தினமும் வீட்டில் சமைக்கும் உணவின் சுவையைத் தீர்மானிப்பதில் உப்புக்கு முக்கிய இடம் உண்டு. ஆனால், எவ்வளவு உப்பு சேர்க்கிறோம் என்பது மட்டுமல்லாமல், எந்த நேரத்தில் சேர்க்கிறோம் என்பதும் உணவின் சுவையையும் பதத்தையும் தீர்மானிக்கிறது.
வெங்காயம் வதக்குவது முதல் குழம்பு தயாரிப்பது வரை ஒவ்வொரு உணவுக்கும் உப்பு சேர்க்கும் நேரம் மாறுபடும்.
சரியான நேரத்தில் உப்பைச் சேர்த்தால் உணவின் சுவை சீராகப் பரவுவதுடன், அதிகப்படியான உப்பால் ஏற்படும் சுவை மாற்றத்தையும் தவிர்க்கலாம்.
வெங்காயம், தக்காளி வதக்கும்போது உப்பு சேர்க்கலாமா?
வெங்காயம், தக்காளி போன்றவற்றை எண்ணெயில் வதக்கும்போதே சிறிதளவு உப்பு சேர்க்கலாம். உப்பு அவற்றிலிருந்து ஈரப்பதத்தை வெளியேற்ற உதவுவதால், அவை விரைவாக மென்மையாகும். இதனால் மசாலாப் பொருட்களுடன் சுவை நன்றாகக் கலக்கும்.
முட்டைக்கோஸ், காளான் போன்ற நீர்ச்சத்து அதிகமுள்ள காய்கறிகளைச் சமைக்கும்போதும் இந்த முறை உதவும். ஆனால் காய்கறிகள் மொறுமொறுப்பாக இருக்க வேண்டும் என்றால், உப்பைச் சற்று தாமதமாகச் சேர்ப்பது நல்லது.
சிக்கன், மட்டன் சமைக்கும்போது கவனம்!
சிக்கன் அல்லது மட்டன் சமைப்பதற்கு முன்பே உப்பைச் சேர்த்து ஊறவைத்தால், இறைச்சியில் சுவை சீராகப் பரவ உதவும். மசாலாப் பொருட்களுடன் உப்பையும் சேர்த்து ஊறவைத்து, பின்னர் சமைக்கலாம்.
இறைச்சியின் அளவு, ஊறவைக்கும் நேரம், செய்முறை ஆகியவற்றைப் பொறுத்து சுவையில் மாற்றம் இருக்கும். எனவே, உப்பை அளவாகச் சேர்ப்பது அவசியம்.
குழம்பு, சூப் வகைகளில் எப்போது உப்பு போட வேண்டும்?
குழம்பு, சூப் போன்ற திரவ உணவுகளில் ஆரம்பத்திலேயே அதிக உப்பு சேர்ப்பதைத் தவிர்க்க வேண்டும். நீண்ட நேரம் கொதிக்கும்போது தண்ணீர் ஆவியாகி, உப்பின் சுவை அதிகமாகத் தெரியலாம்.
ஆரம்பத்தில் சிறிதளவு உப்பு சேர்த்து, குழம்பு வெந்ததும் சுவை பார்த்து தேவையான அளவைச் சேர்ப்பது சிறந்தது.
பொரியல், சிப்ஸ் வகைகளுக்கு கடைசி நேரம் ஏன் முக்கியம்?
உருளைக்கிழங்கு பொரியல் போன்ற உணவுகள் மொறுமொறுப்பாக இருக்க வேண்டும் என்றால், உப்பை இறுதியில் சேர்ப்பது உதவும். சிப்ஸ், பிரெஞ்ச் ஃபிரைஸ் போன்றவற்றை எண்ணெயிலிருந்து எடுத்ததும், சூடாக இருக்கும்போதே உப்பைத் தூவலாம்.
எந்த உணவாக இருந்தாலும், ஒரே நேரத்தில் அதிக உப்பைக் கொட்டாமல் சிறிது சிறிதாகச் சேர்த்து சுவை பார்ப்பதே சிறந்த வழி. இதனால் உணவின் சுவையைச் சரியாகக் கட்டுப்படுத்த முடியும்.
