90-களில் பிறந்த மில்லினியல் பெற்றோர்களுக்கு, நட்பு என்பது பள்ளியிலோ, தெருவிலோ அல்லது கல்லூரியிலோ நேரில் சந்தித்து உருவானது. ‘ஃப்ரெண்ட்ஸ்’ (F.R.I.E.N.D.S) சீரிஸ் போல ஒரு நெருக்கமான குழுவாகச் செயல்படுவது அவர்களின் வழக்கம். ஆனால், 2000-க்குப் பிறகு பிறந்த ஜென் Z (Gen Z) பிள்ளைகளின் நட்பு உலகம் முற்றிலும் வேறுபட்டது. இந்த இடைவெளியைப் புரிந்து கொள்ளாமல் பெற்றோர்கள் கவலைப்படுவது வழக்கம். இந்தத் தலைமுறை இடைவெளியைக் கையாள்வது எப்படி?
1. ஆன்லைன் நண்பர்களும் ‘ரியல்‘ தான்: மில்லினியல்களைப் பொறுத்தவரை, நேரில் பார்ப்பவரே நண்பர்; இணையத்தில் அறிமுகமானவர் ‘அந்நியர்’. ஆனால், ஜென் Z பிள்ளைகளுக்கு இன்ஸ்டாகிராம் அல்லது கேமிங் (Gaming) வழியாகக் கிடைக்கும் நண்பர்கள், பள்ளி நண்பர்களுக்கு இணையானவர்கள்.
- பெற்றோர் செய்ய வேண்டியது: “ஃபோன்ல இருக்கவன்லாம் ஃப்ரெண்ட் இல்ல” என்று ஒதுக்கித் தள்ளாதீர்கள். அவர்களின் ஆன்லைன் நண்பர்களைப் பற்றியும் ஆர்வமாகக் கேளுங்கள். அது அவர்களுக்கு உங்கள் மீது நம்பிக்கையை உருவாக்கும்.
2. எல்லைகள் (Boundaries) முக்கியம்: பழைய தலைமுறையினர், நண்பர்களுக்குள் இருக்கும் மனக்கசப்புகளைப் பொறுத்துக்கொண்டு, நட்பைத் தொடர்வார்கள். ஆனால், ஜென் Z பிள்ளைகள் தங்கள் மனநலத்திற்கு (Mental Health) அதிக முக்கியத்துவம் கொடுப்பவர்கள். ஒரு நட்பு தங்களுக்குத் தொந்தரவாக இருந்தால், உடனே அந்த உறவை முறித்துக்கொள்ளவோ அல்லது ‘பிளாக்’ (Block) செய்யவோ அவர்கள் தயங்குவதில்லை.
- பெற்றோர் செய்ய வேண்டியது: இதை ‘திமிர்’ என்றோ அல்லது ‘பொறுமையில்லை’ என்றோ விமர்சிக்காதீர்கள். அவர்கள் தங்கள் மன அமைதிக்காக எல்லைகளை வகுக்கிறார்கள் என்பதைப் புரிந்து கொள்ளுங்கள். அதே சமயம், பிரச்சனைகளைப் பேசித் தீர்க்கவும் அவர்களுக்குக் கற்றுக்கொடுங்கள்.
3. ஒரு குழுவா? பல குழுக்களா? மில்லினியல்கள் பெரும்பாலும் ஒரே ஒரு நெருக்கமான நண்பர்கள் குழுவை (Squad) வைத்திருப்பார்கள். ஆனால், ஜென் Z பிள்ளைகள் வெவ்வேறு ஆர்வங்களுக்கு ஏற்ப வெவ்வேறு நண்பர் குழுக்களை வைத்திருப்பார்கள். கேமிங் விளையாட ஒரு செட், படிப்பதற்கு ஒரு செட் என அவர்களின் வட்டம் விரிவானது.
- பெற்றோர் செய்ய வேண்டியது: உங்களைப்போலவே அவர்களுக்கும் ஒரே ஒரு ‘பெஸ்ட் ஃப்ரெண்ட்’ இருக்க வேண்டும் என்று எதிர்பார்க்காதீர்கள். அவர்களின் பரந்துபட்ட நட்பு வட்டத்தை அங்கீகரியுங்கள்.
காலம் மாறும்போது நட்பின் இலக்கணமும் மாறுகிறது. உங்கள் பிள்ளைகளின் பாதுகாப்பு முக்கியம்தான்; ஆனால், அவர்கள் உலகத்தை எப்படிப் பார்க்கிறார்கள் என்பதைப் புரிந்துகொண்டு, அதற்கேற்ப வழிகாட்டுவதே சிறந்த பெற்றோருக்கான அழகு. அவர்களின் டிஜிட்டல் நட்பு உலகத்தை சந்தேகிக்காமல், தோழமையோடு அணுகுங்கள்!