ஒரு நாளில் பல மணி நேரங்களை வேலை செய்யும் மேசையில்தான் செலவிடுகிறோம். ஆனால் அந்த மேசை முழுவதும் காகிதங்கள், பேனாக்கள், சார்ஜர்கள், காபி கப், தேவையில்லாத பொருட்கள் என குவிந்து கிடந்தால், வேலை செய்வதற்கான ஆர்வமே குறைந்துவிடலாம்.
ஒழுங்காக அமைக்கப்பட்ட டெஸ்க் பார்ப்பதற்கு அழகாக இருப்பதோடு மட்டுமல்லாமல், தேவையான பொருட்களை விரைவாகக் கண்டுபிடிக்கவும், கவனச்சிதறலைக் குறைக்கவும் உதவும்.
குறிப்பாக வேலை தொடர்பான முக்கியமான ஆவணங்கள் எங்கு இருக்கின்றன என்பது தெளிவாக இருந்தால், தேவையில்லாமல் நேரத்தை தேடுவதில் செலவிட வேண்டியதில்லை.
உங்கள் அலுவலக டெஸ்க்காக இருந்தாலும் சரி, வீட்டில் இருக்கும் வேலை செய்யும் இடமாக இருந்தாலும் சரி, அதை எளிதாக ஒழுங்குபடுத்த இந்த 10 வழிகளை முயற்சி செய்யலாம்.
1. முதலில் டெஸ்க்கை முழுவதுமாக காலி செய்யுங்கள்
ஒழுங்குபடுத்துவதற்கு முன்பு மேசையில் இருக்கும் ஒவ்வொரு பொருளையும் அகற்றுங்கள். கணினி, மானிட்டர், கீபோர்டு உள்ளிட்டவற்றையும் முடிந்தவரை ஓரமாக வைத்து, மேசையின் மேற்பரப்பை நன்றாக சுத்தம் செய்யுங்கள்.
அதன்பிறகு பொருட்களைப் பார்த்து, எவை தினமும் தேவை, எவை எப்போதாவது மட்டுமே தேவை, எவை தேவையே இல்லை என்று பிரிக்கலாம்.
2. தினமும் பயன்படுத்தும் பொருட்களை மட்டும் மேலே வையுங்கள்
டெஸ்க் மீது இருக்கும் ஒவ்வொரு பொருளுக்கும் ஒரு காரணம் இருக்க வேண்டும். தினமும் பயன்படுத்தாத பேனாக்கள், பழைய ஆவணங்கள், கூடுதல் ஸ்டேஷனரி போன்றவற்றை டிராயர் அல்லது அலமாரிக்கு மாற்றுங்கள்.
மேசையின் மேற்பரப்பு வேலை செய்வதற்கான இடமாக இருக்கட்டும்; கிடங்காக மாறிவிடக் கூடாது.
3. ஒவ்வொரு பொருளுக்கும் ஒரு நிரந்தர இடம் கொடுங்கள்
பேனா எங்கே? சார்ஜர் எங்கே? முக்கியமான ஆவணம் எங்கே? என்று தினமும் தேட வேண்டிய நிலை இருந்தால், உங்கள் டெஸ்க் இன்னும் சரியாக ஒழுங்குபடுத்தப்படவில்லை என்பதற்கான அறிகுறிதான்.
பயன்படுத்திய பொருளை மீண்டும் அதற்கான இடத்திலேயே வைக்கும் பழக்கத்தை உருவாக்குங்கள். இதனால் நாள் முடிவில் டெஸ்க்கை சுத்தம் செய்வதும் எளிதாகிவிடும்.
4. சிறிய பொருட்களுக்கு ஆர்கனைசர்களை பயன்படுத்துங்கள்
பேப்பர் கிளிப், ரப்பர், ஸ்டிக்கி நோட்ஸ், பேனாக்கள் போன்ற சிறிய பொருட்கள் அதிகமாக இருந்தால் டெஸ்க் விரைவில் குழப்பமாகிவிடும்.
இதற்காக சிறிய டிரே, டிராயர் ஆர்கனைசர் அல்லது பென் ஹோல்டர் போன்றவற்றை பயன்படுத்தலாம். ஒரே வகையான பொருட்களை ஒன்றாக வைத்திருப்பது அவற்றைத் தேடும் நேரத்தையும் குறைக்கும்.
5. சார்ஜர் மற்றும் கேபிள்களை ஒழுங்குபடுத்துங்கள்
மேசையின் கீழே சிக்கிக்கிடக்கும் கேபிள்கள் பார்ப்பதற்கு மட்டுமல்ல, பயன்படுத்துவதற்கும் தொந்தரவாக இருக்கும்.
கேபிள் கிளிப்புகள் அல்லது கேபிள் டை பயன்படுத்தி ஒவ்வொரு வயரையும் தனித்தனியாக ஒழுங்குபடுத்துங்கள். அடிக்கடி பயன்படுத்தாத சார்ஜர்களை டிராயரில் வைத்தால் மேசையும் சுத்தமாகத் தெரியும்.
6. ஆவணங்களுக்கு தனி இடம் ஒதுக்குங்கள்
முக்கியமான ஆவணங்கள் அனைத்தையும் ஒரே குவியலாக மேசையில் போட்டு வைப்பதைத் தவிர்க்கவும். புதிதாக வந்த ஆவணங்கள், முடிக்க வேண்டியவை, ஏற்கனவே முடிக்கப்பட்டவை என்று தனித்தனியாகப் பிரிக்கலாம்.
அதிகமான கோப்புகள் இருந்தால் ஃபைல் கேபினட் அல்லது சிறிய ஷெல்ஃப் பயன்படுத்துவது நல்லது.
7. ‘Inbox’ மற்றும் ‘Outbox’ முறையை முயற்சி செய்யுங்கள்
வேலை தொடர்பான புதிய ஆவணங்கள் அல்லது கோரிக்கைகளுக்கு ஒரு தனி ‘Inbox’ டிரே வைத்துக்கொள்ளலாம். முடிக்கப்பட்ட ஆவணங்களுக்கு ‘Outbox’ என மற்றொரு இடத்தை ஒதுக்கலாம்.
இதனால் எந்த வேலை இன்னும் செய்யப்படவில்லை, எது முடிந்துவிட்டது என்பதை ஒரே பார்வையில் தெரிந்துகொள்ள முடியும். ஆனால் Inbox-ஐ தினமும் ஒருமுறை சரிபார்ப்பது அவசியம்.
8. டெஸ்க்கை முழுவதுமாக அலங்கரிக்க வேண்டாம்
உங்கள் வேலை செய்யும் இடத்தில் தனிப்பட்ட புகைப்படம், சிறிய செடி அல்லது உங்களுக்கு பிடித்த ஒரு பொருள் போன்றவற்றை வைத்துக்கொள்ளலாம்.
ஆனால் அதிகமான அலங்காரப் பொருட்கள் கவனத்தை திசைதிருப்பக்கூடும். குறைவான பொருட்களுடன் நேர்த்தியாக வைத்திருப்பதே சிறந்தது.
9. நோட்டுப் புத்தகத்தை அருகில் வைத்திருங்கள்
வேலை செய்யும்போது திடீரென நினைவுக்கு வரும் விஷயங்களை எழுதிக்கொள்ள ஒரு நோட்டுப் புத்தகம் அருகில் இருப்பது பயனுள்ளதாக இருக்கும்.
To-do list, முக்கியமான நினைவூட்டல்கள் அல்லது அன்றைய வேலைகளை அதில் குறித்துக்கொள்ளலாம். இதனால் சிறு காகிதத் துண்டுகளில் குறிப்புகள் எழுதிக் குவிக்கும் பழக்கமும் குறையும்.
10. தினமும் சில நிமிடங்கள் சுத்தம் செய்யுங்கள்
ஒரு முறை டெஸ்க்கை ஒழுங்குபடுத்திவிட்டால் வேலை முடிந்துவிடாது. ஒவ்வொரு நாளின் முடிவிலும் சில நிமிடங்கள் செலவிட்டு தேவையில்லாத காகிதங்களை அகற்றி, பொருட்களை அவற்றின் இடத்தில் வைத்து, அடுத்த நாளுக்கான டெஸ்க்கை தயார் செய்யுங்கள்.
வாரத்திற்கு ஒருமுறை டெஸ்க்கை முழுமையாக மறுபரிசீலனை செய்து தேவையற்ற பொருட்களை அகற்றும் பழக்கத்தையும் உருவாக்கலாம்.
குறைவான குப்பை… நிறைகுண உழைப்பு!
ஒழுங்கான டெஸ்க் என்பது வெறும் அழகுக்காக மட்டுமல்ல. தேவையான பொருட்களை எளிதாகக் கண்டுபிடிப்பது, வேலை நேரத்தை மிச்சப்படுத்துவது, கவனச்சிதறலைக் குறைப்பது போன்ற பல நன்மைகளைத் தரும்.
எல்லாவற்றையும் ஒரே நாளில் மாற்ற வேண்டிய அவசியமில்லை. இன்று மேசையை காலி செய்து தேவையற்றவற்றை அகற்றுங்கள். நாளை கேபிள்களை ஒழுங்குபடுத்துங்கள். அடுத்ததாக ஆவணங்களுக்குத் தனி இடம் கொடுங்கள். இப்படியாக சிறிய மாற்றங்களை தொடர்ந்து செய்தாலே, உங்கள் டெஸ்க் மட்டுமல்ல, உங்கள் வேலை செய்யும் முறையும் இன்னும் ஒழுங்காக மாறத் தொடங்கும்.
