ஆபரேஷன் சிந்தூர்: இந்தியா- பாகிஸ்தான் யுத்தத்தில் சீனாவின் ‘ரகசிய ஆட்டம்’.. அம்பலப்படுத்திய அமெரிக்கா!

By Mathi

|

Published on 22 Nov 2026, 9:55 AM

Operation Sindoor- Pakistan-China-India-US

ஆபரேஷன் சிந்தூர் நடவடிக்கையின்போது இந்தியாவுக்கு எதிராக பாகிஸ்தானுக்கு ராணுவ உதவிகளை சீனா வழங்கியதாக அமெரிக்க நாடாளுமன்ற ஆணையத்தின் அறிக்கையில் அதிர்ச்சி தகவல்கள் இடம் பெற்றுள்ளன.

கடந்த 2025-ஆம் ஆண்டு ஏப்ரல் 22-ந் தேதி ஜம்மு காஷ்மீரின் பஹல்காமில் சுற்றுலாப் பயணிகள் மீது பயங்கரவாதிகள் நடத்திய தாக்குதலில் 26 பேர் கொல்லப்பட்டனர். இதற்குப் பதிலடியாக மே 7-ந் தேதி இந்திய ராணுவம் ஆபரேஷன் சிந்தூர் என்ற பெயரில் பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் உள்ள பயங்கரவாத முகாம்கள் மீது தாக்குதல் நடத்தியது.

ADVERTISEMENT

இதையடுத்து இந்தியா, பாகிஸ்தான் இடையே கடுமையான ராணுவ மோதல் ஏற்பட்டது. போர் விமானங்கள், ஏவுகணைகள், ட்ரோன்கள் மூலம் இரு நாடுகளும் தாக்குதல்களை நடத்தின. நான்கு நாட்கள் நீடித்த இந்த மோதல் மே 10-ந் தேதி முடிவுக்கு வந்தது.

இந்த மோதலின்போது பாகிஸ்தானுக்கு சீனா உதவியதாக இந்திய ராணுவ அதிகாரிகள் அப்போதே குற்றம்சாட்டினர். தற்போது அமெரிக்க நாடாளுமன்றத்துக்காகத் தயாரிக்கப்பட்ட அறிக்கை இந்த விவகாரத்தை மீண்டும் வெளிச்சத்துக்குக் கொண்டு வந்துள்ளது.

ADVERTISEMENT

அமெரிக்காவின் பொருளாதாரம் மற்றும் பாதுகாப்பு தொடர்பான அமெரிக்க – சீன ஆய்வு ஆணையம் (US-China Economic and Security Review Commission) நவம்பர் 18-ந் தேதி தனது ஆண்டு அறிக்கையை வெளியிட்டது.

அந்த அறிக்கையில் இந்தியா, சீனா, பாகிஸ்தான் இடையிலான உறவுகள் குறித்தும், ஆபரேஷன் சிந்தூர் நடவடிக்கையின்போது சீனாவின் பங்கு குறித்தும் விரிவாக ஆய்வு செய்யப்பட்டுள்ளது.

ADVERTISEMENT

அமெரிக்காவின் ஆய்வறிக்கையில் இடம்பெற்றுள்ள அதிர்ச்சித் தகவல்கள்:

  1. பொருளாதாரத்திலும் ராணுவத்திலும் வலிமையான நாடாக வளர்ந்து வரும் இந்தியாவைத் தனது ஆதிக்கத்துக்குப் போட்டியாக சீனா பார்க்கிறது.
  2. இந்தியாவின் வளர்ச்சியைக் கட்டுப்படுத்த பாகிஸ்தானை ராணுவ ரீதியாக வலுப்படுத்துவதைச் சீனா முக்கிய நடவடிக்கையாகப் பயன்படுத்துகிறது.
  3. ஆபரேஷன் சிந்தூர் நடவடிக்கையின்போது பாகிஸ்தானுக்கு சீனா ராணுவ மற்றும் தொழில்நுட்ப உதவிகளை வழங்கியது.
  4. இந்தியாவுடன் நேரடியாகப் போரிடாமல், பாகிஸ்தானுக்கு உதவுவதன் மூலம் இந்தியாவின் பாதுகாப்புக்கு சீனா நெருக்கடியை ஏற்படுத்துகிறது.
  5. கடந்த 5 ஆண்டுகளில் பாகிஸ்தான் வெளிநாடுகளிலிருந்து வாங்கிய ராணுவத் தளவாடங்களில் 81% சீனாவிலிருந்து பெறப்பட்டவை.
  6. சீனாவில் தயாரிக்கப்பட்ட போர் விமானங்கள், ஏவுகணைகள் மற்றும் பிற ஆயுதங்களை இந்தியாவுக்கு எதிராகப் பாகிஸ்தான் பயன்படுத்தியது. இதன் மூலம் தனது ஆயுதங்கள் உண்மையான போர்க்களத்தில் எப்படிச் செயல்படுகின்றன என்பதைச் சீனா அறிந்துகொண்டது.
  7. ஆபரேஷன் சிந்தூர் நடவடிக்கையின்போது இந்திய ராணுவத்தின் முக்கிய நகர்வுகள், தாக்குதலுக்குத் தயாராக இருந்த ஆயுதங்கள் பற்றிய தகவல்களைச் சீனா பாகிஸ்தானுக்கு வழங்கியதாக இந்திய ராணுவ அதிகாரிகள் குற்றம்சாட்டினர்.
  8. இந்தியா – பாகிஸ்தான் மோதல் நடைபெற்றபோது சீனப் பொறியாளர்கள் பாகிஸ்தானில் தங்கியிருந்து சீனத் தயாரிப்பு போர் விமானங்கள் மற்றும் ராணுவ உபகரணங்களுக்குத் தொழில்நுட்ப உதவி வழங்கினர்.
  9. சீனாவும் பாகிஸ்தானும் ராணுவ ஒத்துழைப்பை அதிகரிப்பதால் இந்தியா ஒரே நேரத்தில் மேற்கு எல்லையிலும் வடக்கு எல்லையிலும் தனது பாதுகாப்பை வலுப்படுத்த வேண்டிய நிலை உருவாகிறது.
  10. இந்தியத் தொழிற்சாலைகளுக்குத் தேவையான முக்கிய மூலப்பொருட்கள், இயந்திரங்கள் மற்றும் தொழில்நுட்ப உபகரணங்களின் விநியோகத்தில் சீனா அதிக செல்வாக்கு செலுத்துகிறது.
  11. இந்தியாவுக்கான ஏற்றுமதிக்குச் சீனா கட்டுப்பாடுகள் விதித்தால், இந்தியாவின் தொழில் உற்பத்தியும் வளர்ச்சியும் பாதிக்கப்படும்.
  12. இந்தியப் பெருங்கடலில் தனது கடற்படைச் செயல்பாடுகளைச் சீனா அதிகரித்து வருகிறது. இது இந்தியாவின் கடல்சார் பாதுகாப்புக்குப் புதிய சவால்களை உருவாக்குகிறது.
  13. இந்தியாவைச் சுற்றியுள்ள தெற்காசிய நாடுகளுடன் பொருளாதார மற்றும் ராணுவ உறவுகளை வலுப்படுத்தி, அந்தப் பிராந்தியத்தில் தனது செல்வாக்கைச் சீனா அதிகரித்து வருகிறது.
  14. சீனா – பாகிஸ்தான் ராணுவ ஒத்துழைப்பை எதிர்கொள்ள இந்தியாவுடன் அமெரிக்கா உளவுத் தகவல்களைப் பகிர்ந்துகொள்வதையும், இந்தியப் பெருங்கடலில் சீனக் கடற்படையின் நடவடிக்கைகளைக் கூட்டாகக் கண்காணிப்பதையும் அதிகரிக்க வேண்டும்.
  15. முக்கியமான தொழில்துறையில் இந்தியா- சீனாவைச் சார்ந்திருப்பதைக் குறைக்கவும், இந்தியாவின் உள்நாட்டு உற்பத்தி மற்றும் பாதுகாப்புத் திறனை வலுப்படுத்தவும் அமெரிக்கா உதவ வேண்டும். இவ்வாறு அந்த ஆய்வறிக்கையில் தெரிவிக்கப்பட்டுள்ளது.

உண்மையின் மூச்சு உங்கள் விரலில்

மின்னம்பலம் மக்களுக்கான தனது சமரசமற்ற செய்திப் பணியைத் தொடர்ந்திட துணை நில்லுங்கள்.

Mathi

மா.ச.மதிவாணன் (Mathivanan Maran- Mathi) 30 ஆண்டுகள் ஊடகத் துறை அனுபவம், அச்சு, இணையம், வானொலி, தொலைக்காட்சி ஊடகங்களில் பணியாற்றியவர்.

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!

Join Our Channel