தமிழ்நாட்டின் பிரபலமான உணவக நிறுவனமான அடையார் ஆனந்த பவனின் பெரும்பான்மைப் பங்குகள் ரூ.1,600 கோடிக்கு விற்பனை செய்யப்படுகின்றன. இந்த நிலையில், அடையார் ஆனந்த பவன் நிறுவனத்தின் மொத்த மதிப்பு சுமார் ரூ.3,100 கோடி எனக் கூறப்படுகிறது. கடந்த நிதியாண்டில் இந்நிறுவனம் ரூ.1,487 கோடி வருவாய் ஈட்டியுள்ளது. மேலும், அடையார் ஆனந்த பவன் நிறுவனத்தைப் பங்குச்சந்தைக்குக் கொண்டுவரவும் திட்டமிடப்பட்டுள்ளது.
அடையார் ஆனந்த பவன் (A2B) நிறுவனத்தின் பெரும்பான்மைப் பங்குகளை ஜேம்ஸ் முர்டோக், உதய் சங்கர் ஆகியோரின் போதி ட்ரீ சிஸ்டம்ஸ் நிறுவனம் சுமார் 180 மில்லியன் டாலருக்கு வாங்குவது தொடர்பான அறிவிப்பு நேற்று நவம்பர் 12-ந் தேதி வெளியானது.
இந்த ஒப்பந்தம் குறித்து ஏற்கெனவே மின்னம்பலத்தில் செய்தி வெளியிட்டிருந்தோம். தற்போது அடையார் ஆனந்த பவன் நிறுவனத்தின் மொத்த மதிப்பு, வருவாய், லாபம் மற்றும் அடுத்தகட்டத் திட்டங்கள் குறித்த கூடுதல் தகவல்கள் வெளியாகியுள்ளன.
அடையார் ஆனந்த பவனின் மதிப்பு ரூ.3,100 கோடியா?
போதி ட்ரீ நிறுவனம் சுமார் ரூ.1,600 கோடி கொடுத்து அடையார் ஆனந்த பவனின் பெரும்பான்மைப் பங்குகளை வாங்குகிறது. ஆனால், அடையார் ஆனந்த பவன் நிறுவனத்தின் மொத்த மதிப்பு ரூ.1,600 கோடி அல்ல. இந்த ஒப்பந்தத்தின் அடிப்படையில் நிறுவனத்தின் மொத்த மதிப்பு சுமார் 350 மில்லியன் டாலர், அதாவது ரூ.3,100 கோடி என மதிப்பிடப்பட்டுள்ளது.
அதேநேரத்தில், எத்தனை சதவீதப் பங்குகள் விற்கப்படுகின்றன என்பதை இரு நிறுவனங்களும் அறிவிக்கவில்லை. 50 சதவீதத்திற்கும் அதிகமான பங்குகளை போதி ட்ரீ வாங்குகிறது என்பது மட்டுமே தெரியவந்துள்ளது.
ஆண்டுக்கு ரூ.1,487 கோடி வருவாய்.. லாபம் எவ்வளவு?
2025 மார்ச் மாதத்துடன் முடிந்த 2024–25 நிதியாண்டில் அடையார் ஆனந்த பவன் நிறுவனம் ரூ.1,487 கோடி வருவாய் ஈட்டியுள்ளது. ஆனால், இந்த ரூ.1,487 கோடியும் நிறுவனத்தின் லாபம் அல்ல. உணவகங்களை நடத்துவதற்கான செலவுகள், ஊழியர்களின் சம்பளம், வரிகள் உள்ளிட்ட செலவுகளைக் கழித்த பிறகு நிறுவனத்திற்குக் கிடைத்த நிகர லாபம் ரூ.36.2 கோடி. அதாவது, நிறுவனம் ஈட்டிய ஒவ்வொரு ரூ.100 வருவாயிலும் சுமார் ரூ.2.40 மட்டுமே நிகர லாபமாகக் கிடைத்துள்ளது. இதன்படி, நிறுவனத்தின் ஆண்டு வருவாயைவிட அதன் மொத்த மதிப்பு சுமார் 2.1 மடங்கு அதிகமாக உள்ளது.
A2B பங்குகளை பொதுமக்களும் வாங்க முடியுமா?
அடையார் ஆனந்த பவன் நிறுவனத்தை எதிர்காலத்தில் பங்குச்சந்தைக்குக் கொண்டுவரவும் திட்டமிடப்பட்டுள்ளது. இதுகுறித்து நிறுவனத்தின் இணை நிறுவனர் கே.டி. சீனிவாச ராஜா, போதி ட்ரீ நிறுவனத்துடன் இணைந்து A2B-யை பங்குச்சந்தையில் இடம்பெறுவதற்கு ஏற்ற வகையில் மாற்றத் திட்டமிட்டுள்ளதாகத் தெரிவித்துள்ளார்.
அதாவது, இப்போது தனியார் நிறுவனமாகச் செயல்படும் அடையார் ஆனந்த பவன், எதிர்காலத்தில் பங்குச்சந்தைக்கு வந்தால் பொதுமக்களும் அதன் பங்குகளை வாங்க முடியும். ஆனால், நிறுவனம் எப்போது பங்குச்சந்தைக்கு வரும் என்பது இன்னும் அறிவிக்கப்படவில்லை.
உதய் சங்கர் தலைமையில் புதிய நிர்வாகம்
அடையார் ஆனந்த பவனின் பெரும்பான்மைப் பங்குகளை போதி ட்ரீ வாங்கிய பிறகு, நிறுவனத்தின் நிர்வாகத்திலும் மாற்றங்கள் ஏற்பட உள்ளன. போதி ட்ரீ நிறுவனத்தின் இணை நிறுவனரான உதய் சங்கர், அடையார் ஆனந்த பவன் நிறுவனத்தின் இயக்குநர்கள் குழுவின் தலைவராகப் பொறுப்பேற்க உள்ளார். இதுவரை குடும்பத்தினரால் நடத்தப்பட்டு வந்த அடையார் ஆனந்த பவன் நிறுவனத்தின் நிர்வாகத்தில், போதி ட்ரீ நிறுவனமும் முக்கியப் பங்கு வகிக்க உள்ளது.
அதேநேரத்தில், அடையார் ஆனந்த பவனைத் தொடங்கிய குடும்பத்தினரிடம் எத்தனை சதவீதப் பங்குகள் இருக்கும், நிறுவனத்தின் நிர்வாகத்தில் அவர்கள் என்னென்ன பொறுப்புகளை வகிப்பார்கள் என்பது இன்னும் முழுமையாக அறிவிக்கப்படவில்லை.
சென்னை, பெங்களூரில் என்ன மாற்றம்?
போதி ட்ரீ முதலீட்டுக்குப் பிறகு அடையார் ஆனந்த பவன் நிறுவனத்தை மேலும் விரிவுபடுத்தத் திட்டமிடப்பட்டுள்ளது. சென்னை மற்றும் பெங்களூரில் உள்ள உணவுத் தயாரிப்பு நிறுவனங்களை மேம்படுத்தவும், இந்தியாவின் மற்ற மாநிலங்களிலும் வெளிநாடுகளிலும் புதிய கடைகளைத் திறக்கவும் திட்டமிட்டுள்ளதாக A2B குடும்பத்தைச் சேர்ந்த விஷ்ணு சங்கர் தெரிவித்துள்ளார்.
மேலும், இனிப்பு மற்றும் கார வகைகளைப் பாக்கெட்டுகளில் அடைத்து விற்பனை செய்வதையும் அதிகரிக்கத் திட்டமிடப்பட்டுள்ளது. வெளிநாடுகளுக்கு இனிப்பு, கார வகைகளை ஏற்றுமதி செய்வதற்காகப் புதிய உணவுத் தயாரிப்பு நிறுவனத்தை அமைப்பது குறித்தும் ஆலோசிக்கப்பட்டு வருகிறது.
190-க்கும் மேற்பட்ட கிளைகள்.. 15,000 ஊழியர்கள்
அடையார் ஆனந்த பவன் நிறுவனத்திற்கு இந்தியாவில் சுமார் 160 கிளைகள் உள்ளன. வெளிநாடுகளில் 30-க்கும் மேற்பட்ட கிளைகள் செயல்பட்டு வருகின்றன.
சிங்கப்பூர், அமெரிக்கா, ஆஸ்திரேலியா, மலேசியா, பிரிட்டன் உள்ளிட்ட நாடுகளிலும் அடையார் ஆனந்த பவன் உணவகங்கள் உள்ளன. இந்த நிறுவனத்தில் 15,000-க்கும் மேற்பட்டோர் பணியாற்றுகின்றனர். இவ்வளவு பெரிய உணவக நிறுவனத்தின் பெரும்பான்மைப் பங்குகளை ரூ.1,600 கோடிக்கு போதி ட்ரீ வாங்குவது இந்திய உணவகத் துறையில் முக்கியமான ஒப்பந்தமாகப் பார்க்கப்படுகிறது.
