ஒரு கூட்டத்தின் முன்னாடி நின்னு பேசணும்னாலே பல பேருக்குக் கை கால் நடுங்கும், தொண்டை வறண்டு போகும், பேசுறது எல்லாமே மறந்து போகும். உலகத்துல மரணத்திற்கு அடுத்தபடியா மக்கள் அதிகம் பயப்படுற விஷயம் இந்த மேடை பயம் (Glossophobia) தான் என்று பல ஆய்வுகள் கூறுகின்றன.
ஆனால், உலகப் புகழ்பெற்ற பேச்சாளர்கள் கூட ஆரம்பத்தில் இந்த மேடை பயத்தை அனுபவித்தவர்கள்தான். இது ஒரு நோயோ அல்லது பலவீனமோ அல்ல; முறையான பயிற்சிகள் மூலம் மிக எளிதாக வெல்லக்கூடிய ஒரு தற்காலிக பயம் மட்டுமே. மேடையைக் கண்டு அஞ்சாமல், அதை உங்களது சாம்ராஜ்யமாக மாற்றுவதற்கான எளிய வழிகள் இதோ!
பயத்தின் பின்னணியில் இருக்கும் மூளையின் விளையாட்டு
நூற்றுக்கணக்கான கண்கள் நம்மை மட்டுமே உற்றுப் பார்க்கும்போது, நமது மூளையில் உள்ள ‘அமிக்டலா’ (Amygdala) என்ற பகுதி அதை ஒரு ஆபத்தான சூழ்நிலையாகத் தவறாகப் புரிந்து கொள்கிறது. உடனே உடலை உஷார்படுத்த அட்ரினலின் ஹார்மோனை ரத்தத்தில் பாய்ச்சுகிறது. இதனால்தான் இதயம் வேகமாகத் துடிப்பதும், கைகள் நடுங்குவதும் நடக்கிறது.
இது மூளை காட்டும் ஒரு ‘பொய் அலாரம்’ என்பதை முதலில் புரிந்து கொள்ளுங்கள். இந்த உடல் மாற்றங்களைக் கண்டு பயப்படாமல், “என் உடல் பேசத் தயாராகிவிட்டது” என்று நேர்மறையாக எண்ணத் தொடங்குங்கள்.
தயாரிப்புதான் உங்களது ஆகச்சிறந்த ஆயுதம்
மேடை பயத்தை 80% குறைக்கும் ஒரே விஷயம் – நீங்கள் என்ன பேசப் போகிறீர்கள் என்பதில் உங்களுக்கு இருக்கும் தெளிவுதான்.
- கருத்தை மட்டும் நினவில் வையுங்கள்: பேச வேண்டிய விஷயங்களை வார்த்தைக்கு வார்த்தை மனப்பாடம் செய்யாதீர்கள். அப்படிச் செய்தால் ஒரு வார்த்தை மறந்தாலும் மொத்தப் பேச்சும் முடங்கிவிடும். அதற்குப் பதிலாக, முக்கியக் கருத்துக்களை (Bullet points) மட்டும் நினைவில் வையுங்கள்.
- வீடியோ பதிவு: கண்ணாடியின் முன்னாடி நின்று பேசிப் பழகுங்கள். அல்லது உங்களது மொபைல் போனில் நீங்களே பேசுவதை வீடியோ பதிவு செய்து, எங்குத் தயக்கம் ஏற்படுகிறது என்று பார்த்து அதைச் சரிசெய்யுங்கள்.
முதல் இரண்டு நிமிடங்களின் ரகசியம்
மேடையில் ஏறியவுடன் முதல் 2 நிமிடங்களில்தான் பயத்தின் வீரியம் உச்சத்தில் இருக்கும். அந்த இரண்டு நிமிடங்களைக் கடந்துவிட்டால், மூளை இயல்பு நிலைக்குத் திரும்பிவிடும்.
ஸ்மார்ட் தொடக்கம்: பேச்சைத் தொடங்கும்போது ஒரு சுவாரசியமான குட்டிக் கதை, ஒரு கேள்வி, அல்லது ஒரு அதிரடியான பழமொழியுடன் தொடங்குங்கள். இது ஆடியன்ஸை உங்களோடு ஈர்ப்பதுடன், உங்களது ஆரம்பக் கட்டப் பதற்றத்தையும் (Initial anxiety) மறைக்க உதவும்.
உடலை அமைதிப்படுத்தும் எளிய உத்திகள்
- ஆழ்ந்த மூச்சு (Deep Breathing): மேடைக்குச் செல்வதற்கு 5 நிமிடங்களுக்கு முன்னால், கண்களை மூடி ஆழமாக மூச்சை உள்ளே இழுத்து மெதுவாக வெளியில் விடுங்கள். இது வேகமான இதயத் துடிப்பை உடனடியாகக் கட்டுக்குள் கொண்டுவரும்.
- நெற்றிப் பொட்டு உத்தி: ஆடியன்ஸின் கண்களை நேருக்கு நேர் பார்த்துப் பேசப் பயமாக இருந்தால், அவர்களது இரு புருவங்களுக்கு நடுவே உள்ள பகுதியை (Forehead) பார்த்துப் பேசுங்கள். ஆடியன்ஸிற்கு நீங்கள் தங்களைப் பார்த்துப் பேசுவது போலவே தோன்றும், உங்களுக்கும் பயம் இருக்காது.
- தண்ணீர் பருகுங்கள்: மேடைக்கு ஏறும் முன் சில துளிகள் குளிர்ந்த தண்ணீரைக் குடியுங்கள். இது வறண்ட தொண்டையைச் சரிசெய்து குரலில் நடுக்கம் ஏற்படுவதைத் தடுக்கும்.
சுய விமர்சனத்தைக் கைவிடுங்கள்
மேடையில் இருக்கும்போது “நான் எப்படி இருக்கிறேன்?”, “என் உடை நன்றாக உள்ளதா?”, “நான் தப்பாகப் பேசிவிடுவேனோ?” என்று உங்களைப் பற்றியே சிந்திப்பதை நிறுத்துங்கள்.
ஆடியன்ஸ் உங்களது தவறுகளைக் கண்டுபிடிக்க அங்கே வரவில்லை; நீங்கள் என்ன சொல்லப் போகிறீர்கள் என்பதைக் கேட்கவே வந்துள்ளனர். உங்கள் கவனத்தை ‘உங்களை அழகாகக் காட்டுவதில்’ இருந்து மாற்றி, ‘நல்ல தகவல்களைக் கொடுப்பதில்’ (Focus on value, not perfection) மட்டும் வையுங்கள். ஒரு சிறிய தப்பு நடந்தாலும் பரவாயில்லை, புன்னகையோடு அதைத் திருத்திக் கொண்டு தொடர்ந்து பேசுங்கள்!
நன்றி: ஸ்ரீவித்யா மாரியப்பன், எழுத்தாளர் மற்றும் தொடர்பாடல் நிபுணர்
