ஐக்கிய நாடுகள் சபையின் மனித உரிமைகள் ஆணையத்தின் முன்னாள் ஆணையரான தென்னாப்பிரிக்கா வாழ் தமிழ் வம்சாவளியைச் சேர்ந்த நவநீதம் பிள்ளை அம்மையாருக்கு (வயது 85) 2026-ம் ஆண்டுக்கான அமைதிக்கான நோபல் பரிசு அறிவிக்கப்பட்டுள்ளது.
”உலக அமைதியை நிலைநாட்டவும், சர்வதேச சட்டங்களைப் பாதுகாக்கவும் மேற்கொண்ட முயற்சிகளுக்காக” நவநீதம் பிள்ளைக்கு அமைதிக்கான நோபல் பரிசு வழங்கப்படுவதாக நார்வே நோபல் குழு இன்று (அக்டோபர் 9) அறிவித்துள்ளது.
யார் இந்த நவநீதம் பிள்ளை?
தென்னாப்பிரிக்காவின் டர்பன் நகரில் 1941-ம் ஆண்டு செப்டம்பர் 23-ந் தேதி தமிழ் வம்சாவளிக் குடும்பத்தில் நவநீதம் பிள்ளை பிறந்தார். தென்னாப்பிரிக்காவில் இனவெறி ஆட்சி நிலவிய காலத்தில் வளர்ந்த இவர், சட்டம் படித்து வழக்கறிஞரானார்.
இனவெறி ஆட்சிக்கு எதிராகவும், மனித உரிமைகளுக்காகவும் சட்டப் போராட்டங்களை நடத்தினார். குறிப்பாக, தென்னாப்பிரிக்காவில் சிறையில் அடைக்கப்பட்டிருந்த அரசியல் கைதிகளின் உரிமைகளுக்காகப் போராடினார்.
1995-ம் ஆண்டு தென்னாப்பிரிக்க உயர்நீதிமன்ற நீதிபதியாக நியமிக்கப்பட்டார். பின்னர் ருவாண்டாவில் நடைபெற்ற இனப்படுகொலை தொடர்பான வழக்குகளை விசாரித்த ஐக்கிய நாடுகள் சபையின் சர்வதேச குற்றவியல் தீர்ப்பாயத்தில் நீதிபதியாகப் பணியாற்றினார்.
2003-ம் ஆண்டு சர்வதேச குற்றவியல் நீதிமன்றத்தின் நீதிபதியாகப் பொறுப்பேற்றார்.
2008-ம் ஆண்டு முதல் 2014-ம் ஆண்டு வரை ஐக்கிய நாடுகள் சபையின் மனித உரிமைகள் உயர் ஆணையராகப் பணியாற்றினார்.
இந்தக் காலகட்டத்தில் உலகின் பல்வேறு நாடுகளில் நடைபெற்ற மனித உரிமை மீறல்கள், போர்க்குற்றங்கள் தொடர்பாகக் குரல் கொடுத்தார்.
இலங்கையில் நடைபெற்ற இறுதிக்கட்டப் போரின்போது ஈழத் தமிழர்களுக்கு எதிராக நிகழ்த்தப்பட்ட இனப்படுகொலை, போர்க்குற்றங்கள், மனித உரிமை மீறல்கள் தொடர்பாக சர்வதேச விசாரணை நடத்தப்பட வேண்டும் என்றும் வலியுறுத்தினார். இதனால் உலகத் தமிழர்கள் மத்தியிலும் நவநீதம் பிள்ளை நன்கு அறியப்பட்டவர்.
சர்வதேச அளவில் மனித உரிமைகளுக்காக நீண்டகாலமாகப் பணியாற்றி வரும் தமிழ் வம்சாவளியைச் சேர்ந்த நவநீதம் பிள்ளைக்கு தற்போது அமைதிக்கான நோபல் பரிசு அறிவிக்கப்பட்டுள்ளது.
