இந்திய தேர்தல் ஆணையத்தின் தலைமைத் தேர்தல் ஆணையர் ஞானேஷ் குமார் உள்ளிட்ட விவகாரங்கள் தொடர்பாக நேரில் சந்திக்க நேரம் கேட்ட மக்களவை எதிர்க்கட்சித் தலைவர் ராகுல் காந்தி, மாநிலங்களவை எதிர்க்கட்சித் தலைவர் மல்லிகார்ஜுன கார்கே ஆகியோருக்கு தலைமை நீதிபதி சூர்ய காந்த் பதில் கடிதம் எழுதியுள்ளார்.
ராகுல் காந்தி, மல்லிகார்ஜுன கார்கே ஆகியோருக்கு அக்டோபர் 11-ந் தேதி தலைமை நீதிபதி சூர்ய காந்த் எழுதிய கடிதத்தில் கூறியிருப்பதாவது: அக்டோபர் 10-ந் தேதி நீங்கள் எழுதிய கடிதம் எனக்குக் கிடைத்தது. அந்தக் கடிதத்தில், அக்டோபர் 12-ந் தேதி திங்கட்கிழமை மாலை 4 மணி முதல் 5 மணிக்குள் என்னைச் சந்திக்க நேரம் கேட்டிருந்தீர்கள்.
இந்தச் சந்திப்பின்போது பின்வரும் பிரச்சினைகள் குறித்து மனு அளிக்க விரும்புவதாகத் தெரிவித்திருந்தீர்கள்.
- இந்திய தலைமைத் தேர்தல் ஆணையர் மற்றும் இந்திய தேர்தல் ஆணையம் தொடர்பான பிரச்சினைகள்.
- மாணவர்கள் பலர் தன்னிச்சையாகக் கைது செய்யப்பட்ட விவகாரம்.
- மெட்ரோ ரயில் நிலையங்கள் மூடப்பட்ட விவகாரம்.
- ரயில்கள் ரத்து செய்யப்பட்ட விவகாரம் உள்ளிட்ட பிற பிரச்சினைகள்.
முதலில் ஒரு விஷயத்தைத் தெளிவுபடுத்த விரும்புகிறேன்.
நீங்கள் குறிப்பிட்டுள்ள பிரச்சினைகள் ஏற்கெனவே உச்ச நீதிமன்றத்தில் வழக்குகளாக உள்ளன.
இப்படிப்பட்ட வழக்குகள் குறித்து உங்களுடன் நான் நேரில் சந்தித்துப் பேசினால், அது நீதிமன்றத்தின் செயல்பாடுகளில் தலையிடுவது போன்ற சூழ்நிலையை உருவாக்கும்.
நீதிமன்றத்தில் விசாரிக்க வேண்டிய விஷயங்களை நீதிமன்றத்தில்தான் பேச வேண்டும். தனிப்பட்ட சந்திப்பில் பேசுவது நீதித்துறையின் நடைமுறைகளுக்கு எதிரானதாகிவிடும்
இந்திய அரசியலமைப்புச் சட்டத்தின்படி, உச்ச நீதிமன்றத்திற்கு நிர்வாக அதிகாரங்கள் வழங்கப்படவில்லை என்பதையும் உங்களுக்கு நினைவூட்ட விரும்புகிறேன். ஆனால், அரசியலமைப்புச் சட்டத்தின் 32-வது பிரிவு மற்றும் நீதிமன்றத்திற்கு வழங்கப்பட்டுள்ள பிற அதிகாரங்களின்படி, எந்தவொரு பிரச்சினையையும் நீதிமன்றத்தின் மூலம் விசாரித்து நீதி வழங்க முடியும். குறிப்பாக, மக்களைப் பாதிக்கும் முக்கியமான பிரச்சினைகளை நீதிமன்றம் விசாரிக்க வேண்டிய கடமை உள்ளது.
இந்திய குடிமக்கள் ஒவ்வொருவரின் அடிப்படை உரிமைகளையும் பாதுகாப்பதில் உச்ச நீதிமன்றம் உறுதியாக இருக்கிறது. தங்களுடைய அடிப்படை உரிமைகள் பாதிக்கப்படும்போது, எந்த நேரத்திலும் சட்டப்படி நீதிமன்றத்தை அணுகி நிவாரணம் பெறுவதற்கு ஒவ்வொரு குடிமகனுக்கும் உரிமை இருக்கிறது.
எனவே, நீங்கள் என்னை நேரில் சந்தித்து மனு அளிப்பதற்குப் பதிலாக, உச்ச நீதிமன்றத்தில் முறையாக மனுத் தாக்கல் செய்து நீதிமன்றத்தின் அதிகாரத்தைப் பயன்படுத்திக் கொள்வதே சரியான வழியாக இருக்கும்.
நீங்கள் குறிப்பிட்டுள்ள பிரச்சினைகளைப் போன்ற சில விவகாரங்கள் அக்டோபர் 13-ந் தேதி செவ்வாய்க்கிழமை விசாரணைக்கு வர உள்ளன. நீங்கள் விரும்பினால், அக்டோபர் 12-ந் தேதி திங்கட்கிழமையே உச்ச நீதிமன்றத்தில் மனுத் தாக்கல் செய்யலாம். அன்று காலை 10.30 மணி முதல் மாலை 4.30 மணி வரை உச்ச நீதிமன்றத்திற்கு நேரில் சென்று மனுத் தாக்கல் செய்யலாம் அல்லது இணையதளம் மூலமாகவும் மனுத் தாக்கல் செய்யலாம். இணையதளத்தில் எந்த நாளிலும், எந்த நேரத்திலும் மனுத் தாக்கல் செய்யும் வசதி உள்ளது.
நீங்கள் தாக்கல் செய்யும் மனு, சட்ட விதிகளின்படி முடிந்தவரை விரைவாக விசாரணைக்கு எடுத்துக்கொள்ளப்படும் என்று உறுதியளிக்கிறேன். இவ்வாறு தலைமை நீதிபதி சூர்ய காந்த் தெரிவித்துள்ளார்.
