தீபாவளிக்குப் புது டிரஸ், பட்டாசு எல்லாம் இருந்தாலும், வீட்டில் அம்மா, பாட்டி செய்யும் பலகாரத்தின் வாசனை இல்லாமல் பண்டிகை முழுமை பெறாது. ஆனால் ஒவ்வொரு வருடமும் லட்டு, மைசூர்பாக், அதிரசம் என்று ஒரே பட்டியலைச் செய்து அலுத்துவிட்டதா? இந்த முறை சமையலறையில் இருக்கும் பொருட்களை வைத்தே கொஞ்சம் புதுசாக ஐந்து இனிப்புகளை முயற்சி செய்து பாருங்கள்.
பாசிப்பருப்பு பர்ஃபி
தேவை: பாசிப்பருப்பு மாவு, சர்க்கரை, நெய். சர்க்கரையில் தண்ணீர் விட்டு ஒற்றைக் கம்பிப் பதத்துக்குப் பாகு காய்ச்சுங்கள். அதில் வறுத்த பாசிப்பருப்பு மாவைக் கொட்டிக் கட்டி தட்டாமல் கிளறுங்கள். சூடான நெய்யைக் கொஞ்சம் கொஞ்சமாக ஊற்றிக் கெட்டியாகும் வரை கிளறி, நெய் தடவிய தட்டில் கொட்டுங்கள். ஆறியதும் துண்டு போடலாம்.
பாசிப்பருப்பு முறுக்கு
வழக்கமான முறுக்குக்குப் பதிலாக இதைச் செய்து பாருங்கள். அரிசி மாவு, பாசிப்பருப்பு மாவு, வெண்ணெய், எள், பெருங்காயத்தூள், உப்பு எல்லாவற்றையும் சேர்த்துத் தண்ணீர் விட்டுப் பிசையுங்கள். முறுக்கு அச்சில் போட்டுச் சூடான எண்ணெயில் பிழிந்து எடுத்தால் மொறுமொறு முறுக்கு தயார்.
பைனாப்பிள் பூந்தி
கடலை மாவில் செய்யும் சாதாரணப் பூந்திக்கு அன்னாசிப்பழ மணம் சேர்த்தால் வேற லெவல். சர்க்கரைப் பாகில் பைனாப்பிள் ஜூஸ், எசன்ஸ் சேர்த்துக்கொள்ளுங்கள். தனியாகப் பொரித்து வைத்த பூந்தியை அந்தப் பாகில் போட்டு ஊறவிட்டால் பழச்சுவையுடன் இனிப்பு கிடைக்கும். குழந்தைகள் விரும்பிச் சாப்பிடுவார்கள்.
தேங்காய்ப்பால் ஜாமூன்
பாசிப்பருப்பையும் புழுங்கல் அரிசியையும் இரண்டு மணி நேரம் ஊறவைத்து, உப்பு சேர்த்து நைசாக அரையுங்கள். இந்த மாவைச் சின்னச் சின்ன உருண்டைகளாக உருட்டி எண்ணெயில் பொரித்தெடுங்கள். தேங்காய்ப்பால், சர்க்கரை, ஏலக்காய் கலந்த கலவையில் இந்த உருண்டைகளை ஒரு மணி நேரம் ஊறவைத்துப் பரிமாறுங்கள்.
பைனாப்பிள் பாயாசம்
பச்சரிசியை வறுத்துப் பொடித்து, தண்ணீரில் வேகவைத்துச் சர்க்கரை சேர்த்துக்கொள்ளுங்கள். அதில் அரைத்த அன்னாசிப்பழச் சாறு, பாதாம் விழுது, நெய்யில் வறுத்த முந்திரி போட்டுக் கிளறி இறக்கினால் பைனாப்பிள் பாயாசம் ரெடி.
சின்ன டிப்ஸ்:
எண்ணெயில் பொரிக்கும் பலகாரங்களை முதலில் ஒரே ஒன்றைப் போட்டுப் பதம் பார்த்துவிட்டுப் பிறகு மொத்தமாகப் போடுங்கள். சின்னக் குழந்தைகள் அடுப்பு, எண்ணெய் பக்கம் வராமல் பார்த்துக்கொள்ளுங்கள்.
வழக்கமான பலகாரங்களோடு இந்த ஐந்தில் ஒன்றிரண்டைச் சேர்த்துச் செய்தால், இந்த வருடத் தீபாவளி இன்னும் இனிக்கும்.
