“வாக்காளர் பட்டியலில் இருந்து கோடிக்கணக்கானோரின் பெயர்கள் நீக்கப்பட்டிருப்பது, பல மாநிலங்கள் மற்றும் யூனியன் பிரதேசங்களில் நடைபெற்ற தேர்தல்கள் செல்லுமா என்பது குறித்தும் கேள்விகளை எழுப்பியுள்ளது” என்று விடுதலை சிறுத்தைகள் கட்சித் தலைவர் தொல். திருமாளவன் சந்தேகம் எழுப்பி உள்ளார்.
டெல்லியில் இன்று செப்டம்பர் 30-ஆம் தேதி நடைபெற்ற இந்தியா கூட்டணி ஆலோசனைக் கூட்டத்தில் தொல். திருமாவளவன் எம்.பி. பேசியதாவது: இந்தக் கூட்டத்தை ஏற்பாடு செய்த காங்கிரஸ் கட்சித் தலைவர்களுக்கு எனது பாராட்டுகளை தெரிவித்துக் கொள்கிறேன்.
தேர்தல் ஆணையத்தின் இரண்டு ஆணையர்கள் எழுப்பிய ஆட்சேபனைகள் குறித்து இந்தியன் எக்ஸ்பிரஸ் வெளியிட்டுள்ள தகவல்கள், SIR நடவடிக்கை சட்டப்படி நடைபெறுகிறதா என்ற கேள்வியை எழுப்பியுள்ளன.
வாக்காளர் பட்டியலில் இருந்து கோடிக்கணக்கானோரின் பெயர்கள் நீக்கப்பட்டிருப்பது, பல மாநிலங்கள் மற்றும் யூனியன் பிரதேசங்களில் நடைபெற்ற தேர்தல்கள் செல்லுமா என்பது குறித்தும் கேள்விகளை எழுப்பியுள்ளது.
அந்தத் தேர்தல்களை சட்டவிரோதமானவை என்று அறிவிக்க வேண்டும் என்ற அரவிந்த் கெஜ்ரிவாலின் கோரிக்கை சட்டப்படி நியாயமானதாக இருக்கலாம். ஆனால் அதை நடைமுறைப்படுத்துவது சிரமம்.
பீகார் மற்றும் தமிழ்நாட்டில் SIR நடவடிக்கையை எதிர்த்து விசிக உச்ச நீதிமன்றத்தில் வழக்கு தொடர்ந்துள்ளது. ஆனால் SIR-க்கு எதிரான வழக்குகளில் உச்ச நீதிமன்றம் இதுவரை நிவாரணம் வழங்கவில்லை. இது கவலை அளிக்கிறது.
சில நாட்களுக்கு முன்பு மூன்று தேர்தல் ஆணையர்களும் ஒன்றாக செய்தியாளர்களை சந்தித்து கூட்டறிக்கை வெளியிட்டனர். இது தேர்தல் ஆணையர்களுக்கு இடையிலான கருத்து வேறுபாடு தொடர்பான பிரச்சினை மட்டும் அல்ல. நமது தேர்தல் ஜனநாயகத்தின் அடிப்படையையே பாதிக்கும் பிரச்சினை.
இந்த நிலையில் INDIA கூட்டணி சார்பில்,
- தலைமைத் தேர்தல் ஆணையர் ஞானேஷ் குமார் பதவி விலக வேண்டும். அவர் மீது கூறப்படும் சட்டவிரோத நடவடிக்கைகள் தொடர்பாக அவரைக் கைது செய்ய வேண்டும்.
- தற்போது நடைபெற்று வரும் SIR நடவடிக்கையை உடனடியாக நிறுத்த வேண்டும்.
- வாக்காளர் பட்டியலில் இருந்து பெயர் நீக்கப்பட்டவர்களின் சமூகப் பின்னணி குறித்த விவரங்களை வெளியிட வேண்டும்.
- நீக்கப்பட்ட 13 கோடி வாக்காளர்களின் பெயர்களையும் மீண்டும் சேர்க்க வேண்டும்.
- வாக்களிக்கும் உரிமையை அடிப்படை உரிமையாக்க வேண்டும்.
- ஞானேஷ் குமாரை தலைமை தேர்தல் ஆணையராக நியமித்ததற்காக பிரதமரும் உள்துறை அமைச்சரும் மன்னிப்பு கேட்க வேண்டும்.
- தலைமைத் தேர்தல் ஆணையர் மற்றும் பிற தேர்தல் ஆணையர்கள் சட்டம் 2023-ஐ திரும்பப் பெற வேண்டும்.
- ஜனநாயகத்தைக் காப்பாற்ற நாடு முழுவதும் போராட்டத்தை அறிவிக்க வேண்டும்.
என்று INDIA கூட்டணியை விசிக சார்பில் கேட்டுக்கொள்கிறேன். இவ்வாறு தொல். திருமாவளவன் பேசினார்.
இந்தியா கூட்டணி கூட்டம்- படங்கள்:
