பழைய புண்கள் ஆறுவதற்குள் புதிய இடியாய் வந்து இறங்கியுள்ளது ‘எம்.வி ஹோண்டியஸ்’ (MV Hondius) என்ற சொகுசுக் கப்பலில் பரவியுள்ள ‘ஹண்டா வைரஸ்’ (Hanta virus) பாதிப்பு. கடந்த 2020-ம் ஆண்டு உலகை முடக்கிய கொரோனா பெருந்தொற்றின் வடுக்கள் இன்னும் முழுமையாக மறையாத நிலையில், பாதுகாப்பு கவச உடைகள், தனிமைப்படுத்துதல், மற்றும் தொடர்புத் தடமறிதல் போன்ற வார்த்தைகள் மீண்டும் நம் தினசரி பயன்பாட்டிற்கு வந்து பதற்றத்தை உருவாக்கியுள்ளன.
அண்டார்டிகாவிற்குச் சென்ற எம்.வி ஹோண்டியஸ் கப்பலில் 5 பேருக்கு இந்த வைரஸ் உறுதி செய்யப்பட்டு, 3 பேர் உயிரிழந்துள்ளனர் என்ற தகவல், “மீண்டும் ஒரு பெருந்தொற்று உலகை உலுக்கப் போகிறதா?” என்ற அச்சத்தை மக்கள் மத்தியில் விதைத்துள்ளது. இருப்பினும், உலக சுகாதார நிறுவனத்தின் (WHO) தொற்றுநோய் மேலாண்மை இயக்குநர் மரியா வான் கெர்கோவ், “இது கோவிட் பெருந்தொற்றின் ஆரம்பம் அல்ல; இது காய்ச்சலும் அல்ல, இது பரவும் விதமே முற்றிலும் வேறு” என்று தெளிவாகப் பதிலளித்துள்ளார். இது ஏன் முக்கியம்? எதற்காக நாம் அச்சப்படத் தேவையில்லை என்பதை மருத்துவ அறிவியலின் அடிப்படையில் விரிவாக அலசுவோம்.
வைரஸின் தோற்றமும் பரவும் முறையும்
கோவிட்-19 மற்றும் ஹண்டா வைரஸ் ஆகிய இரண்டும் பரவும் விதத்தில் மலைக்கும் மடுவுக்குமான வித்தியாசங்கள் உள்ளன. கோவிட் என்பது SARS-CoV-2 வைரஸால் உருவாக்கப்பட்டு, மனிதர்களிடையே எளிதில் காற்றிலும், இருமல், தும்மல் வழியாக வெளிப்படும் சளித் துளிகளிலும் மிக வேகமாகப் பரவக்கூடிய ஒரு நோய்த்தொற்று ஆகும்.
ஆனால், ஹண்டா வைரஸ் என்பது அடிப்படையில் ஒரு ‘ஜூனோடிக்’ (Zoonotic) நோய். அதாவது, இது விலங்குகளிலிருந்து மனிதர்களுக்குப் நேரடியாகப் பரவும் வகையைச் சேர்ந்தது. மூடிய அறைகளைச் சுத்தம் செய்யும்போதோ, எலிகளின் நடமாட்டம் உள்ள இடங்களில் புழங்கும்போதோ மக்கள் இந்த வைரஸ் பாதிப்புக்கு உள்ளாகிறார்கள்.
- கோவிட் போல இது எளிதில் மனிதர்களிடையே பரவாது; எலிகள் போன்ற கொறித்துண்ணிகளின் சிறுநீர், எச்சில் அல்லது எச்சங்கள் மூலமாகவே இது பரவுகிறது.
- எம்.வி ஹோண்டியஸ் கப்பலில் பரவிய ‘ஆண்டிஸ்’ (Andes) வகை ஹண்டா வைரஸ் மட்டுமே விதிவிலக்காக மனிதர்களிடையே பரவும் தன்மை கொண்டது.
- இந்த ஆண்டிஸ் வைரஸ் ஒரு மனிதனிடம் இருந்து மற்றொரு மனிதருக்குப் பரவ வேண்டும் என்றாலும், பாதிக்கப்பட்ட நபரின் உடல் திரவங்களுடன் மிக நெருங்கிய, நேரடித் தொடர்பு இருந்தால் மட்டுமே சாத்தியம் என்று ஜான்ஸ் ஹாப்கின்ஸ் பல்கலைக்கழக நிபுணர்கள் கூறுகிறார்கள்.
ஆரம்பக்கட்ட அறிகுறிகளும் அடுத்தகட்ட ஆபத்துகளும்
இந்த இரண்டு வைரஸ்களுக்கும் ஆரம்பக்கட்ட அறிகுறிகள் கிட்டத்தட்ட ஒரே மாதிரியாகவே இருப்பதால், தொடக்க நிலையில் இதைக் கண்டறிவது சவாலானது. காய்ச்சல், வறட்டு இருமல், தசை சோர்வு, மூச்சுத் திணறல் போன்ற சாதாரண ஃப்ளூ காய்ச்சலுக்குரிய பொதுவான அறிகுறிகளே இரண்டுக்கும் ஏற்படும்.
ஆனால், நோய் உடலுக்குள் தீவிரமடையும் போது இதன் உண்மையான கொடூர முகம் வெளிப்படுகிறது. கோவிட் வைரஸ் முக்கியமாகச் சுவாச மண்டலத்தை மட்டுமே தீவிரமாகப் பாதித்து ஆக்ஸிஜன் தட்டுப்பாட்டை ஏற்படுத்துகிறது. ஹண்டா வைரஸைப் பொறுத்தவரை இது மிகவும் கடுமையான பக்கவிளைவுகளைக் கொண்டுள்ளது.
- ஹண்டா வைரஸ் பல்மனரி சிண்ட்ரோம் (HCPS): நுரையீரலில் அதிகப்படியான திரவம் நிரம்பி, கடுமையான நெஞ்சு இறுக்கம் மற்றும் மூச்சுத் திணறல் ஏற்படும்.
- ரத்தக்கசிவுடன் கூடிய சிறுநீரகப் பாதிப்பு (HFRS): கடுமையான காய்ச்சலுடன் உடலின் உள்ளுறுப்புகளில் ரத்தக்கசிவு (Bleeding) ஏற்பட்டு, இறுதியில் சிறுநீரகச் செயலிழப்பை உருவாக்கும்.
அடைகாக்கும் காலம் எதில் அதிகம்?
ஒரு நோய்த்தொற்று உடலில் நுழைந்த பிறகு, அது வளர்ந்து தனது முதல் அறிகுறியை வெளியே காண்பிக்க எடுத்துக்கொள்ளும் காலத்தை மருத்துவத்துறையில் ‘அடைகாக்கும் காலம்’ என்கிறார்கள். இந்த விஷயத்தில் இரு வைரஸ்களும் மிகப்பெரிய முரண்பாட்டைக் கொண்டுள்ளன.
கோவிட்-19 வைரஸைப் பொறுத்தவரை, உடலில் தொற்றிய 2 முதல் 14 நாட்களுக்குள் (சராசரியாக 5-6 நாட்களில்) அது தன் அறிகுறிகளை வெளிப்படுத்திவிடும். ஆனால், ஹண்டா வைரஸ் தன் அறிகுறிகளை வெளிப்படுத்த அதிக நாட்கள் எடுத்துக்கொள்கிறது. இது ஆரம்பக்கட்ட நோயறிதலைச் சற்று தாமதப்படுத்துகிறது.
- நுரையீரலைப் பாதிக்கும் வகைக்கு, எலிகளுடன் தொடர்பு ஏற்பட்டதிலிருந்து 1 முதல் 8 வாரங்கள் வரை கூட ஆகலாம்.
- ரத்தக்கசிவு மற்றும் சிறுநீரகப் பாதிப்பு வகைக்கு, 1 முதல் 2 வாரங்களுக்குள் அறிகுறிகள் வெளியே தெரியத் தொடங்கும்.
ஆபத்தின் வீரியமும் சிகிச்சை முறையும்
கோவிட்-19 வைரஸ் அதிவேகமாகப் பரவினாலும், ஹண்டா வைரஸை ஒப்பிடும்போது அதன் இறப்பு ஆபத்து குறைவுதான். 2020-ம் ஆண்டில், தடுப்பூசிகள் வருவதற்கு முன்பு கோவிட் பாதிப்பின் ஒட்டுமொத்த இறப்பு விகிதம் சுமார் 1.7 சதவீதமாக மட்டுமே இருந்தது.
ஆனால், “வேகம் குறைவு என்றாலும், ஆபத்தில் நான் தான் பெரியவன்” என்று நிரூபிக்கிறது ஹண்டா வைரஸ். இதன் இறப்பு விகிதம் மருத்துவ உலகையே அச்சுறுத்துகிறது. கோவிட் நோய்க்குத் தற்போது உலகெங்கும் தடுப்பூசிகள் உள்ளன. ஆனால் ஹண்டா வைரஸுக்கு இதுவரை அதிகாரப்பூர்வமாகக் குணப்படுத்தும் மருந்தோ, தடுப்பூசியோ கண்டுபிடிக்கப்படவில்லை.
- தற்போது கப்பலில் கண்டறியப்பட்டுள்ள ‘ஆண்டிஸ்’ (Andes) வகை வைரஸால் பாதிக்கப்படுபவர்களில் கிட்டத்தட்ட 40 சதவீதம் பேர் உயிரிழக்க நேரிடும்.
- 1993-ல் அமெரிக்காவில் கண்டறியப்பட்ட ‘சின் நோம்ப்ரே’ (Sin Nombre) வகை ஹண்டா வைரஸின் இறப்பு விகிதம் 25 சதவீதமாக உள்ளது.
காலத்தின் கட்டாயம்: விழிப்புணர்வு!
உலக சுகாதார நிறுவனம் மற்றும் நிபுணர்களின் கருத்துப்படி, ஹண்டா வைரஸ் மிகவும் கொடியது என்பதில் சந்தேகமில்லை. எம்.வி ஹோண்டியஸ் கப்பலின் பயணிகள் 12 நாடுகளில் இறங்கியுள்ளதால் உலகளாவிய தடமறிதல் (Contact Tracing) நடந்து வருகிறது. ஆனால், இது கோவிட்-19 போல அதிவேகமாகக் காற்றிலும், எச்சில் துளிகளிலும் பரவும் தன்மை கொண்டதல்ல என்பதால், மனிதகுலம் இன்னொரு மாபெரும் பெருந்தொற்றை எதிர்கொள்கிறது என்று பீதியடையத் தேவையில்லை. தேவையற்ற அச்சம் தவிர்த்து, தகுந்த சுகாதார விழிப்புணர்வோடு இருப்பதே தற்போதைய சூழலுக்குப் பாதுகாப்பானது!