டிசைன்கள் என மாறி, இன்று உலகம் முழுவதும் தவிர்க்க முடியாத அன்றாட ஆடைகளில் ஒன்றாக டி-ஷர்ட் மாறியுள்ளது.
