விமான நிலையங்களை நடத்தும் நிறுவனங்களே விமான சேவையிலும் களமிறங்குவது தொடர்பான விவகாரத்தில் மத்திய அரசு கவனமாக முடிவு எடுக்க உள்ளதாக மத்திய விமானப் போக்குவரத்துத் துறை அமைச்சர் கே. ராம்மோகன் நாயுடு தெரிவித்துள்ளார்.
அதானி குழுமம் விமான நிறுவனத்தை தொடங்குவதற்கான விதிவிலக்கு கோரியுள்ள நிலையில், விமான நிலையம்-விமான நிறுவனம் என்ற இரட்டை உரிமையால் ஏற்படக்கூடிய போட்டி சிக்கல்கள் குறித்து அரசு பரிசீலித்து வருகிறது.
அதானி குழுமத்தின் கோரிக்கை என்ன?
மும்பை விமான நிலையத்தில் 74 சதவீத பங்குகளை வைத்துள்ள அதானி குழுமம், விமான நிறுவனத்தில் முதலீடு செய்யும் வகையில் தற்போதுள்ள கட்டுப்பாடுகளில் தளர்வு கோரி ஜூன் மாதம் அரசுக்கு கடிதம் அனுப்பியது.
டெல்லி மற்றும் மும்பை விமான நிலையங்களின் தனியார்மய ஒப்பந்தங்களில், விமான நிலையத்தை இயக்கும் நிறுவனங்கள் திட்டமிட்ட விமான நிறுவனத்தில் 10 சதவீதத்துக்கு மேல் பங்கு வைத்திருப்பதற்கு கட்டுப்பாடுகள் உள்ளன. இந்த விதிகளில் மாற்றம் செய்ய வேண்டுமெனில் மத்திய அமைச்சரவையின் ஒப்புதல் தேவைப்படும்.
போட்டி சமநிலை குறித்து கவலை
விமான நிலையமும் விமான நிறுவனமும் ஒரே குழுமத்தின் கட்டுப்பாட்டில் இருந்தால், விமான நிறுவனங்களுக்கு வழங்கப்படும் ஸ்லாட், கட்டணங்கள், தரை சேவைகள் உள்ளிட்ட விஷயங்களில் போட்டி சமநிலை பாதிக்கப்படலாம் என்ற கவலை எழுந்துள்ளது.
இந்த விவகாரத்தில் இண்டிகோ உள்ளிட்ட விமான நிறுவனங்களும் எதிர்ப்பு தெரிவித்துள்ளன. விமான நிலையங்கள் அனைத்து விமான நிறுவனங்களுக்கும் சமமான அணுகலை வழங்கும் வகையில் நடுநிலையாக செயல்பட வேண்டும் என்பது அவர்களின் நிலைப்பாடாக உள்ளது.
அதிக விமான நிறுவனங்கள் வேண்டும்
இந்திய விமானத் துறையில் தற்போது இண்டிகோ மற்றும் ஏர் இந்தியா குழுமத்தின் ஆதிக்கம் அதிகமாக இருப்பதால், மேலும் பல விமான நிறுவனங்கள் சந்தைக்கு வர வேண்டும் என மத்திய அரசு தொடர்ந்து வலியுறுத்தி வருகிறது.
அதே நேரத்தில், விமான நிலைய உரிமையாளர்கள் விமான சேவையிலும் ஈடுபடுவது தொடர்பான நன்மை, பாதிப்புகளை ஆய்வு செய்த பிறகே முடிவு எடுக்கப்படும் என அமைச்சர் தெரிவித்துள்ளார்.
