நிதியமைச்சர் நிர்மலா சீதாராமன் பிப்ரவரி 1 அன்று மத்திய பட்ஜெட்டை தாக்கல் செய்ய உள்ளார். இதில், மூத்த குடிமக்களுக்கு ரயில் பயணச் சலுகைகள் மீண்டும் கிடைக்குமா என்ற எதிர்பார்ப்பு அதிகமாக உள்ளது. டிசம்பர் 26, 2025 முதல் ரயில் கட்டணங்கள் உயர்த்தப்பட்டுள்ளதால், வயதானவர்கள் தங்கள் பயணச் செலவுகள் அதிகரிக்கும் என கவலைப்படுகின்றனர். கொரோனா பெருந்தொற்றுக்கு முன்பு மூத்த குடிமக்களுக்கு ரயில் டிக்கெட்டுகளில் தள்ளுபடி வழங்கப்பட்டது. ஆனால், பெருந்தொற்று காலத்தில் இந்தச் சலுகை நிறுத்தப்பட்டது. தற்போது இயல்பு வாழ்க்கை திரும்பியிருந்தாலும் இந்தச் சலுகை மீண்டும் கொடுக்கப்படவில்லை.
ரயில்வே நிர்வாகம் 215 கிலோ மீட்டருக்கு மேல் செல்லும் பயணங்களுக்கு கட்டணத்தை உயர்த்தியுள்ளது. பொதுப் பிரிவினருக்கு ஒரு கிலோ மீட்டருக்கு 1 பைசாவும், மெயில், எக்ஸ்பிரஸ் ரயில்களின் ஏசி அல்லாத மற்றும் ஏசி பெட்டிகளுக்கு ஒரு கிலோ மீட்டருக்கு 2 பைசா என கட்டணம் நிர்ணயிக்கப்பட்டுள்ளது. இந்த முடிவால் ரயில்வேக்கு சுமார் ரூ. 600 கோடி கூடுதல் வருவாய் கிடைக்கும் என எதிர்பார்க்கப்படுகிறது. ஆனால், இது பயணிகளை, குறிப்பாக வயதானவர்களை நேரடியாகப் பாதிக்கும்.
பெருந்தொற்றுக்கு முன்பு, ரயில்வே மூத்த குடிமக்களுக்கு கணிசமான டிக்கெட் தள்ளுபடிகளை வழங்கியது. 2019 வரை, 60 வயதுக்கு மேற்பட்ட ஆண்களுக்கு 40% தள்ளுபடியும், 58 வயதுக்கு மேற்பட்ட பெண்களுக்கு 50% தள்ளுபடியும் கிடைத்தது. இந்தத் தள்ளுபடி மெயில், எக்ஸ்பிரஸ், ராஜ்தானி, ஷதாப்தி, துரந்தோ போன்ற ரயில்களுக்கும் பொருந்தியது. உதாரணமாக, ராஜ்தானி ரயிலில் முதல் ஏசி டிக்கெட் ரூ. 4,000 என்றால், மூத்த குடிமக்கள் அதை சுமார் ரூ. 2,000 முதல் ரூ. 2,300 வரை வாங்க முடிந்தது. இதனால் நீண்ட தூரப் பயணங்கள் மிகவும் மலிவாக இருந்தன.
2020 ஆம் ஆண்டில் கொரோனா பெருந்தொற்று காலத்தில், அரசு இந்தச் சலுகையை தற்காலிகமாக நிறுத்தியது. அப்போது பயணிகள் எண்ணிக்கை குறைவாக இருந்ததாலும், ரயில்வே நிதி நெருக்கடியில் இருந்ததாலும் இந்த முடிவு எடுக்கப்பட்டது. ஆனால், இப்போது நிலைமை மாறிவிட்டது. ரயில்கள் மீண்டும் நிரம்பி வழிகின்றன. ரயில்வே வருவாயும் அதிகரித்துள்ளது. இருந்தபோதிலும், இந்தச் சலுகை இன்னும் திரும்பப் பெறப்படவில்லை. இது வயதான பயணிகளுக்கு ஏமாற்றத்தை அளித்துள்ளது.
எனவே இந்த பட்ஜெட்டில் ரயில் டிக்கெட் சலுகை குறித்த அறிவிப்புக்காக மூத்த குடிமக்கள் காத்திருக்கிறார்கள். ரயில் பயணச் சலுகைகள் மீண்டும் கிடைத்தால் அவர்களின் பயணச் செலவுகள் குறையும். குறிப்பாக, நீண்ட தூரம் பயணம் செய்பவர்களுக்கு இது பெரிய உதவியாக இருக்கும்.
ரயில்வேயின் வருவாய் அதிகரித்துள்ள நிலையில், மூத்த குடிமக்களின் நலனைக் கருத்தில் கொண்டு இந்தச் சலுகையை மீண்டும் கொண்டுவர வேண்டும் என்பதே அவர்களின் கோரிக்கையாக உள்ளது. இந்த பட்ஜெட்டில் அவர்களின் எதிர்பார்ப்புகள் நிறைவேற்றப்படுமா என்பதைப் பொறுத்திருந்துதான் பார்க்க வேண்டும்.