தமிழ்நாட்டை முன்னேற்றும் சூப்பர் திட்டங்கள்: பொருளாதார அறிஞர்களிடம் ஆலோசனை கேட்ட ஸ்டாலின்

Published On:

| By Kavi

தமிழ்நாடு நிதிநிலை அறிக்கை மார்ச் 14-ஆம் தேதி தாக்கல் செய்யப்பட உள்ள நிலையில், சர்வதேச பொருளாதார வல்லுநர்கள் குழுவினருடன் முதல்வர் ஸ்டாலின் ஆலோசனை நடத்தினார். Stalin meeting with Economic

திமுக அரசு பதவியேற்றது முதல் தேர்தல் வாக்குறுதிகள் தொடர்ந்து நிறைவேற்றப்பட்டு வருகிறது. தேர்தல் வாக்குறுதியாக சொல்லப்படாத திட்டங்களும் செயல்படுத்தப்பட்டு வருகின்றன. தமிழக அரசின் முத்திரை திட்டங்களாக குறிப்பிடப்படும் மகளிர் உரிமைத் தொகை, புதுமைப் பெண், விடியல் பயணம், காலை உணவு திட்டம் உள்ளிட்டவற்றை உருவாக்கி அதை செயல்படுத்தும் விதம் குறித்து பொருளாதார வல்லுநர்களுடன் முதல்வர் ஸ்டாலின் குறிப்பிட்ட இடைவெளியில் ஆலோசனைகள் மேற்கொண்டு வருகிறார்.

அந்த வகையில் வரும் நிதி ஆண்டுக்கான பட்ஜெட் மார்ச் 14 தாக்கல் செய்யப்படும் நிலையில் நேற்று சர்வதேச பொருளாதார அறிஞர்களுடன் முதல்வர் ஸ்டாலின் காணொலி காட்சி மூலம் நேற்று (பிப்ரவரி 20) ஆலோசனை நடத்தினார்.

அந்த கூட்டத்தில் ரகுராம் ராஜன், ழான் த்ரேஸ், அரவிந்த் சுப்பிரமணியன், எஸ்தர் டஃப்லோ,  எஸ்.நாராயண், நிதி அமைச்சர் தங்கம் தென்னரசு, தலைமைச் செயலாளர் முருகானந்தம், நிதித்துறை முதன்மைச் செயலாளர் உதயச்சந்திரன் ஆகியோர் கலந்து கொண்டனர்.

அப்போது உரையாற்றிய முதல்வர் ஸ்டாலின் கடந்த மூன்று ஆண்டுகளாக, அரசின் பொருளாதாரக் கொள்கைகளையும், முன்னோடி நலத்திட்டங்களையும் வடிவமைத்து செயல்படுத்துவதில் பல்வேறு ஆலோசனைகளை வழங்கியதற்காக பொருளாதார அறிஞர்களுக்கு நன்றி தெரிவித்தார்.

இதற்கு முன்பு  பொருளாதார ஆலோசனைக் குழு கூட்டங்களில் முன்வைக்கப்பட்ட கருத்துக்களின் அடிப்படையில்  செயல்படுத்தப்பட்டுள்ள பல்வேறு திட்டங்கள், மக்களிடம் நல்ல வரவேற்பை பெற்றுள்ளதாக முதல்வர் ஸ்டாலின் குறிப்பிட்டார்.

மகளிர் உரிமைத் தொகை

தமிழ்நாட்டில் ஒரு கோடியே 14 லட்சத்து 59 ஆயிரம் தகுதி வாய்ந்த குடும்பத் தலைவிகள் அனைவருக்கும், மாதந்தோறும் ஆயிரம் ரூபாய் மகளிர் உரிமைத் தொகையை வழங்கி, பெண்களுக்கு அதிகாரத்தையும், பொருளாதார உரிமையையும் வழங்கியிருக்கும் கலைஞர் மகளிர் உரிமைத் திட்டத்தின் வெளிப்படையான மற்றும் தரவுகளின் அடிப்படையிலான பயனாளிகள் தேர்வு முறை எல்லோராலும் பாராட்டப்பட்டிருக்கிறது.

புதுமைப் பெண் திட்டம்

அரசுப் பள்ளிகளில் 6-ஆம் வகுப்பு முதல் 12-ஆம் வகுப்பு வரை பயின்று தேர்ச்சி பெற்ற மாணவிகளுக்கு மாதந்தோறும் ஆயிரம் ரூபாய் வழங்கும் “புதுமைப் பெண்” திட்டத்தால், இடைநிற்றல் குறைந்து, மாணவிகளின் உயர்கல்வி சேர்க்கை உயர்ந்திருக்கிறது.

தமிழ்நாட்டு இளைஞர்களுக்கு தொழில்துறை சார்ந்த வேலைவாய்ப்புகளைப் பெறுவதற்குத் தேவையான திறன்களை வழங்கியுள்ள “நான் முதல்வன்” திட்டம், சுமார் 2 லட்சத்து 60 ஆயிரம் மாணவர்களுக்கு வேலைவாய்ப்பை பெற்றுத் தந்திருக்கிறது. இந்திய அளவில் மற்ற மாநிலங்களுக்கும் முன்னோடியாக தமிழ்நாடு திகழ்ந்து வருகிறது.

விடியல் பயணம் திட்டம்

அடுத்ததாக, 17 லட்சத்து 53 ஆயிரம் மாணவர்களுக்குப் பயன் அளிக்கும்  ‘முதலமைச்சரின் காலை உணவுத் திட்டம்’, மாணவர்களின் வருகையையும், ஊட்டச்சத்து நிலையையும், கற்றல் திறனையும் மேம்படுத்தியிருக்கிறது.

நான் ஏற்கெனவே இங்கு பலமுறை சொன்னது போன்று, விடியல் பயணத் திட்டம் பெண்களின் பணிச்சூழல் பங்களிப்பை மேம்படுத்தி, அவர்களின் பொருளாதார முன்னேற்றத்திற்கு வித்திட்டிருக்கிறது.

இல்லம் தேடி கல்வி திட்டம்

மருத்துவத் துறையில் செயல்படுத்தப்பட்டிருக்கும் மக்களைத் தேடி மருத்துவம் திட்டமும், பள்ளிக் கல்வித் துறையில் செயல்படுத்தப்படும் இல்லம் தேடி கல்வி திட்டமும், தேசிய அளவில் மட்டுமல்லாமல், சர்வதேச அளவிலும் பாராட்டுக்களை பெற்றிருக்கிறது.

ஒரு டிரில்லியன் டாலர் பொருளாதாரம்

இப்படி பல்வேறு சமூகநலத் திட்டங்களை நிறைவேற்றி வரும் அதே வேளையில், தமிழ்நாட்டின் பொருளாதார வளர்ச்சியையும் வேகப்படுத்தி, 2030-ஆம் ஆண்டுக்குள் தமிழ்நாடு ஒரு டிரில்லியன் டாலர் பொருளாதாரம் என்ற இலக்கை அடைய வேண்டும் என்று முனைப்போடு செயல்பட்டு வருகிறோம்.

அதிகரிக்கும் வேலைவாய்ப்பு!

கடந்த நான்கு ஆண்டுகளில் சுமார் 40 லட்சம் பேர் வேலைவாய்ப்பு பெற்றிருக்கிறார்கள். பல ஆண்டு காலமாக, தமிழ்நாட்டில் சிறந்து விளங்கும் மோட்டார் வாகன உற்பத்தி, ஜவுளி உற்பத்தி, தோல்பொருட்கள் உற்பத்தி போன்ற துறைகள் மட்டுமல்லாமல், தோல் அல்லாத காலணி உற்பத்தி, புதுப்பிக்கத்தக்க எரிசக்தித் துறைப் பொருட்கள் உற்பத்தி, உலகளாவிய திறன் மையங்கள் ஆகியவற்றை புதிய வளர்ச்சித் துறைகளாக முன்னிறுத்தி, இந்தத் துறைகளிலும், இந்திய அளவில் அதிக முதலீடுகளை ஈர்த்திருக்கிறோம். இப்படிப்பட்ட தொழில் வளர்ச்சிக்கான பல்வேறு கட்டமைப்புத் திட்டங்களையும் செயல்படுத்தி வருகிறோம்.

நான் முன்பே சொன்னது போன்று, நலத்திட்டங்களையும் கட்டமைப்பு மேம்படுத்துதலையும் ஒரே நேரத்தில் செய்வதற்குத் தேவையான ஆதாரங்களை நடவடிக்கைகளை எடுத்திருக்கிறோம்.

அண்மையில், தமிழ்நாடு போன்ற வளர்ச்சியடைந்த மாநிலங்களின் நிதி பகிர்வு குறித்த நமது நியாயமான கோரிக்கைகளை முன்னிறுத்தி, ஒன்றிய அரசின் 16-ஆவது நிதிக் குழுவிடம் கோரிக்கை மனுவை அளித்தோம். ஒரு முற்போக்கான அணுகுமுறையை இந்த நிதி ஆணையம் கடைபிடிக்கும் என்று எதிர்நோக்கியுள்ளோம்.

மாநில அரசுகளின் நிதி நிலையில் பெரும் தாக்கத்தை ஏற்படுத்தக்கூடிய ஓய்வூதியத் திட்டத்தில், ஒன்றிய அரசு கொண்டு வந்திருக்கும் மாற்றங்களையும் ஆய்வு செய்துக்கொண்டு இருக்கிறோம். இத்தகைய சூழலில், தமிழ்நாட்டின் முன்னேற்றத்தை அடுத்தகட்டத்திற்கு எடுத்துச் செல்வதற்கான உங்களின் பரிந்துரைகளையும், ஆலோசனைகளையும் நான் எதிர்நோக்கியுள்ளேன்.

கடந்த மூன்றரை ஆண்டுகளில் இந்த அரசு எடுத்த பல்வேறு முன்முயற்சிகளின் பயன்களை நிலைக்கச் செய்யவும், வரும் ஆண்டுகளில் நம் மக்களின் எதிர்காலத்தை மேலும் வளம் மிக்கதாக மாற்றவும், தேவையான பயனுள்ள ஆலோசனைகளை நீங்கள் வழங்க வேண்டும்” என்று கூறினார். Stalin meeting with Economic

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!
Join Our Channel
Share