புதுச்சேரி தட்டாஞ்சாவடி சட்டசபை தொகுதி இடைத்தேர்தலில் என்.ஆர்.காங்கிரஸ் வேட்பாளர் அசோக் ஆனந்த் 8,482 வாக்குகள் வித்தியாசத்தில் வெற்றி பெற்றுள்ளார். இந்தத் தேர்தலில் திமுக வேட்பாளர் உள்ளிட்ட 9 பேர் டெபாசிட் இழந்துள்ளனர்.
தட்டாஞ்சாவடி சட்டசபை தொகுதி இடைத்தேர்தலில் பதிவான வாக்குகள் எண்ணப்பட்டு முடிவுகள் அறிவிக்கப்பட்டுள்ளன.
இதில் அகில இந்திய என்.ஆர்.காங்கிரஸ் வேட்பாளர் அசோக் ஆனந்த் 13,358 வாக்குகள் பெற்று வெற்றி பெற்றார். அவரை எதிர்த்துப் போட்டியிட்ட காங்கிரஸ் வேட்பாளர் இ.விநாயகம் 4,876 வாக்குகள் பெற்று 2-வது இடத்தைப் பிடித்தார். திமுக வேட்பாளர் கே.சேது என்ற சேதுசெல்வம் 2,664 வாக்குகள் மட்டுமே பெற்று 3-வது இடத்துக்குத் தள்ளப்பட்டார்.
இந்திய கம்யூனிஸ்ட் கட்சி வேட்பாளர் ஏ.எம்.சலீம் 310 வாக்குகளையும், நாம் தமிழர் கட்சி வேட்பாளர் எஸ்.கார்த்திகுமாரி 172 வாக்குகளையும் பெற்றனர்.
சுயேச்சை வேட்பாளர்களான ஏ.ரகு 70 வாக்குகள், எஸ்.வசந்தி 57 வாக்குகள், ஆர்.ஜெயபாலன் 35 வாக்குகள், எம்.நித்யா 28 வாக்குகள், ஆர்.சாமிநாதன் 8 வாக்குகள் பெற்றனர். இந்திய குடியரசுக் கட்சி வேட்பாளர் கலைவாணன் 54 வாக்குகள் பெற்றார். நோட்டாவுக்கு 225 வாக்குகள் பதிவாகின.
இந்தத் தேர்தலில் வெற்றி பெற்ற அசோக் ஆனந்த், 2-வது இடம் பிடித்த காங்கிரஸ் வேட்பாளர் இ.விநாயகம் ஆகியோர் மட்டுமே டெபாசிட்டைத் தக்க வைத்துள்ளனர்.
திமுக வேட்பாளர் கே.சேது, இந்திய கம்யூனிஸ்ட் வேட்பாளர் ஏ.எம்.சலீம், நாம் தமிழர் கட்சி வேட்பாளர் எஸ்.கார்த்திகுமாரி உள்ளிட்ட மற்ற 9 வேட்பாளர்களும் டெபாசிட் இழந்துள்ளனர்.
