விசிக தந்தை பெரியாரையும் புரட்சியாளர் அம்பேத்கரையும் ஏற்றுக்கொண்டவர்களைத்தான் ஏற்கும்; பார்ப்பனிய அடிமைகளை ஏற்காது என அமைச்சர் வன்னி அரசு தெரிவித்துள்ளார்.
தாராபுரத்தில் கடந்த 4-ஆம் தேதி முதல்வர் விஜயின் ரோட்டு நிகழ்ச்சியின் போது, நாம் தமிழர் கட்சியின் வேட்பாளர் கார்த்திகா உள்ளிட்டோர் சாலை மறியலில் ஈடுபட்டனர். பாதுகாப்புப் பணியில் இருந்த காவல்துறையினரைத் தகாத வார்த்தைகளால் தாக்கி மிரட்டியதாகவும், தேர்தல் நடத்தை விதிமுறைகளை மீறியதாகவும் வேட்பாளர் கார்த்திகா உள்ளிட்ட 12 பேரை காவல்துறையினர் கைது செய்துள்ளனர்.
இந்நிலையில், கார்த்திகா உள்ளிட்ட 12 பேரும் 15 நாட்கள் நீதிமன்றக் காவலில் அடைக்கப்பட்டுள்ளனர். கார்த்திகா கைது செய்யப்பட்டதற்குக் திமுக, அதிமுக, பாஜக, பாமக, காங்கிரஸ் உள்ளிட்ட பல்வேறு தரப்பிலிருந்தும் கண்டனங்கள் எழுந்தது.
முன்னாள் முதல்வரும் திமுக தலைவருமான மு.க.ஸ்டாலின், “ஒடுக்கப்பட்ட சமுதாயத்தைச் சேர்ந்த பெண்கள் பொதுவாழ்க்கையில் ஈடுபடுவதை, கொள்கை மாறுபாடுகளுக்கு அப்பால் வரவேற்று ஊக்கமளிக்க வேண்டும். அத்தகையோரைக் கைது செய்து அச்சுறுத்துவதன் மூலமாக இந்த அரசு எதைச் சாதிக்கப் போகிறது?
கடந்த காலங்களில் கார்த்திகா அவர்கள் தி.மு.கழகத்தையும் அதன் கொள்கைத் தலைவர்களையும் விமர்சனம் செய்த தருணங்களில், அதைக் கொள்கை வழிநின்று தக்க பதிலளித்து தெளிவை ஏற்படுத்துவோம் என்ற வகையில் அணுகினோமே தவிர, பெண் தலைவர்களைச் சிறையில் அடைத்து வாய்ப்பூட்டு போட நாங்கள் நினைத்தது இல்லை. ஆனால், சகிப்புத்தன்மையும் ஜனநாயக உணர்வும் இல்லாத சர்வாதிகார அரசாகத் த.வெ.க. அரசு நடந்துகொள்கிறது என்றும் நாட்டையே உலுக்கியுள்ள கொடிய போதை மருந்து கடத்தல் வழக்கில் த.வெ.க. நிர்வாகியும் அவரது கூட்டாளிகளும் கைது செய்யப்பட்ட சம்பவத்தைத் திசைதிருப்பவும் தனது நிர்வாகத் தோல்விகளை மறைக்கவும் இத்தகைய கைது நடவடிக்கையில் த.வெ.க. அரசு ஈடுபடுகிறது என்றும் குற்றம் சாட்டி இருந்தார்.
இது குறித்து விடுதலை சிறுத்தைகள் கட்சியின் துணைப் பொதுச் செயலாளரும், அமைச்சருமான வன்னியரசு தனது எக்ஸ் பதிவில் வெளியிட்டுள்ளதாவது:
“ஆரியக் கடப்பாறை கொண்டு திராவிடக் கோட்டையை இடிப்பேன் என்று சொன்னவர் நாம் தமிழர் கட்சியின் தலைமை ஒருங்கிணைப்பாளர் சீமான் அவர்கள். இந்தியாவில் நடக்கிற யுத்தமே ஆரிய – திராவிட யுத்தம் தான் என வரலாற்று ஆய்வுகளோடு அம்பலப்படுத்தியவர் புரட்சியாளர் அம்பேத்கர். அதையே தமிழ்நாட்டில் பரப்புரை செய்தவர் தந்தை பெரியார்.
அப்படிப்பட்ட பெரியாரையே ‘ஒரு மண்ணு’ என இழிவுபடுத்தியவர் சீமான். திராவிடக் கோட்பாட்டையும் சனாதன எதிர்ப்பையும் அரசியல் படுத்தியவர் பேரறிஞர் அண்ணாவும் முத்தமிழறிஞர் கலைஞர் அவர்களும். அப்படிப்பட்ட கலைஞரைத் ‘தெலுங்கன்’ என்றும் ‘திருட்டு திமுக’ என்றும் மிக கேவலமாக, அநாகரிகமாக மேடைகளில் பிதற்றியவர் சீமான்.
அதுமட்டுமல்ல, கலைஞர் அரசாணை பிறப்பித்த ஒரே காரணத்தால், மனோன்மணியம் சுந்தரனார் எழுதிய தமிழ்த்தாய் வாழ்த்துப் பாடலை நிராகரித்த பார்ப்பனிய அடிமைதான் சீமான்.
இப்படி கோட்பாட்டு வழியிலும் தனிநபர் தாக்குதலிலும் ஈடுபட்ட பிழைப்புவாதி சீமானின் இழிவான அரசியலை திமுக மறந்திருக்கலாம். விடுதலைச் சிறுத்தைகளைப் பொறுத்தவரை தந்தை பெரியாரையும் புரட்சியாளர் அம்பேத்கரையும் ஏற்றுக்கொண்டவர்களைத்தான் ஏற்கும்; பார்ப்பனிய அடிமைகளை ஏற்காது. இப்போது திமுகவுக்கும் வெட்கமில்லை; நாதகவுக்கும் வெட்கமில்லை.”
இவ்வாறு அவர் தெரிவித்துள்ளார்.
