மாலை நேரத்தில் சூடாக ஒரு கப் டீயுடன் சாப்பிட ஏற்ற ஸ்நாக்ஸ் என்றால் சமோசா முதலிடத்தில் இருக்கும். அதிலும் கீமா சமோசா என்றால் அதன் சுவையே தனி. மொறுமொறுப்பான வெளிப்புறம், காரசாரமான கீமா மசாலா உள்ளே நிறைந்திருக்கும் இந்த சமோசாவை வீட்டிலேயே எளிதாக செய்யலாம். சரியான மசாலா, சரியான மடிப்பு மற்றும் மிதமான தீயில் பொரிப்பதே இந்த ரெசிபியின் ரகசியம்.
தேவையான பொருட்கள்
பூரணத்திற்கு:
- கீமா (ஆட்டிறைச்சி, கோழி இறைச்சி அல்லது மாட்டிறைச்சி) – 500 கிராம்
- எண்ணெய் – 2 டேபிள்ஸ்பூன்
- சீரகம் – 1 டீஸ்பூன்
- பூண்டு – 5 பல் (பொடியாக நறுக்கியது)
- இஞ்சி – 1 அங்குல துண்டு (பொடியாக நறுக்கியது)
- மல்லித்தூள் – 1½ டீஸ்பூன்
- மிளகாய்த்தூள் – ¾ டீஸ்பூன்
- மிளகாய் துகள்கள் – 1 டீஸ்பூன்
- கரம் மசாலா – ½ டீஸ்பூன்
- மிளகுத்தூள் – ¼ டீஸ்பூன்
- உப்பு – தேவையான அளவு
- வெங்காயம் – 1 (பொடியாக நறுக்கியது)
- பச்சை மிளகாய் – 2
- வெங்காயத்தாள் – 2
- கொத்தமல்லித்தழை – ½ கப்
சமோசா ஷீட்:
- சமோசா பத்தி அல்லது ஸ்பிரிங் ரோல் ஷீட் – 25
- மைதா – ⅓ கப்
- தண்ணீர் – ¼ கப் (ஒட்டுவதற்கு பேஸ்ட் செய்ய)
எப்படி செய்வது?
முதலில் கடாயில் எண்ணெய் ஊற்றி சீரகம் தாளிக்கவும். பின்னர் கீமாவை சேர்த்து அதன் நிறம் மாறும் வரை வதக்குங்கள். இப்போது இஞ்சி, பூண்டு சேர்த்து நன்றாக வதக்கி, மல்லித்தூள், மிளகாய்த்தூள், மிளகாய் துகள்கள், கரம் மசாலா, மிளகுத்தூள் மற்றும் உப்பு சேர்த்து கிளறவும்.
அரை கப் தண்ணீர் சேர்த்து மூடி வைத்து கீமா மென்மையாகும் வரை வேகவிடுங்கள். பின்னர் மூடியைத் திறந்து தண்ணீர் முழுவதும் வற்றும் வரை வதக்க வேண்டும். கலவை முழுமையாக குளிர்ந்த பிறகு, நறுக்கிய வெங்காயம், பச்சை மிளகாய், வெங்காயத்தாள் மற்றும் கொத்தமல்லியை சேர்த்து நன்றாகக் கலக்குங்கள்.
சமோசா மடித்து பொரிப்பது எப்படி?
மைதா மற்றும் தண்ணீர் சேர்த்து கெட்டியான பேஸ்ட் தயார் செய்யுங்கள். சமோசா ஷீட்டை கூம்பு வடிவில் மடித்து, அதில் கீமா பூரணத்தை நிரப்புங்கள். விளிம்புகளில் மைதா பேஸ்டை தடவி நன்றாக ஒட்டி மூடுங்கள்.
பின்னர் மிதமான சூட்டில் எண்ணெயை காயவைத்து, சமோசாக்களை பொன்னிறமாகும் வரை மெதுவாக பொரித்தெடுக்கவும். அதிக தீயில் பொரித்தால் வெளிப்புறம் மட்டும் வெந்து, உள்ளே சரியாக சமைவதில்லை.
மொறுமொறுப்பாக வர இந்த டிப்ஸை பின்பற்றுங்கள்
கீமா பூரணத்தில் தண்ணீர் எதுவும் இருக்கக்கூடாது. பூரணத்தை முழுமையாக குளிரவைத்த பிறகே ஷீட்டில் நிரப்ப வேண்டும். சமோசாவை எப்போதும் மிதமான தீயில் பொரித்தால் மட்டுமே நீண்ட நேரம் மொறுமொறுப்பாக இருக்கும். புதினா சட்னி, தக்காளி சாஸ் அல்லது ரைதாவுடன் பரிமாறினால் சுவை இன்னும் அருமையாக இருக்கும்.
