முடி உதிர்வு, தலைமுடி வறட்சி போன்ற பிரச்சனைகள் பலருக்கும் கவலையை ஏற்படுத்துகின்றன. இந்நிலையில், பழங்கால ஜப்பானியர்கள் கூந்தலைப் பராமரிக்க இயற்கையான பொருட்களைப் பயன்படுத்திய சில முறைகள் மீண்டும் கவனம் பெற்றுள்ளன.
அதில் முக்கியமானது கெமிலியா எண்ணெய். ஜப்பானில் இது ‘சுபாகி’ என்று அழைக்கப்படுகிறது. ஆன்டிஆக்ஸிடன்ட்கள் மற்றும் அத்தியாவசிய கொழுப்பு அமிலங்கள் உள்ள இந்த எண்ணெயை ஷாம்பு போடுவதற்கு முன்பாகவோ அல்லது லீவ்-இன் கண்டிஷனராகவோ பயன்படுத்தும் பழக்கம் இருந்ததாகக் கூறப்படுகிறது.
முடிக்கு அரிசி நீர்
சமையலுக்கு அரிசியைக் கழுவிய பிறகு கிடைக்கும் நீரை பலரும் அப்படியே கீழே ஊற்றிவிடுவார்கள். ஆனால் ஜப்பானியர்களின் பாரம்பரிய கூந்தல் பராமரிப்பில் இதற்கும் இடம் இருந்துள்ளது.
அரிசி நீரில் உள்ள ஸ்டார்ச் தலைமுடிக்கு நெகிழ்வுத்தன்மையை அளிக்க உதவும் என்று கூறப்படுகிறது. இதனால் முடியை அலசுவதற்கு இதைப் பயன்படுத்தும் முறை பிரபலமானது.
கிரீன் டீயும் கூந்தல் பராமரிப்பும்
கிரீன் டீயைக் குடிப்பதற்காக மட்டுமே பயன்படுத்த வேண்டியதில்லை என்ற கருத்தும் இந்த முறைகளில் இடம்பெறுகிறது. தலைமுடியை அலசிய பிறகு கிரீன் டீ நீரை இறுதியாகப் பயன்படுத்தும் பழக்கம் குறித்தும் தகவல்கள் வெளியாகியுள்ளன.
இது உச்சந்தலையை புத்துணர்ச்சியாக வைத்திருக்க உதவும் எனக் கூறப்படுகிறது. இருப்பினும், இத்தகைய வீட்டு முறைகள் முடி உதிர்வுக்கான மருத்துவ சிகிச்சைக்கு மாற்றாக கருதப்படக்கூடாது.
உணவிலும் கவனம் அவசியம்
கூந்தலின் ஆரோக்கியம் வெளிப்புற பராமரிப்புடன் மட்டும் முடிந்துவிடுவதில்லை. உடலுக்குத் தேவையான ஊட்டச்சத்துகளும் முக்கியம். ஜப்பானிய உணவுப் பழக்கத்தில் கடற்பாசி, மீன் உள்ளிட்ட ஊட்டச்சத்து நிறைந்த உணவுகளுக்கும் இடமுள்ளதாகக் குறிப்பிடப்படுகிறது.
தொடர்ந்து அதிகமாக முடி உதிர்ந்தாலோ, குறிப்பிட்ட இடங்களில் வழுக்கை ஏற்படத் தொடங்கினாலோ, காரணத்தைக் கண்டறிய மருத்துவரை அணுகுவது நல்லது.
