வீட்டிலேயே ரெஸ்டாரண்ட் ஸ்டைல் சிக்கன் ஸ்டியூ! குளிர் காலத்திற்கு ஏற்ற ஆரோக்கியமான ரெசிபி

சூடாக, சத்தானதாக, வயிறு நிறைய சாப்பிட ஏற்ற உணவு என்றால் சிக்கன் ஸ்டியூ (Chicken Stew) சிறந்த தேர்வாகும். காய்கறிகள், சிக்கன் மற்றும் நறுமண மூலிகைகள் சேர்த்து தயாரிக்கப்படும் இந்த ஒரு பாத்திர உணவு (One-pot Meal), உடலுக்கு தேவையான புரதம் மற்றும் ஊட்டச்சத்துக்களை வழங்குவதோடு, குறைந்த நேரத்தில் சமைக்கக்கூடிய ஆரோக்கியமான ரெசிபியாகவும் உள்ளது. வெறும் 45 நிமிடங்களில் இந்த சுவையான சிக்கன் ஸ்டியூவை வீட்டிலேயே செய்து அசத்தலாம். 

தேவையான பொருட்கள்

இந்த ரெசிபிக்கு எலும்பில்லாத சிக்கன், கேரட், செலரி, பேபி உருளைக்கிழங்கு, பூண்டு, வெண்ணெய், கோதுமை மாவு (அல்லது மைதா), சிக்கன் பிரோத் (Chicken Broth), தைம் (Thyme), பிரியாணி இலை (Bay Leaf), உப்பு, மிளகுத்தூள் மற்றும் அலங்கரிக்க கொத்தமல்லி அல்லது பார்ஸ்லி தேவைப்படும்.

கேரட், உருளைக்கிழங்கு போன்ற காய்கறிகள் ஸ்டியூவிற்கு இனிப்பான சுவையையும், சிக்கன் பிரோத் ஆழமான நறுமணத்தையும் தருகிறது. 

சிக்கன் ஸ்டியூ செய்வது எப்படி?

முதலில் ஒரு பெரிய பாத்திரத்தில் வெண்ணெயை உருக்கி, அதில் கேரட் மற்றும் செலரியை 5 நிமிடங்கள் வதக்கவும். பின்னர் நறுக்கிய பூண்டை சேர்த்து லேசாக வதக்கிய பிறகு, ஒரு டேபிள்ஸ்பூன் மாவை சேர்த்து நன்றாகக் கிளறவும்.

அடுத்து சிக்கன் துண்டுகள், தைம், பிரியாணி இலை, உருளைக்கிழங்கு மற்றும் சிக்கன் பிரோத்தை சேர்த்து, தேவையான அளவு உப்பு மற்றும் மிளகுத்தூள் போட்டு கொதிக்க விட வேண்டும். சுமார் 15 நிமிடங்களில் சிக்கன் நன்றாக வெந்து, உருளைக்கிழங்கு மென்மையாக மாறும். 

இறுதியாக என்ன செய்ய வேண்டும்?

வெந்த சிக்கனை தனியாக எடுத்து, இரண்டு முள்கரண்டி உதவியுடன் சிறு துண்டுகளாக உதிர்த்துக் கொள்ளவும். பின்னர் மீண்டும் ஸ்டியூவில் சேர்த்து ஒரு சில நிமிடங்கள் கொதிக்க விடுங்கள்.

மேலே நறுக்கிய பார்ஸ்லி அல்லது கொத்தமல்லி தூவி சூடாக பரிமாறலாம். இந்த ஸ்டியூவுடன் வெண்ணெய் தடவிய பிரெட், கார்லிக் பிரெட் அல்லது மென்மையான ரொட்டியை சேர்த்து சாப்பிட்டால் சுவை இன்னும் அதிகரிக்கும். 

ஆரோக்கியமான உணவாக ஏன் கருதப்படுகிறது?

சிக்கன் ஸ்டியூவில் அதிக அளவு புரதம், நார்ச்சத்து மற்றும் காய்கறிகள் இருப்பதால் இது முழுமையான உணவாக கருதப்படுகிறது. அதிக எண்ணெய் தேவையில்லை என்பதால் உடல் எடையை கவனிப்பவர்களுக்கும் இது நல்ல தேர்வாக இருக்கும். மேலும், மீதமுள்ள ஸ்டியூவை காற்று புகாத பாத்திரத்தில் வைத்து 3 நாட்கள் வரை குளிர்சாதனப் பெட்டியில் சேமித்து மீண்டும் சூடாக்கி பயன்படுத்தலாம்.