ஹோட்டலில் இட்லி அல்லது தோசையுடன் பரிமாறப்படும் சிவப்பு நிற கார சட்னிக்கு தனி ரசிகர்கள் இருக்கிறார்கள்.
தேங்காய் சட்னியை விட இந்த சட்னியை கூடுதலாக கேட்டு வாங்குபவர்களும் உண்டு. தக்காளி, வெங்காயம், பூண்டு மற்றும் காய்ந்த மிளகாய் ஆகியவற்றை அடிப்படையாகக் கொண்டு தயாரிக்கப்படும் இந்த சட்னியை வீட்டிலேயே மிகக் குறைந்த நேரத்தில் செய்யலாம்.
குறிப்பாக, பருப்பு வகைகளை சரியான அளவில் சேர்த்து வறுப்பதுதான் அதன் ஹோட்டல் சுவைக்கு முக்கியமான ரகசியங்களில் ஒன்று.
தேவையான பொருட்கள்
2 நடுத்தர அளவு பழுத்த தக்காளி, 2 சிறிய பெரிய வெங்காயம், 5 பூண்டு பற்கள், 1½ டீஸ்பூன் உளுத்தம்பருப்பு, ½ டீஸ்பூன் கடலைப்பருப்பு மற்றும் 4 காய்ந்த மிளகாய் தேவை.
இதனுடன் ½ டீஸ்பூன் மிளகாய்த்தூள், தேவையான அளவு உப்பு, தாளிக்க சிறிதளவு கடுகு மற்றும் கறிவேப்பிலை எடுத்துக் கொள்ள வேண்டும். நல்ல சிவப்பு நிறம் வேண்டுமெனில் காஷ்மீரி மிளகாய் அல்லது பைடகி மிளகாயை பயன்படுத்தலாம்.
கார சட்னி செய்வது எப்படி?
முதலில் கடாயில் 2 டேபிள்ஸ்பூன் எண்ணெய் ஊற்றி சூடானதும் உளுத்தம்பருப்பு, கடலைப்பருப்பு, காய்ந்த மிளகாய் மற்றும் பூண்டை சேர்த்து வறுக்க வேண்டும். பருப்பு பொன்னிறமாக மாறியதும் நறுக்கிய வெங்காயத்தை சேர்த்து நன்றாக வதக்கவும்.
வெங்காயம் கண்ணாடி பதத்திற்கு வந்ததும் தக்காளி, மிளகாய்த்தூள் மற்றும் உப்பு சேர்த்து தக்காளி நன்றாக குழையும் வரை சமைக்க வேண்டும். அடுப்பை அணைத்து, கலவையை சிறிது நேரம் ஆறவிட்டு மிக்ஸியில் தேவையான அளவு தண்ணீர் சேர்த்து மென்மையான விழுதாக அரைத்துக் கொள்ள வேண்டும்.
ஹோட்டல் சுவைக்கான முக்கிய டிப்ஸ்
அரைத்த சட்னியை மீண்டும் கடாயில் ஊற்றி அதிகமாகக் கொதிக்க விட வேண்டியதில்லை. அதற்குப் பதிலாக, தனியாக சிறிது எண்ணெய் சூடாக்கி கடுகு மற்றும் கறிவேப்பிலை தாளித்து சட்னியில் கொட்டினால் நல்ல மணம் கிடைக்கும்.
காரத்தை அதிகமாக விரும்புபவர்கள் மிளகாயின் அளவை அதிகரிக்கலாம். கொத்தமல்லித்தழை, புதினா அல்லது சிறிதளவு துருவிய தேங்காயையும் சேர்த்து வேறு சுவையில் தயாரிக்கலாம். ஆனால் பருப்பு அளவை அதிகப்படுத்தினால் சட்னியின் சுவை மாறி, மிகவும் கெட்டியாகிவிடும் என்பதால் அளவைக் கவனிப்பது முக்கியம்.
இட்லி, தோசைக்கு மட்டுமல்ல!
சூடான இட்லி மற்றும் மொறுமொறுப்பான தோசையுடன் இந்த கார சட்னி அட்டகாசமான காம்பினேஷன். அதேபோல் அடை, பணியாரம், பொங்கல் போன்ற டிபன் வகைகளுடனும் பரிமாறலாம். சுமார் 15 நிமிடங்களில் தயாராகிவிடுவதால், காலை உணவுக்கு அவசரமாக சைடிஷ் செய்ய வேண்டிய நேரத்திலும் இந்த ரெசிபி கைகொடுக்கும்.
