நெஸ்கஃபே காபி பானங்களின் பாக்கெட்டுகளில் தவறான தகவல்கள் இடம்பெற்றிருப்பது, பிரியா கோல்டு பிஸ்கட் தயாரிப்பில் கால்நடைத் தீவனத்துக்கான தவிடு பயன்படுத்தப்பட்டது, டோட்லா பால் மாதிரியில் சோப்பு தயாரிப்பில் பயன்படுத்தப்படும் ரசாயனம் கண்டறியப்பட்டது உள்ளிட்ட அதிர்ச்சித் தகவல்களை உணவுப் பாதுகாப்பு ஆணையம் (FSSAI) வெளியிட்டுள்ளது.
உணவுப் பொருட்களைத் தயாரிக்கும் பெரிய நிறுவனங்கள் மற்றும் சிறிய நிறுவனங்களில் உணவுப் பாதுகாப்பு அதிகாரிகள் அண்மையில் சோதனை நடத்தினர். பொதுமக்கள் அளித்த புகார்களின் அடிப்படையிலும் சில நிறுவனங்களில் ஆய்வு நடத்தப்பட்டது.
இந்த சோதனைகளில் கண்டுபிடிக்கப்பட்ட குறைபாடுகள் குறித்து உணவுப் பாதுகாப்பு ஆணையம் விரிவான அறிவிப்புகளை வெளியிட்டுள்ளது.
சில நிறுவனங்களுக்கு விளக்கம் கேட்டு நோட்டீஸ் அனுப்பப்பட்டுள்ளது. சில நிறுவனங்களின் உரிமங்கள் தற்காலிகமாக நிறுத்தி வைக்கப்பட்டுள்ளன. மேலும் 3 நிறுவனங்கள் மீது நீதிமன்றத்தில் வழக்குத் தொடரவும் அனுமதி வழங்கப்பட்டுள்ளது.
நெஸ்கஃபே காபியில் என்ன பிரச்சினை?
நெஸ்லே இந்தியா நிறுவனத்தின் நெஸ்கஃபே இன்டென்ஸ் கஃபே கப்புச்சினோ, நெஸ்கஃபே சாக்கோ மோக்கா, நெஸ்கஃபே சில்டு லாட்டே ஆகிய 3 காபி பானங்களின் பாக்கெட்டுகளில் முரண்பாடான தகவல்கள் இருப்பதாக உணவுப் பாதுகாப்பு ஆணையம் கண்டுபிடித்துள்ளது.
இந்த பானங்களின் பாக்கெட்டுகளின் முன்பக்கத்தில் ‘சுவையூட்டப்பட்ட பால்’ என்று எழுதப்பட்டுள்ளது. ஆனால் பின்பக்கத்தில் ‘பால் சார்ந்த தனி வகை உணவுப் பொருள்’ என்று குறிப்பிடப்பட்டுள்ளது.
உண்மையில் இந்த பானங்கள் சுவையூட்டப்பட்ட பால் என்ற வகையில்தான் வருகின்றன. அப்படி இருக்கும்போது அவற்றை வேறு வகையான உணவுப் பொருள் என்று பின்பக்கத்தில் குறிப்பிட்டிருப்பது தவறு என்று உணவுப் பாதுகாப்பு ஆணையம் தெரிவித்துள்ளது.
மேலும், ஆன்லைன் விற்பனைத் தளங்களில் இந்த பானங்கள் ‘காபி சுவையூட்டப்பட்ட பால்’ என்று விளம்பரம் செய்யப்பட்டுள்ளன. குறிப்பிட்ட வகை பாலின் நன்மைகள் இந்த பானங்களில் இருப்பதாகவும் விளம்பரப்படுத்தப்பட்டுள்ளது.
இந்த விளம்பரங்களுக்கும் பாக்கெட்டுகளில் கொடுக்கப்பட்டுள்ள விவரங்களுக்கும் பொருத்தம் இல்லை என்று உணவுப் பாதுகாப்பு ஆணையம் தெரிவித்துள்ளது.
இதையடுத்து நெஸ்லே இந்தியா மற்றும் இந்த பானங்களைத் தயாரிக்கும் Schreiber Dynamix Dairies, Lotus Dairy Products ஆகிய நிறுவனங்களுக்கு விளக்கம் கேட்டு நோட்டீஸ் அனுப்பப்பட்டுள்ளது.
இந்த முரண்பாடுகளுக்கு ஏன் நடவடிக்கை எடுக்கக்கூடாது என்று விளக்கம் அளிக்குமாறு சம்பந்தப்பட்ட நிறுவனங்களுக்கு உத்தரவிடப்பட்டுள்ளது.
தேவைப்பட்டால் தவறான விளம்பரங்களை நிறுத்தவும், சரியான தகவல்களுடன் புதிய விளம்பரங்களை வெளியிடவும் நடவடிக்கை எடுக்கப்படும் என்று உணவுப் பாதுகாப்பு ஆணையம் தெரிவித்துள்ளது.
இந்துஸ்தான் யூனிலீவருக்கும் நோட்டீஸ்
இந்துஸ்தான் யூனிலீவர் நிறுவனத்துக்கும் உணவுப் பாதுகாப்பு ஆணையம் நோட்டீஸ் அனுப்பியுள்ளது.
உணவுப் பொருட்கள் தொடர்பான விளம்பரங்கள் மற்றும் விதிமீறல்கள் குறித்து இந்த நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது. ஆனால் அந்த நிறுவனத்தின் எந்தப் பொருள் தொடர்பாக நோட்டீஸ் அனுப்பப்பட்டுள்ளது என்ற முழு விவரம் தற்போது கிடைத்துள்ள அறிவிப்புகளில் இடம்பெறவில்லை.
பிரியா கோல்டு பிஸ்கட்டில் கால்நடைத் தீவனப் பொருள்
பிரியா கோல்டு (Priya gold) பிஸ்கட் தயாரிக்கும் Surya Food & Agro நிறுவனத்தில் நடத்தப்பட்ட சோதனையில் அதிர்ச்சித் தகவல் கண்டுபிடிக்கப்பட்டுள்ளது.
பொதுமக்களில் ஒருவர் அளித்த புகாரின் அடிப்படையில் இந்த நிறுவனத்தில் உணவுப் பாதுகாப்பு அதிகாரிகள் சோதனை நடத்தினர்.
அப்போது பிஸ்கட் தயாரிப்பில் நார்ச்சத்துக்காக கால்நடைகளுக்கான தீவனத்தில் பயன்படுத்தப்படும் தவிடு சேர்க்கப்பட்டிருந்தது கண்டுபிடிக்கப்பட்டது. அந்தத் தவிடு வைக்கப்பட்டிருந்த சாக்குப் பைகளிலேயே அது கால்நடைத் தீவனத்திற்கான பொருள் என்று குறிப்பிடப்பட்டிருந்தது.
மனிதர்கள் சாப்பிடுவதற்காக அல்லாமல் கால்நடைகளுக்காக வைக்கப்பட்டிருந்த பொருளை பிஸ்கட் தயாரிப்பில் பயன்படுத்தியது கடுமையான விதிமீறல் என்று உணவுப் பாதுகாப்பு ஆணையம் தெரிவித்துள்ளது.
மேலும் பிஸ்கட் தயாரிக்கும் இடத்தில் போதிய சுத்தம் இல்லாதது, பூச்சிகளைக் கட்டுப்படுத்துவதற்கான முறையான ஏற்பாடுகள் இல்லாதது, மூலப்பொருட்களைச் சரியாகப் பாதுகாக்காதது உள்ளிட்ட குறைபாடுகளும் கண்டுபிடிக்கப்பட்டன.
இதையடுத்து அந்த நிறுவனத்தின் உணவுப் பாதுகாப்பு உரிமம் இடைநிறுத்தப்பட்டது. மேலும் அந்த நிறுவனம் மீது நீதிமன்றத்தில் வழக்குத் தொடரவும் அதிகாரிகள் அனுமதி வழங்கியுள்ளனர்.
டோட்லா பால் மாதிரியில் சோப்பு ரசாயனம்
டோட்லா டெய்ரி (Dodla Dairy) நிறுவனத்தின் முழுக் கொழுப்புள்ள பால் மாதிரியை உணவுப் பாதுகாப்பு அதிகாரிகள் ஆய்வு செய்தனர்.
முதலில் நடத்தப்பட்ட சோதனையில் அந்தப் பாலில் இருக்க வேண்டிய அளவுக்குக் கொழுப்புச் சத்து இல்லை என்பது கண்டுபிடிக்கப்பட்டது. இதையடுத்து அந்த நிறுவனம் மேல்முறையீடு செய்ததால் பால் மாதிரி மீண்டும் ஆய்வகத்திற்கு அனுப்பப்பட்டது.
அங்கு நடத்தப்பட்ட சோதனையில் அந்தப் பால் மாதிரியில் சோப்பு தயாரிப்பில் பயன்படுத்தப்படும் ரசாயனம் அல்லது காஸ்டிக் சோடா இருப்பது கண்டுபிடிக்கப்பட்டதாக உணவுப் பாதுகாப்பு ஆணையம் தெரிவித்துள்ளது.
மேலும் அந்தப் பாலில் இருக்க வேண்டிய குறைந்தபட்ச கொழுப்புச் சத்தும் இல்லை என்பது உறுதி செய்யப்பட்டது.
இதனால் ஆய்வு செய்யப்பட்ட பால் மாதிரி பாதுகாப்பற்றது என்றும், நிர்ணயிக்கப்பட்ட தரத்தில் இல்லை என்றும் ஆய்வகம் தெரிவித்துள்ளது.
இதையடுத்து டோட்லா டெய்ரி நிறுவனம் மற்றும் அந்தப் பாலைத் தயாரித்து விற்பனை செய்ததில் தொடர்புடையவர்கள் மீது நீதிமன்றத்தில் வழக்குத் தொடர அனுமதி வழங்கப்பட்டுள்ளது.
இந்தக் குறைபாடு ஆய்வு செய்யப்பட்ட பால் மாதிரியில் கண்டறியப்பட்டது. நிறுவனத்தின் அனைத்து பால் பாக்கெட்டுகளிலும் இதே பிரச்சினை இருப்பதாக அறிவிக்கப்படவில்லை.
ஆர்கானிக் உலர் திராட்சையில் பூச்சிக்கொல்லி மருந்து
Ueir Organic Foods என்ற நிறுவனத்தின் மஞ்சள் நிற உலர் திராட்சை மாதிரியையும் அதிகாரிகள் ஆய்வு செய்தனர். ஆர்கானிக் உணவுப் பொருள் என்று விற்கப்பட்ட இந்த உலர் திராட்சையில் பல வகையான பூச்சிக்கொல்லி மருந்துகளின் எச்சங்கள் இருப்பது கண்டுபிடிக்கப்பட்டது.
அவற்றில் சில பூச்சிக்கொல்லி மருந்துகளின் எச்சங்கள் அனுமதிக்கப்பட்ட அளவைவிட அதிகமாக இருந்தன. அந்த நிறுவனம் மேல்முறையீடு செய்ததைத் தொடர்ந்து மீண்டும் நடத்தப்பட்ட ஆய்விலும், குறிப்பாக 2 வகையான பூச்சிக்கொல்லி மருந்துகளின் எச்சங்கள் அனுமதிக்கப்பட்ட அளவைவிட அதிகமாக இருப்பது உறுதி செய்யப்பட்டது.
இதனால் ஆய்வு செய்யப்பட்ட உலர் திராட்சை மாதிரி பாதுகாப்பற்றது என்று அறிவிக்கப்பட்டது. இந்த நிறுவனம் மீதும் நீதிமன்றத்தில் வழக்குத் தொடர அனுமதி வழங்கப்பட்டுள்ளது.
6 மாத குழந்தைகளுக்கான உணவில் சர்க்கரைக்குக் கட்டுப்பாடு
இதற்கிடையே குழந்தைகளுக்கான உணவுகள் தொடர்பாகவும் உணவுப் பாதுகாப்பு ஆணையம் புதிய விதிகளைக் கொண்டுவரத் திட்டமிட்டுள்ளது.
பிறந்து 6 மாதங்கள் வரையிலான குழந்தைகளுக்காகத் தயாரிக்கப்படும் உணவுப் பொருட்களில் சுக்ரோஸ், பிரக்டோஸ் ஆகிய 2 வகையான சர்க்கரைகளைச் சேர்ப்பதற்குக் கட்டுப்பாடு விதிக்க வரைவு அறிவிப்பு வெளியிடப்பட்டுள்ளது.
குழந்தைகளுக்கு மிகச் சிறிய வயதிலேயே கூடுதலாகச் சேர்க்கப்படும் சர்க்கரை கிடைப்பதைக் குறைப்பதே இந்த நடவடிக்கையின் நோக்கம்.
இது தற்போது வரைவு அறிவிப்பு மட்டுமே. பொதுமக்களின் கருத்துகளைப் பெற்ற பிறகே இறுதி விதிகள் வெளியிடப்படும்.
இவ்வாறு உணவுப் பொருட்களின் தரம், தயாரிக்கும் இடங்களின் சுத்தம், பாக்கெட்டுகளில் கொடுக்கப்படும் தகவல்கள், விளம்பரங்கள் உள்ளிட்டவற்றில் விதிகளைப் பின்பற்றாத நிறுவனங்கள் மீது உணவுப் பாதுகாப்பு ஆணையம் நடவடிக்கை எடுத்து வருகிறது.
