கடல் உணவு பிரியர்களின் விருப்பப்பட்டியலில் எப்போதும் இடம்பிடிக்கும் உணவுகளில் ஒன்று ஸ்க்விட் ரோஸ்ட் (Squid Roast).
கேரளாவில் இது கணவா ரோஸ்ட் அல்லது கூந்தல் ரோஸ்ட் என்றும் அழைக்கப்படுகிறது.
சின்ன வெங்காயம், மிளகு, சோம்பு, தேங்காய் எண்ணெய் ஆகியவற்றின் நறுமணத்துடன் வதக்கப்படும் இந்த ரோஸ்ட், சோறு, சப்பாத்தி, பரோட்டா என எதனுடனும் சாப்பிட அட்டகாசமாக இருக்கும்.
சரியான முறையில் சமைத்தால், ஸ்க்விட் மென்மையாகவும், மசாலா முழுவதும் ஊறிய சுவையுடனும் கிடைக்கும்.
தேவையான பொருட்கள்
- ஸ்க்விட் (கணவா) – 500 கிராம் (சுத்தம் செய்து வளையங்களாக நறுக்கியது)
- சின்ன வெங்காயம் – 20
- பூண்டு – 6 பல்
- இஞ்சி – ஒரு சிறிய துண்டு
- தேங்காய் எண்ணெய் – ¼ கப்
- தக்காளி – 2
- பச்சை மிளகாய் – 2
- கறிவேப்பிலை – 2 கொத்து
- காஷ்மீரி மிளகாய்த்தூள் – 2 டேபிள்ஸ்பூன்
- மல்லித்தூள் – 1 டேபிள்ஸ்பூன்
- மஞ்சள்தூள் – 1 டீஸ்பூன்
- மிளகுத்தூள் – 1 டீஸ்பூன்
- சோம்புத்தூள் – 1½ டீஸ்பூன்
- கரம் மசாலாத்தூள் – 2 டீஸ்பூன்
- எலுமிச்சைச் சாறு – 1 டீஸ்பூன்
- உப்பு – தேவையான அளவு
எப்படி செய்வது?
முதலில் சின்ன வெங்காயம், பூண்டு மற்றும் இஞ்சியை தண்ணீர் சேர்க்காமல் கொரகொரப்பாக அரைத்துக்கொள்ளுங்கள்.
பின்னர் கடாயில் தேங்காய் எண்ணெயை சூடாக்கி, அரைத்த கலவையை சேர்த்து பொன்னிறமாகும் வரை வதக்கவும். அதன்பின் கறிவேப்பிலை, பச்சை மிளகாய் மற்றும் தக்காளியை சேர்த்து நன்றாகக் குழையும்வரை சமைக்க வேண்டும்.
இப்போது மிளகாய்த்தூள், மல்லித்தூள், மஞ்சள்தூள் சேர்த்து எண்ணெய் பிரியும் வரை வதக்குங்கள். பிறகு ஸ்க்விட் துண்டுகள் மற்றும் தேவையான உப்பை சேர்த்து அதிக தீயில் சுமார் 5 நிமிடங்கள் சமைக்கவும்.
ரோஸ்டின் சுவையை அதிகரிக்கும் இறுதி கட்டம்
ஸ்க்விட் வெந்த பிறகு, கரம் மசாலாத்தூள், சோம்புத்தூள் மற்றும் மிளகுத்தூளை சேர்த்து மேலும் 5 நிமிடங்கள் நன்றாக வதக்குங்கள். இறுதியாக எலுமிச்சைச் சாறு சேர்த்து ஒரு நிமிடம் கிளறி இறக்கவும்.
மசாலா ஸ்க்விட் முழுவதும் ஒட்டிக்கொண்டு, லேசாக வறண்ட பதத்திற்கு வந்தவுடன் ரோஸ்ட் தயார். சூடாக பரிமாறினால் சுவை இன்னும் அருமையாக இருக்கும்.
சுவை அசத்த சில டிப்ஸ்
ஸ்க்விட்டை அதிக நேரம் சமைக்கக் கூடாது. அதிகமாக வெந்தால் அது ரப்பர் போல கடினமாகிவிடும். தேங்காய் எண்ணெயைப் பயன்படுத்தினால் கேரளா ஸ்டைல் மணம் கிடைக்கும். கடைசியில் சிறிது மிளகுத்தூள் மற்றும் எலுமிச்சைச் சாறு சேர்ப்பது ரோஸ்டின் சுவையை பல மடங்கு உயர்த்தும். இந்த ரோஸ்டை பரோட்டா, நெய் சோறு அல்லது சப்பாத்தியுடன் பரிமாறினால் உணவின் சுவை இன்னும் அதிகரிக்கும்.
