பெரிய ஐடி நிறுவனத்தில் (IT Company) வேலை கிடைப்பது என்பது பல இளைஞர்களின் கனவு. ஆனால், அந்த வெற்றியைத் தியாகங்கள் செய்து வளர்த்த பெற்றோரிடம் சமர்ப்பிக்கும்போது கிடைக்கும் மகிழ்ச்சிக்கு ஈடு இணையே இல்லை. அப்படியொரு நெகிழ்ச்சியான சம்பவம் தற்போது இணையத்தில் வைராலாகி வருகிறது.
வைரல் வீடியோவின் பின்னணி:
புனேவைச் சேர்ந்த ‘பிரக்யா’ (Pragya) என்ற இளம்பெண் கூகுள் (Google) நிறுவனத்தில் பணிபுரிகிறார். சமீபத்தில் இவர் தனது பெற்றோரைத் தான் வேலை பார்க்கும் அலுவலகத்திற்கு அழைத்துச் சென்றுள்ளார். அந்தச் சுற்றுப்பயணத்தை வீடியோவாக எடுத்து இன்ஸ்டாகிராமில் பகிர, அது இப்போது லட்சக்கணக்கான மக்களின் மனதை வென்றுள்ளது.
வீடியோவில் என்ன இருக்கிறது?
வழக்கமாக கூகுள் அலுவலகம் என்றாலே பிரம்மாண்டம், இலவச உணவு, கேம்ஸ் என்றுதான் நாம் பார்த்திருப்போம். ஆனால், இந்த வீடியோவில் அந்த ஆடம்பரங்களை விட, பிரக்யாவின் பெற்றோரின் முகத்தில் தெரியும் அந்த ‘வெகுளித்தனமான பெருமை’தான் ஹைலைட்.
கூகுள் லோகோ முன்பு நின்று பெருமையுடன் போஸ் கொடுப்பது, அலுவலகத்தில் அலங்கரிக்கப்பட்ட கிறிஸ்துமஸ் மரத்தை ஆச்சரியமாகப் பார்ப்பது, விளையாட்டு அறையில் இருக்கும் ‘ஃபூஸ்பால்’ (Foosball) விளையாட்டை ஆர்வமாக முயன்று பார்ப்பது, இறுதியாக, அலுவலக கேண்டீனில் மகளுடன் அமர்ந்து சாப்பிடுவது என அந்த வீடியோவின் ஒவ்வொரு நொடியும் அழகிய கவிதை.
உருக வைக்கும் வரிகள்:
இந்த வீடியோவைப் பகிர்ந்த பிரக்யா, “என் வாழ்நாள் முழுவதும் என் பெற்றோர் எனக்குத் துணையாக இருந்தனர். என் மீது எனக்கு நம்பிக்கை இல்லாத நேரங்களில் கூட, அவர்கள் என் மீது நம்பிக்கை வைத்தார்கள். நான் வேலை பார்க்கும் இடத்தை அவர்களுக்குச் சுற்றிக்காட்டியது கனவு போல இருந்தது. அவர்கள் முகத்தில் தெரிந்த அந்த மகிழ்ச்சி எனக்குச் சொல்ல முடியாத நிம்மதியைத் (Sukoon) தந்தது. இவை அனைத்தும் உங்களுக்காகத்தான் அப்பா, அம்மா!” என்று பதிவிட்டுள்ளார்.
https://www.instagram.com/reels/DSm5mWDkpCP
“நீங்க ஜெயிச்சிட்டீங்க மா!”
இந்த வீடியோவைப் பார்த்த நெட்டிசன்கள் உணர்ச்சிவசப்பட்டு கமெண்ட் செய்து வருகின்றனர்.
ஒருவர், “வாழ்க்கையில் இதைவிடப் பெரிய வெற்றி (You won in life) வேறு எதுவும் இல்லை” என்று கூறியுள்ளார்.
மற்றொருவர், “ஒவ்வொரு பிள்ளையின் கனவும் இதுதான்” என்று பதிவிட்டுள்ளார்.
பலரும், “எனக்கும் இதேபோல் என் பெற்றோரை என் அலுவலகத்திற்கு அழைத்துச் செல்ல வேண்டும் என்ற ஆசை வந்துவிட்டது” என்று கூறி வருகின்றனர்.
வெறும் சம்பளமும், பதவியும் மட்டுமே வெற்றியல்ல; நம்மை ஆளாக்கிய பெற்றோரின் முகத்தில் ஒரு சிறு புன்னகையை வரவழைப்பதுதான் உண்மையான ‘சக்சஸ்’ என்பதை இந்த வீடியோ மீண்டும் நினைவுபடுத்தியுள்ளது.