இந்தியத் திரையுலகின் முன்னணி நட்சத்திரமான தனுஷ் (Dhanush), அடுத்தடுத்து பிரம்மாண்டமான புராஜெக்ட்களில் கமிட்டாகி ரசிகர்களை ஆச்சரியத்தில் ஆழ்த்தி வருகிறார். அந்த வகையில், தற்போது பாலிவுட்டின் பிரம்மாண்ட இயக்குநரான சஞ்சய் லீலா பன்சாலி (Sanjay Leela Bhansali) தயாரிப்பில், தனுஷ் ஒரு புதிய மெகா பட்ஜெட் படத்தில் நடிக்கவுள்ளார். இந்தப் படத்தை தமிழ் சினிமாவின் வெற்றி இயக்குநரான பி.எஸ். மித்ரன் இயக்கவுள்ளார் என்பது கூடுதல் தகவல்.
புராணக் கதையும் அடர்ந்த காடுகளும்!
‘வெரைட்டி’ இதழ் வெளியிட்டுள்ள தகவலின்படி, இந்தப் படம் அடர்ந்த காடுகளைப் பின்னணியாகக் கொண்ட ஒரு புராணக்கதை (Mythological Jungle Drama) என்று சொல்லப்படுகிறது. சஞ்சய் லீலா பன்சாலி தனது ‘பன்சாலி புரொடக்ஷன்ஸ்’ சார்பில் இதனைத் தயாரிக்கிறார். இதுவரை தனுஷ் பாலிவுட்டில் ‘ராஞ்சனா’, ‘அத்ரங்கி ரே’, ‘தேரே இஷ்க் மே’ போன்ற படங்களில் நடித்துள்ளார். ஆனால், அந்தப் படங்களை விடவும் இந்தப் படம் தனுஷின் திரைப்பயணத்திலேயே மிக அதிக பட்ஜெட்டில் உருவாகும் பாலிவுட் படமாக இருக்கும் என எதிர்பார்க்கப்படுகிறது.
பி.எஸ். மித்ரனின் பாலிவுட் என்ட்ரி
‘இரும்புத்திரை’, ‘ஹீரோ’, ‘சர்தார்’ என அழுத்தமான சமூக மற்றும் ஆக்ஷன் படங்களைக் கொடுத்த பி.எஸ். மித்ரன், இந்தப் படத்தின் மூலம் பாலிவுட்டில் இயக்குநராக அறிமுகமாகிறார். முதலில் பன்சாலி தயாரிப்பில் ‘ரவுடி ரத்தோர் 2’ படத்தை இயக்கவே மித்ரன் திட்டமிட்டிருந்தார். ஆனால், அந்த முயற்சி தள்ளிப்போகவே, தற்போது இந்த ‘ஜங்கிள்’ கதையை உருவாக்கி ஓகே செய்துள்ளனர். தனுஷ் மற்றும் பி.எஸ். மித்ரன் இணையும் முதல் படம் இது என்பதால், கோலிவுட் முதல் பாலிவுட் வரை எதிர்பார்ப்பு எகிறியுள்ளது.
ராம் சரண் முதல் தனுஷ் வரை!
இந்தப் படத்திற்காக முதலில் தெலுங்கு நடிகர் ராம் சரணிடம் தான் பேச்சுவார்த்தை நடத்தப்பட்டது. ஆனால், சில காரணங்களால் அவர் விலக, அந்த வாய்ப்பு தற்போது தனுஷைச் சென்று சேர்ந்துள்ளது. தனுஷின் நடிப்புத் திறமைக்கு ஏற்ற வகையில் இந்தக் கதாபாத்திரம் மிகவும் சவாலான ஒன்றாக இருக்கும் எனச் சொல்லப்படுகிறது. இப்படத்தின் படப்பிடிப்பு 2027-ஆம் ஆண்டு தொடக்கத்தில் ஆரம்பமாகவுள்ளது.
தனுஷின் தற்போதைய படங்கள்
தனுஷ் தற்போது ‘D55’, மாரி செல்வராஜ் படம், தமிழரசன் பச்சைமுத்துவின் படம் மற்றும் ‘வடசென்னை 2’ எனத் தமிழில் மிக பிஸியாக இருக்கிறார். மேலும், விக்னேஷ் ராஜா இயக்கத்தில் தனுஷ் நடித்துள்ள ‘கர’ (Kara) திரைப்படம் வரும் ஏப்ரல் 30 அன்று வெளியாக உள்ளது. இந்தப் பணிகளை முடித்த பிறகே, பன்சாலியின் கனவு புராஜெக்ட்டில் தனுஷ் இணையவுள்ளார்.