மதுரையின் ரோட்டுக்கடை உணவுகள் என்றாலே காரம், மணம், சுவை என்று தனி ரசிகர்கள் இருக்கிறார்கள்.
அந்த பட்டியலில் இடம்பிடித்திருக்கும் பிரபலமான ரெசிபிகளில் ஒன்று மதுரை ஸ்டைல் முட்டை மாஸ்.
வேகவைத்த முட்டையை காரசாரமான மசாலாவுடன் வதக்கி செய்யப்படும் இந்த டிஷ், பரோட்டா, தோசை, இட்லி, சப்பாத்தி என எதனுடன் சேர்த்துச் சாப்பிட்டாலும் அசத்தலாக இருக்கும்.
வீட்டிலேயே ஹோட்டல் சுவையில் இந்த ரெசிபியை எளிதாக செய்யலாம்.
தேவையான பொருட்கள்
- முட்டை – 6 (வேகவைத்தது)
- பெரிய வெங்காயம் – 2 (பொடியாக நறுக்கியது)
- சின்ன வெங்காயம் – 15
- தக்காளி – 2
- பச்சை மிளகாய் – 2
- இஞ்சி பூண்டு விழுது – 1 டேபிள்ஸ்பூன்
- கறிவேப்பிலை – 1 கொத்து
- புதினா – சிறிதளவு
- கொத்தமல்லித்தழை – சிறிதளவு
- சோம்பு – 1 டீஸ்பூன்
- தேங்காய் எண்ணெய் அல்லது நல்லெண்ணெய் – 3 டேபிள்ஸ்பூன்
மசாலா பொருட்கள்:
- காஷ்மீரி மிளகாய்த்தூள் – 2 டீஸ்பூன்
- கார மிளகாய்த்தூள் – 1 டீஸ்பூன்
- மல்லித்தூள் – 2 டீஸ்பூன்
- சீரகத்தூள் – 1 டீஸ்பூன்
- மிளகுத்தூள் – 1½ டீஸ்பூன்
- மஞ்சள்தூள் – ¼ டீஸ்பூன்
- உப்பு – தேவையான அளவு
எப்படி செய்வது?
முதலில் முட்டைகளை வேகவைத்து தோலை நீக்கி, ஒவ்வொரு முட்டையையும் துண்டுகளாக வெட்டிக்கொள்ளுங்கள். பிறகு ஒரு கனமான கடாய் அல்லது இரும்புத் தவாவில் எண்ணெய் ஊற்றி சூடானதும் சோம்பைத் தாளிக்கவும்.
அதில் சின்ன வெங்காயம், பெரிய வெங்காயம் சேர்த்து பொன்னிறமாகும் வரை வதக்குங்கள். பின்னர் பச்சை மிளகாய், கறிவேப்பிலை, இஞ்சி பூண்டு விழுது சேர்த்து பச்சை வாசனை போகும் வரை வதக்கவும்.
அடுத்து தக்காளியை சேர்த்து நன்கு குழையும்வரை சமைக்க வேண்டும். பிறகு மிளகாய்த்தூள், மல்லித்தூள், சீரகத்தூள், மஞ்சள்தூள், உப்பு ஆகியவற்றை சேர்த்து எண்ணெய் பிரியும் வரை வதக்குங்கள்.
இப்போது புதினா மற்றும் கொத்தமல்லித்தழையை சேர்த்து கிளறி, வெட்டி வைத்திருக்கும் முட்டைகளை சேர்க்கவும். கரண்டியால் லேசாக முட்டையை நசுக்கி, மசாலாவுடன் நன்றாக கலந்து இரண்டு நிமிடங்கள் அதிக தீயில் வதக்க வேண்டும்.
இறுதியாக மிளகுத்தூள் தூவி, சிறிதளவு தேங்காய் எண்ணெயை மேலே ஊற்றி ஒரு நிமிடம் கிளறினால், மதுரை ஸ்டைல் முட்டை மாஸ் தயார்.
ஹோட்டல் சுவை வர இந்த டிப்ஸை மறக்காதீர்கள்
இந்த ரெசிபியில் சின்ன வெங்காயம் பயன்படுத்தினால் சுவை இன்னும் அதிகரிக்கும். தேங்காய் எண்ணெயில் சமைத்தால் மதுரை ஹோட்டல்களின் தனித்துவமான மணம் கிடைக்கும். கடைசியில் மிளகுத்தூளை சேர்ப்பது முட்டை மாஸுக்கு காரமான சுவையையும் நறுமணத்தையும் அதிகரிக்கும்.
மேலும், முட்டையை முழுமையாக நசுக்காமல் சிறிதளவு துண்டுகளாக இருக்கும்படி வதக்கினால் உணவின் அமைப்பும் (Texture) சிறப்பாக இருக்கும்.
