கோவையில் (Coimbatore) 10 வயது சிறுமி பாலியல் வன்கொடுமைக்குள்ளாக்கப்பட்டு படுகொலை செய்யப்பட்ட கொடூர சம்பவம் குறித்து தமிழ்நாடு அரசிடம் தேசிய மகளிர் ஆணையம் (National Commission for Women) அறிக்கை கோரியுள்ளது.
இது தொடர்பாக தேசிய மகளிர் ஆணையம் கூறியுள்ளதாவது: கோயம்புத்தூரில் 10 வயது சிறுமி கடத்தப்பட்டு, கொடூரமான முறையில் கொலை செய்யப்பட்டதாக ஊடகங்களில் வெளியான மிகவும் வேதனைக்குரிய செய்திகளை தேசிய மகளிர் ஆணையம் (NCW), தானாக முன்வந்து (Suo motu) வழக்காகப் பதிவு செய்துள்ளது. தனது வீட்டின் அருகே விளையாடிக் கொண்டிருந்தபோது காணாமல் போன அந்தச் சிறுமி, பின்னர் கண்ணம்பாளையம் குளம் அருகே உயிரிழந்த நிலையில் கண்டெடுக்கப்பட்டார்.
தேசிய மகளிர் ஆணையத்தின் மதிப்பிற்குரிய தலைவர் விஜயா ரஹாத்கர், இந்த விவகாரத்தில் உடனடியாக, கடுமையான மற்றும் காலக்கெடுவுக்குள் நடவடிக்கை எடுக்குமாறு தமிழ்நாடு காவல்துறை தலைமை இயக்குநருக்கு (DGP) கடிதம் எழுதியுள்ளார்.
மேலும், இது தொடர்பாக எடுக்கப்பட்ட விரிவான நடவடிக்கை அறிக்கை (ATR)-யை 7 நாட்களுக்குள் சமர்ப்பிக்குமாறு ஆணையம் கோரியுள்ளது.
இந்த வழக்கில் பதிவு செய்யப்பட்டுள்ள முதல் தகவல் அறிக்கை (FIR), பாரதிய நியாய சன்ஹிதா (BNS) மற்றும் போக்சோ (POCSO) சட்டத்தின் கீழ் சேர்க்கப்பட்டுள்ள பிரிவுகள், குற்றவாளிகளின் கைது மற்றும் காவல் விசாரணை, பிரேதப் பரிசோதனை மற்றும் தடய அறிவியல் சோதனையின் முடிவுகள், மற்றும் விசாரணையின் போது பயன்படுத்தப்பட்ட சிசிடிவி காட்சிகள், டிஜிட்டல் கண்காணிப்பு உள்ளிட்ட சேகரிக்கப்பட்ட ஆதாரங்கள் ஆகியவற்றின் அடிப்படையில் இந்த நடவடிக்கை அறிக்கை (ATR) கோரப்பட்டுள்ளது.
பாதிக்கப்பட்டு தவிக்கும் அந்தத் துயரமான குடும்பத்திற்கு உளவியல் ஆலோசனை, பாதுகாப்பு மற்றும் ஆதரவை வழங்குவதற்கு எடுக்கப்பட்ட நடவடிக்கைகள் குறித்த விவரங்களையும் ஆணையம் கேட்டுள்ளதுடன், இந்த விசாரணையை மிகுந்த உணர்வுப்பூர்வமாகவும், அவசரத் தன்மையுடனும் நடத்துமாறு உத்தரவிட்டுள்ளது.
இச்சம்பவத்திற்குத் தேசிய மகளிர் ஆணையம் கடும் கண்டனம் தெரிவித்துள்ளதோடு, சிறுமிகளுக்கு எதிரான இத்தகைய கொடூரமான வன்முறை குற்றங்கள் மிகக் கொடியவை என்றும், சட்டம் மிகக் கடுமையான நடவடிக்கைகளை இதற்கு எடுக்க வேண்டும் என்றும் தெரிவித்துள்ளது.